DATU MITA IMITÁNEA 18 - Alkitab Singog In Mongondow Masa In Tanaa

Ki Elia bo ki Obaja

¹ Naonda in diá noonggot kon tua, kon taong nogintoḷu kon tungkuḷ in poninggai, ki Tuhan noguman kon i Elia, “Bayádon kon tayowon i Datu Ahab, diádon moonggot poonag-Kudon in uyan.”

² Dá nobuatdon in ki Elia. Kon dodai intua malarat in kaanon motoyangdon totok in kon Samaria.

³ Tuamai in ki Ahab nogoiní kon i Obaja mamangoi kon tayowonnea. (Ki Obaja in tongguḷu in mononompia kon motoḷuadí kon komaḻig. Sia in intau inta totu-totuu mosumba kon i Tuhan.

⁴ Kon dodai in ki Izebel noḻimod kon nabi mita i Tuhan, ki Obaja naa in notuḷung kon mogatut in nabi takin nobuni kon i monia kon bonu in angob – 50 in intau in kon angob tobatú – bo mobogo-bogoi in kaanon kon i monia.)

⁵ Ki Ahab noguman kon i Obaja, “Koḻigai modondaḷoi in kita kon bayongan in butá tanaa bo motayak kon bokaká andeka ongkag. Degá bo mokouḻíbí in kita kon bonok sinbá mobiagpa in kabaḷo bo bagal naton sinbá diáka bidon in kita moḻimod kon tobatúmai in bobiagon naton.”

⁶ Naonda in nosilai mako kon butá inta bain ḻibuon tatua, nobuatdon in mosia. Ki Ahab in minayá kon todaḷanan bo ki Obaja in kon todaḷan ibanea.

⁷ Kon yuak in daḷan ki Obaja noyodungkuḷ i Elia. Naonda in kinotaauannea kon ki Elia intua, sinumungkud in ki Obaja nohoromat kon inia bo noḻibó, “Totuu kon ki Amá inta ki Elia in naa?”

⁸ “Totuu, akuoi naa in ki Elia,” tubag i Elia. “Tanaa in bayádon bo potaaudon kon i datumu kon akuoi in kon naa.”

⁹ Ki Obaja in notubag, “Onu in taḷáku nodapot in ogoibí i Amá in akuoi kon i Ahab sin ḻimodon?

¹⁰ Pinodoyon kon i Tuhan inta nobiag, ki Allah inta sinumba i Amá, akuoi in moponiata kon ki datu in nopotabádon kon inakó motayak kon i amá kon bayongan in tampat. Aka kon butá tobatú pongawasanea in moguman kon ki Amá in diá in kon tua, ki Ahab in monuntut sinbá pongawasa in butá tatua mongibot kon ki Amá in totuubí kon diá noyodungkuḷ kon tua.

¹¹ Bo tanaa in ibogon i Amá sinbá akuoi in mayá kon inia bo moguman kon ki Amá in kon naa?

¹² Aka akuoi mayá nongkon naa, Roho i Tuhan in dika bo modia kon i Amá mayá in tampat inta diá kinotaauanku! Bo aka potaauku kon i Ahab kon ki Amá in kon naa, bo moiduduimai kon tua diá moyodungkuḷnea in ki Amá, yo notantú bidon kon ḻimodonneabí in akuoi. Pokotaaudon, Amá, akuoi naa in totu-totuubí mosumba kon i Tuhan nongkon nointokanpamai!

¹³ Degá diápa kinodongogan i Amá kon tungkuḷ in ki Izebel noḻimod kon nabi mita i Tuhan, yo 100 nongkon i monia in binuniku kon bonu in angob – 50 in intau in kon bonu in angob tobatú – bo nobogoi in kaanon bo inumon?

¹⁴ Tanaa, nongonu sin ki Amá in mopotabábí kon inakó mayá mopotaau kon i datu kon ki Amá in kon naa? Notantú bidon kon ḻimodonneabí in akuoi!”

¹⁵ Ki Elia in notubag, “Pinodoyon kon i Tuhan Inta Totok in mokawasa inta inundoiku, akuoi in modandi kon mamangoibí tontaní kon tayowon i datu singgai in naa doman.”

Ki Elia bo nabi mita in Baal

¹⁶ Dá minayádon in ki Obaja nopotaau kon i datu, bo ki Ahab in nobuatdon sin mokipodungkuḷ kon i Elia.

¹⁷ Kon dodai in ki Ahab nokoontong kon i Elia, ki Ahab nomaḷú, “Naa in sia mononuyayow kon i Israel!”

¹⁸ “Akuoi in deemanbí mononuyayow,” tubag i Elia, “táe ki tuang datubí tontaní. Ki Tuang datubí bo motoḷuadí i Tuang datu in mononuyayow. Pinongin mosumba kon berhala mita in Baal, Ki Tuang datu in iḻimimpatdon kon parenta mita i Tuhan.

¹⁹ Tanaa, parentaaidon in bayongan rayat in Israel sin moyodungkuḷku kon Buḷud in Karmel. Dia doman in opat nogatut bo ḻima nopuḷú in nabi Baal bo opat nogatut in nabi i Dewi Asyera tatua inta inuboḻian i Izebel ki buḷoi datu!”

²⁰ Dá pinotabádon i Ahab in bayongan rayat bo nabi mita in Baal tatua minayá in Buḷud in Karmel.

²¹ Bo ki Elia in dinimiug kon rayat tatua bo noguman, “Dapotpa in toonu in moiko umuran motoḻindua in gina? Aka ki Tuhan tua in Allah, yo sumbadon in ki Tuhan! Aka Baal tatua in Allah, yo sumbadon in Baal!” Rayat inta noyosipun kon tua in tongádon kibio-biómai.

²² Onda intua nogumandon in ki Elia, “Kon sigad in nabi mita i Tuhan tongádon akuoi in nobiag, bokaká kon naa in 450 in nabi Baal.

²³ Tanaa in diádon mangoi in sapi koḷakian doyowa. Potabádon in nabi Baal mita tatua mogamá kon tobatú bo ratáan, onda intua yingaton bodongka ukaton kon tudu in kayu pododungú. Táe mosia in diábí motaau in mopoyongkit in tuḷú kon tua. Sapi inta tobatú kon sigadnea tua in sadiaanku doman natua. Rataanku bo yingaton intua bo ukaton doman intua kon tudu in kayu pododungú, táe akuoi in diábí doman mopoyongkit in tuḷú kon tua.

²⁴ Pomayádon mako in nabi mita in Baal tatua mosambayang kon dewa monia, bo akuoi in mosambayangbí doman kon i Tuhan inta motubag takin mopoangoi in tuḷú, yo Siabí tua in Allah.” Bayongan in rayat notubag takin tosingogon inta moropot, “Moibog!”

²⁵ Bo ki Elia in noguman kon nabi Baal mita tatua, “Popisí in moiko in nobayong, dá pomiḻídon muna in moiko kon sapinea bo posadiadon, táe dikabí mopoyongkit in tuḷú kon kayunea. Mopaḷut mako kon tua posambayangdon kon i ilahmu.”

²⁶ Dá nomiḻídon in mosia kon sapi tobatú bo sinadiadon. Nopaḷut mako kon tua mosia in nosambayangdon kon i Baal nongkon doḷo-doḷom nodapot in noutu in singgai sindaḷan momaḷu-maḷú, “Tubagaidon in kami, Baal!” Inaidan monia intua poḷat doman motayok bo moḻibu kon mezbah monia. Táe totokbí in diá in tubagnea.

²⁷ Naonda in noutudon in singgai momangkoidon in ki Elia noningkuḻe kon i monia. “Koropotdon totok in mosambayang! Sia tua kan ilah? Degá yogot in sia mongamang, andeka minayá sinumapang. Andeka degá kon daḷanpa in sia! Andeka degá noḷoḷotpa, bo mustipa guḷungon monimu in sia!”

²⁸ Nabi mita tatua in nosambayang bo kinodugangandon in ropot in singog monia. Bo ná inta biasamai aidan monia, mosia in moponggaresdon in pitow bo pandong kon awak monia dá dugú in mototaitdon.

²⁹ Natuata in inaidan monia nodapot in ḷoḷabungnea naonda bo intau inta kinotapanan. Táe diábí doman in notubag, diábí in noindoimai.

³⁰ Bo ki Elia in nogumandon kon bayongan in rayat tatua, “Koḻigai pokodiug!” Mosia komintan noyosipun kon ḻibuneamai, onda intua nomangkoidon in sia nonompiamai kon mezbah i Tuhan inta ain norumbun.

³¹ Nogamá in sia kon batu mopuḷú bodoyowá, batu tobatú mobaḻí toḻiu in suku doman tobatú inta buí i Yakub, intau mita inta ain sinangoi Israel i Tuhan.

³² Batu mita tatua in pinomia bui i Elia mezbah tampat posumbaan kon i Tuhan. Kon ḻibu in mezbah tatua kinaḻiannea doman in got inta mobaḻídon in koḷobennea dá mokosipundon kon tubig degá mopuḷúmai bo ḻima noliter.

³³ Ginuntuḷneadon in kayu pondungú kon tudu in mezbah, bo sapi inta tobatú tatua in iyinga-yingatneadon bo inukatnea kon tudu in kayu tatua. Onda intua noguman in sia, “Bonuaidon in tubig kopuḻing in tampayang opat, bo popobutakdon in tubig tatua kon tudu in sosumba kuruban bo kayunea.” Naonda in nopaḷutdon inaidan monia intua,

³⁴ Bui in sia noguman, “Komintanpa doman,” bo inaidan monia bui. “Komintanpa doman”. guman i Elia, bo inaidan doman monia bui.

³⁵ Dá noiḻigdon in tubig kon ḻibu in mezbah tatua nodapot in gotnea nopuḻingdon in tubig.

³⁶ Naonda in orasdon moposumba in kuruban ḷoḷabungnea, ki Nabi Elia in dinimiug kon mezbah tatua bo nosambayang, “Oo Tuhan, Allah inta sinumba i Abraham, i Ishak bo i Yakub, poniatadon in tanaa mako kon Ikobí in Allah kon Israel, bo akuoi naa in mogogundoi-Mu. Poniatadon doman kon bayongan inta pinomiaku naa in parenta-Mubí.

³⁷ Tubagaidon, Tuhan! Tubagaidon in akuoi sinbá kotaauandon in rayat mita tanaa kon Iko, o Tuhan, in ki Allah, Ikobí doman inta momaḻí kon i monia mobui mangoi kon ini-Mu.”

³⁸ Bo pinopoangoidon i Tuhan in tuḷú nongkon ḷangit bo nomokak kon kuruban tatua takin kayunea mita, batunea mita bo butánea nodapot in tubig kon gotnea in nodaitnea dinilá.

³⁹ Kon dodai in rayat mita nokoontong kon tua mita noitungkudon in mosia kon butá poḷat noguman, “Ki Tuhan tua in Allah! Totuu kon ki Tuhan tua in Allah!”

⁴⁰ Dá nogumandon in ki Elia, “Domok in nabi mita in Baal tatua! Dika pomayá mako in tobatúmai in mokoḷagui!” Bo intau mita in nodomokdon kon nabi mita in Baal tatua, onda intua dinia i Elia in mosia kon Ongkag in Kison bo iḻimodnea kon tua in mosia komintan.

Poninggai nopaḷut

⁴¹ Nopaḷut mako kon tua ki Elia in noguman kon i Datu Ahab, “Tanaa in mopia aka ki Tuang in mayádon mongaan! Topípa bo monguyandon, sin kodongogandon in gonugurnea.”

⁴² Bo ki Ahab in minayádon nongaan, bo ki Elia in notakod kon tudu in Buḷud in Karmel. Kon tua sinumungkud in sia noidapot in pogotnea kon butá kon sigad in duḷudnea doyowa.

⁴³ Bo sia in noguman kon bobantungnea, “Potakodon kon tudunea totok bo indoidon ná dagat.” Bobantungnea tatua notakod, bo nobui noguman, “Diábí onu bo onu in inontongku.” Nodapot in kopitu in ki Elia in nopotabá kon bobantungnea tatua nosiḻig notakod sin mayá moindoi.

⁴⁴ Kon impitunea bobantung tatua in nobui bo noguman, “Akuoi in nokoontong kon goḷom ná koḷoben in paḷad namangoi nongkon dotá in dagat.” Dá ki Elia in noguman kon bobantungnea, “Bayádon kon i Datu Ahab, pokipoponikaidon in sia kon keretanea bo mobui sinbá diápa in sia kotambakan in uyan.”

⁴⁵ Tongádon tokokiap monag ḷangit nonggoḷomdon totok, bo tompot moropot nogirup bo uyan morogot nomangkoidon noḷabú. Ki Ahab in sinumakoi kon keretanea bo nobui kon Yizreel.

⁴⁶ Kon dodai intua ki Elia nokouḻí kon ropot nongkon i Tuhan. Nongopí in sia kon jubahnea pinodamonik bo pinopotogotnea kon ogotannea bodongka noribatuk inumuna kon i Ahab kinoouput in daḷan nodapot kon bonawang in kotá Yizreel.