HAGAI 1 - Alkitab Singog In Mongondow Masa In Tanaa

Parenta i Tuhan moposindog bui in Baḷoi i

¹ Kon taong induanea kon pinomarentaan i Datu Darius kon Persia, kon singgai imitánea kon buḷan noginggonom, ki Tuhan in nosingog pinongin i Nabi Hagai. Koyow i Tuhan tatua inogoi kon i Zerubabel ki adí i Sealtiel, gubernur in Yohuda, bo kon i Imang moḷoben Ki Yosua ki adí i Yozadak.

² Ki Tuhan Inta Totok in mokawasa in noguman kon i Hagai, “Bangusa tanaa in noguman kon deemanpa orasnea moposindog bui in Baḷoi-Ku.”

³ Onda intua pinongin i Nabi Hagai ki Tuhan in noguman kon umat-Nea,

⁴ “Ei umat-Ku, degá orasneadon kon inimu in mogutun kon baḷoi inta moropot bo motorindog, bokaka Baḷoi-Ku in apugpa doman mako?

⁵ Tungkuḷaika, taridiai in kaadaanmu!

⁶ Moiko in noponimboidon in nobarong in bibit, táe bungai in boyómu tongá topiḻik. Oyúon in kaanon monimu, táe diá mokobotug kon sianmu. Oyúon in anggur kon i monimu, táe diá mokoorop kon ginamu. Oyúon in ḷambung monimu, táe diá mokoinggamá kon tumpingmu. Bo tondan in pinogaidan in mogogaid in diá tugat pakéon kon kobiagan monia moiduduimai.

⁷ Degá diádon kinotaauan monimu mongo nongonu sin mobaḻíbí intua?

⁸ Tanaa, in potakodon kon tombuḷud mita sin mogamá kon kayu, bo posindogdon in Baḷoi-Ku; dá mopiabí in gina-Ku bo Akuoi in sumbaandon bui podoyon kon inta moitutui. Bo, taridiaidon bui in kaadaanmu!

⁹ Moiko in mongamang mako kon bungai in boyó mobayong totok, táe nouḻí magí in tongábí topiḻik; bo dinia monimu kon baḷoi, táe bungai in boyómu tatua in inirup-Ku, dá nodait dinia in tompot. Nongonu sin inaidan-Ku intua? Tubagnea in nanaa: Popisí in Baḷoi-Ku umuranpa noton apug mako, bo moiko komintan in moḷongasidon moposindog in baḷoinea-baḷoinea.

¹⁰ Tuamai in uyan diádon moḷabú monag dá diádon in pinomuḷa in mobiag.

¹¹ Pinopoangoi-Kudon in inta mokoingkag kon butá bo kon tombuḷud mita, kon gobá mita in gandum bo kon buḷud mita in anggur bo kon gobá mita in zaitun, bo kon bayongan in pinomuḷa kon butá tanaa, nodapot in kon bayongan in intau bo mahaḷuk takin bayongan yagi-yagi inta iramuji monimu.”

Umat in Israel dinumudui kon parenta i Tuhan

¹² Onda intua ki Zerubabel bo ki Yosua takin bayongan umat in Israel inta ain nobui kon pinoḷumbúan kon Babel, in dinumudui kon tosingogon mita i Hagai, totabá i Tuhan tua. Mosia in nogaid kon onu inta pinarenta i Tuhan kon i monia, popisí in moondok kon i Tuhan.

¹³ Bo ki Hagai in nopotaau kon rayat in koyow i Tuhan kon ki Tuhan in nodandidon kon moḷukad kon i monia.

¹⁴ Natuata in aid i Tuhan nobogoi in ibog kon i Gubernur Zerubabel, kon i Imang Moḷoben ki Yosua takin bayongan in intau inta ain nobui nongkon pinoḷumbúan, sinbá mosia komintan in mogaid moposindog bui in Baḷoi i Tuhan Inta Totok in mokawasa, ki Allah monia.

¹⁵ Mosia in nomangkoidon nogaid kon singgai indoyowa nopuḷú bo opat, buḷan inggonomnea kon taong nogindua kon pinomarentaan i Datu Darius.