EPESUS 1 - Alkitab Singog In Mongondow Masa In Tanaa

¹ Umat i Allah kon Epesus, inta motoindudui kon i Kristus Yesus!

² Akuoi ki Paulus, inta nobaḻí rasul i Kristus Yesus sin pinodoyon kon ibog i Allah tontaní, akuoi in umuran mopoigum mako in doa sinbá ki Allah, ki Amá naton bo ki Tuhan Yesus Kristus mobogoi in barakat bo kobiagan motompia kon i monimu.

Barakat kon intau mita inta kinopiḻían

³ Dinayo-dayowdon in ki Allah, ki Amá i Tuhan naton ki Yesus Kristus! Sia ain nobogoi in barakat kon i naton, barakat rohani kon bonu in soroga, sin kita ain notobatú i Kristus.

⁴ Kon tungkuḷ in dunia naa diápa pinomia kita in koyongandon piniḻí i Allah pinongin i Kristus takin makusud bá kita in mobaḻí kapunyaan-Nea inta tongá mosumba kon i-Nia bo mogaid kon onu inta pinarenta-Nea. Lantaran ki Allah motabi,

⁵ dá sinantú-Neadon muna, kon pongin i Yesus Kristus, baḻíon-Neadon ki adí-Nea tontaní in kita. Bo tuabí in kinoibog-Nea aidan.

⁶ Dinayo-dayowdon in ki Allah inta mokawasa, sin tabi-Nea inta totok in moḷoben kon i naton pinoniata-Neadon pinongin i Adí-Nea.

⁷ Ki Kristus in minatoidon sin mopobebas kon i naton bo mongampung kon bayongan dosa.

⁸ Pinomia-Nea intua sin motabi totok kon i naton bo tabi-Nea tatua in inogoi-Neadon kon i naton takin bayongan hikmat bo pongortian.

⁹ Ibog-Neabí tontaní in nopotaau kon i naton in tomayá-Nea inta noibunipa tatua; Sinantú-Neadon kon tomayá-Nea tatua in iḷapatan-Neadon pongin i Yesus Kristus.

¹⁰ Makusud in tomayá-Nea tatua in bá bayongan in yagi-yagi inta kon soroga ande inta kon dunia naa, in motobatúdon i Kristus saḷaku tongguḷu. Bo soaḷ tatua in iḷapatandon i Allah aka aindon wakutunea.

¹¹ Bayongan yagi-yagi in pinomia i Allah pinoduduibí in ibog-Nea bo kaputusan-Nea tontaní. Nongkon pinomangkoianpamai Sia ain nomiḻí kon i naton sin ibogon-Nea kita in mobaḻídon umat-Nea sin motobatú i Kristus.

¹² Koḻigai in kita inta muna-munamai moharap kon i Kristus, modayow kon i Allah sin oaidan-Nea inta totok in moḷoben!

¹³ Moiko nion aindon nobaḻí umat i Allah wakutu in moiko nokodongog kon koyow i Allah. Koyow tatua in Habarbí Mopia inta mobogoi in kasaḷamatan kon i monimu. Moiko in nopirisaya kon i Yesus Kristus, tuamai sinontandáan-Neadon in moiko saḷaku kapunyaan-Nea. Tanda-Nea tatua in Rohobí mokudus inta pinodandi-Nea.

¹⁴ Roho tatua in nobaḻí jaminan kon kita in motarimabí kon onu inta ain pinodandi i Allah kon umat-Nea. Tanaa mobogoi in koyakinan kon i naton kon pobebasonbí i Allah in umat-Nea. Dinayo-dayowdon in ki Allah sin oaidan-Nea inta totok moḷoben tatua!

Sambayang i Paulus

¹⁵ Manangka intua naonda in kinodongoganku kon moiko in nopirisayadon kon i Tuhan Yesus, bo motabi doman kon bayongan in umat i Allah,

¹⁶ dá akuoi in tantú mopoyaput in sukur kon i Allah sin lantaran moiko. Pomuḷoi in akuoi mosambayang umuranku doman kotangoian i moiko.

¹⁷ Akuoi in mopoigum kon i Allah, inta ki Tuhan naton ki Yesus Kristus, ki Amá inta momulia totok, sinbá ogoian in Roho-Nea in moiko. Roho tatua in mopobaḻí kon i monimu mobijaksana bo poontong-Nea in ki Allah kon i monimu, sahingga in kotaauandon monimu in Sia.

¹⁸ Poigumonku doman kon i Allah, sinbá bukáan-Nea in raian monimu sahingga in mobayagdon bo komangaḻeandon monimu in onu inta motaau harapon monimu nongkon i Allah inta nogoiní kon i monimu. Bo bá kotaauandon doman monimu kon mobayongbí totok in barakat mopia inta sinadia i Allah kon umat-Nea;

¹⁹ bo moḷoben totok in kawasa-Nea kon i naton inta mopirisaya, notongkai in ropot in kawasa-Nea inta moḷoben

²⁰ inta pinaké-Nea wakutu in nomiag bui kon i Kristus nongkon kinopatoian-Nea bo nobogoi kon i-Nia in ḷoḻitúan inta totok in moḷantud, moyotakin i Allah kon soroga.

²¹ Ḷoḻitúan pomarentaan i Kristus tua in moḷantu-ḷantudbí nongkon ḷoḻitúan pomomarentaan in bayongan pomarenta, bayongan pongawasa, bayongan itoi bo bayongan tuang bo bayongan intau inta inogoian in ḷoḻitúan moḷantud; mosia inta nobiag masa in tanaa ande mosia inta nobiag moiduduimai.

²² Pinotungkud i Allah in bayongan yagi-yagi kon ḻimonag in kawasa i Kristus, bo ki Kristus inogoi kon jamaat saḷaku tongguḷu in bayongan yagi-yagi.

²³ Jamaat tua awakbí i Kristus, pinosompurna i Allah inta noposempurna in bayongan yagi-yagi kon ondaka.