IḶUAIAN 28 - Alkitab Singog In Mongondow Masa In Tanaa

Pakeang in imang

¹ “Oinídon in ki Harun ki guya-guyangmu takin ki adí mita ki Nadab, ki Abihu, ki Eleazer bo ki Itamar, potondídon in mosia sinbá motaau mobantung kon i-Nakó mobaḻí imang.

² Pomiaaidon kon pakeang imang in ki Harun, sinbá sia in koontongan mokobangkaḷ.

³ Oinídon in bayongan mododagum inta ain inogoian-Ku in pandoi. Pokiaidaidon in mosia in pakeang i Harun sinbá motaaudon in sia tondíon-Ku tongá mogaid kon oaidan-Ku mobaḻí imang.

⁴ Pokiaidai doman in mosia in oḻingoi in dodob, epod, jubah, ḷambung inta iḷambáan, kaeng suruban bo baan. Ki Harun ki guya-guyangmu takin ki adínea mita musti pogaidan monia kon pakeang imang sinbá mosia in motaau mobantung kon i-Nakó mobaḻí imang.

^5-6 Pakeang tatua in musti pomiaan monia nongkon kaeng wol inta nobidu, nokamumu bo nopura, siningkoi buḷawan bo kaeng moaḷus. Koḻikud intua ḷambung Epod musti doman ḷambaan in gambar inta sujion.

⁷ Tontogot in obaga doyowa in ḷambung epod musti popodagum kon sínea.

⁸ Baan inta sinuji moaḷus nongkon touḷut inta notongkai musti popodagum kon ḷambung epod tatua sinbá motobatú.

^9-12 Pogamá kon batu delima doyowa. Potayakdon kon intau inta mopandoi monontaḷ kon buḷawan sin popokurig in pais in tangoi i adí mita i Yakub inta mopuḷú bodoyowá kon batu podudui in umur monia, togogonom in kon batu tobatú. Bo batu permata doyowa tatua musti bongkowon in buḷawan bo poukat kon tontogot in obaga in ḷambung epod mobaḻí tanda tompoingat kon suku Israel inta mopuḷú bodoyowá. Natuata in pinododia i Harun kon tangoi monia inta ain pinopokurig kon batu inta kon obaganea, sinbá Akuoi ki Tuhan, umuran mokotorop kon i monia.

¹³ Koḻikud in bongkow buḷawan doyowa tatua

¹⁴ musti pomiaan doman kon rante doyowa nongkon buḷawan taakan inta iḷubid, sin popokompit kon bongkow buḷawan tatua.”

Oḻingoi in dodob

¹⁵ “Pomiaaidon kon oḻingoi in dodob tobatú in ki Imang Moḷoben sin pakéon kon dodai in sia motayak kon onu in kinoibog i Allah. Bahan bo sujian oḻingoi in dodob tatua musti motongkai in touḷut bo sujian in ḷambung epod.

¹⁶ Notonggopat bo kopíon doyowa, ḷanggó bo oḷadnea tumododoyawa nopuḷú bo doyowa nosenti.

¹⁷ Pipid opat nopipid in batu permata kon oḻingoi in dodob tatua. Kon pipid muna in batu delima, topas bo baiduri sepah.

¹⁸ Kon pipid induanea in batu zamrud, batu nilam bo intan.

¹⁹ Kon pipid nogintoḷu in batu lazuardi, batu akik bo batu kecubung.

²⁰ Kon pipid noginggopat in batu pirus, yakut bo ratna cempaka. Batu permata mopuḷú bo doyowa tatua musti togoton in buḷawan.

²¹ Kon batúan in permata musti popokurig in tangoi tobatú nongkon sigad i adí Yakub inta mopuḷú bo doyowa nobaḻí tompoingat kon suku mita Israel.

²² Oḻingoi in dodob tatua pomiaai kon rante doyowa nongkon buḷawan taakan inta pitagon ná ḷubid.

²³ Pomia doman in ḻingkit buḷawan doyowa bo popouḷak kon popodnea doyowa inta kon ḻimonik in oḻingoi in dodob tatua

²⁴ bo potuotdon in rante buḷawan doyowa tatua kon bonu in ḻingkit mita inta koina.

²⁵ Ubung in rante doyowa tatua inta kon topongkó musti popotogot kon bongkow doyowa, sinbá oḻingoi in dodob tatua motaau poyoguputon takin dotá in muna in tontogot in obaga in ḷambung epod.

²⁶ Pomiadon bui kon ḻingkit buḷawan doyowa, bo pokompit kon oḻingoi in dodob tatua in ubungnea inta kon ḻimonag kon dotá in bonunea inta kodoyotan in ḷambung epod.

²⁷ Mopaḷut mako kon tua, pomiaaidon kon ḷambung in imang bo popodiug kon pinodaguman inta kon pinoyotondoḷannea bo koonagon topí, kon ḻimonikanmai in baan inta nongkon gaboḷan moaḷus

²⁸ Ḻingkit oḻingoi in dodob musti poyoguputon in tali nobidu kon ḻingkit in ḷambung epod sinbá oḻingoi in dodob tatua umuran kon ḻimonik in togot in ogotan bo diá moruntut.

²⁹ Kon dodai in ki Harun tumuot kon tampat motusi, musti diaannea in tangoi in suku mita Israel inta pinopokurig kon oḻingoi in dodobnea, sinbá Akuoi, ki Tuhan, umuran mokotorop kon umat-Ku.

³⁰ Ukat in Urim bo Tumim kon bonu in oḻingoi in dodob tatua sin pakéon i Harun aka sia tumayow kon i-Nakó. Kon dodai in sia yogot momia kon oaidannea tatua sia in musti umuran momaké kon oḻingoi in dodob, sinbá kotaauannea mongo onu in kinoibog-Ku kon umat Israel.”

Pakeang inta ḷutudon in imang

³¹ “Jubah inta pinaké kon ḻimonik in ḷambung epod musti komintan pomiaan nongkon wol nobidu.

³² Bubú in sigogownea inirigonan in pita sinuji sinbá diá mogampang moberak.

^33-34 Kon bingkínea inta kon dotá in ḻimonag musti pomiaan kon ḷambánea ná bungai in delima inta nongkon wol nobidu, nokamumu bo nopura bo giniring-giringan buḷawan inta pinoyotaḻempang.

³⁵ Jubah tatua musti pakéon i Harun aka sia mogaid kon oaidannea mobaḻí imang. Aka mamangoi in sia kon tayowon-Ku kon Yuang Motusi ande monaḷámai kon tampat tatua, yo kodongogandon in giring-giring tatua, sinbá diá matoi in sia.

³⁶ Pomiaaidon kon ḷambá nongkon buḷawan bo pais popokurig in tosingogon tanaa: ‘Tongábi ogoi kon i Tuhan’.

³⁷ Popotogotdon intua kon suruban, togot in tali nobidu.

³⁸ Ḷambá buḷawan tatua musti pakéon i Harun kon pogotnea sinbá Akuoi, ki Tuhan, moibog motarima kon bayongan in sosumba inta dinia intau Israel kon i-Nakó, umpaka kon dodai in mosia nodia kon sosumba tatua mosia ain nogaid kon inta noitaḷá.

³⁹ Ḷambung i Harun musti sujion nongkon kaeng moaḷus. Pomia doman in bogot in Uḷu tobatú nongkon kaeng moaḷus bo baan inta sinujian in gambar.

⁴⁰ Ki adí mita i Harun in pomiaai domandon kon ḷambung, baan bo suruban sinbá mosia mokobangkaḷ in koontongan.

⁴¹ Popoḷutudon in pakeang tatua kon i Harun ki utatmu bo kon i adínea mita. Toguḷuai in mosia in ḷana zaitun; tuata in pomiaan monimu sinbá mosia motaaudon mogaid kon oaidan-Ku mobaḻí imang.

⁴² Bo pomiaai doman in mosia kon soḷana mopoḷok nongkon kaeng moaḷus, koḷanggónea in nongkon ogotan dapot in páa sin pogoḻingoi kon awak inta diá mobaḻí ontongan intau ibanea.

⁴³ Soḷana tatua musti umuran pakéon monia kon dodai in mosia tumuot kon Ḷoḷaigan-Ku ande dimiug kon mezbah sin mogaid kon ibada mobaḻí imang kon Yuang Motusi, sinbá mosia in diá matoi sin popisí in koontongan awak monia inta diá motaau ontongon tua. Atorang tatua umuran popaké kon i Harun bo kon buínea mita.”