DANIEL 8 - Alkitab Singog In Mongondow Masa In Tanaa

Oontongon i Daniel: domba koḷakian bo bembé koḷakian

¹ Kon taong intoḷunea kon pinomarentaan i Datu Belsyazar, akuoi in bui nokoontong kon oontongon nogindua.

² Kon bonu in oontongon tatua inontongku in awakku in kon propinsi Elam, kon Susan, ibukotá in Persia. Akuoi in sinimindog mako kon diug in Ongkag in Ulai,

³ bo kon bingkí in ongkag tatua inontong in domba koḷakian tobatú inta tungoinea in doyowa mongobanat, tobatú in mobana-banat bo mobagu-bagu kon inta ibanea.

⁴ Inontongku in domba koḷakian tatua nonungoi ná dotá in toyopan, utuan bo toḷatan. Diá tobatúmai in mahaḷuk in mokotahang tumayow kon inia andeka mokoḷagui nongkon kawasanea. Sia in mogaid kon onukabí in koibognea bo nobaḻí moḷoḷatú.

⁵ Koyogot in inindoianku mako, inontong domandon in bembé koḷakian tobatú noribatuk mako nongkon dotá in toyopan iḷumopot kon dunia. Totuu moḻikat in pororibatuknea nodapot in diádon moiritak in butá. Kon sigad in matanea doyowa oyúon in tungoi inta noiḷontú.

⁶ Bembé koḷakian tatua dinimiug kon domba koḷakian inta inontongku kon bingkí in ongkag tatua, bo nondangat kon inia takin torú.

⁷ Sinaridiku sia in nondangat kon domba koḷakian tatua. Totok in sinumorú in sia dá nondangat kon domba koḷakian tatua bo nomutoḷ kon tungoinea doyowa. Domba koḷakian tatua diá nokopongonu in nonayow kon inia. Noigambat in sia kon butá bo totok in iruntai, bo diá tobatúmai in intau in mokotuḷung kon inia.

⁸ Bembé koḷakian tatua kodugang-kodugang in koḷobennea. Táe naonda in sia noidapotdon in totokan in kawasanea, noputoḷdon in tungoinea inta noḷoben tatua, bo kon tampat tatua nomuká in tungoi opat inta noiḷontú, kon batúannea posibayá in kinotundúannea.

⁹ Nongkon tungoi tobatú nomukádon in tungoi nointok, inta nobaḻí totok in noḷoben bo kawasanea iḷumoben nopobayá ná toḷatan, ná pomukaan bo nopobayá ná butá inta nopia.

¹⁰ Tungoi tatua in kodugang-kodugang in koḷobennea nodapot in tugatdon ponayow kon tontara in soroga tuata in tundi mita, nodapotbí in tongonumai in kon sigadnea pinogambatnea kon butá bo totok in iruntainea.

¹¹ Nodapotbí in sia nonontot kon itoi in tontara in soroga, nopogogai in kuruban sosumba muḷoi in singgai inta pinosumba kon itoi in tontara tatua, bo nogumpag kon baḷoi pososumbaan kon inia.

¹² Bo intau mita kon tua nomangkoidon nogaid kon dosa bo diádon noposumba in kuruban mita inta ain sinantú posumba tatua. Dá ibada inta noitutui in pinogambatdon kon butá. Tungoi tatua in nokoaid kon bayongan inta kinoibognea.

¹³ Onda intua dinongogku in malaekat tobatú in noguman kon malaekat ibanea mako, “Modapot degá in toonu in bayongan inta inontong kon oontongon tatua mobaḻí? Modapot in toonu in dosa moḷoben tatua monoḻiu kon sosumba muḷoi in singgai? Modapot in toonu in tontara in soroga bo baḷoi pooibadaan tatua runtaion?”

¹⁴ Dinongogku in malaekat tobatú ibanea in notubag, “Modapot in toribu bo mogatut bo ḻima nopuḷú nosinggaipa. Kon dodai intua kuruban muḷoi in ḷoḷabungnea bo muḷoi in doḷo-doḷom diápabí posumba. Bain mopaḷut mako kon tua bo baḷoi pooibadaan tompiaandon bui.”

Ki Malaekat Gabriel noginsilang kon mangaḻe in oontongon tatua

¹⁵ Kon dodai in akuoi moḷongasimai monotaau kon mangaḻe in oontongon tatua, daḻídon noisindog magí kon tayowonku in naonda bo intau.

¹⁶ Dinongogku in singog inta nomaḷú nongkon ḷoḷan in Ongkag in Ulai, kainia, “Gabriel, insilangaidon kon inia in mangaḻe oontongon tatua.”

¹⁷ Bo ki Gabriel inta sinimindog kon tayowonkumai tatua dinimiug kon inakó. Akuoi in inangoiandon totok in ondok, dá noumpag in akuoi. Guman i Gabriel kon inakó, “Ei intau mato-matoi, mustibí kotaauanmu kon oontongon tatua in mopoontongbí in inta mobaḻí kon singgai tumi.”

¹⁸ Koyogot in sia mosingogmai, notambuḷoḷok in akuoi. Táe kinadaiannea in akuoi bo sinuḷungan pinosindog bui. Bo sia in noguman,

¹⁹ “Akuoi in mopotaaubí kon inimu onu in mobaḻí kon singgai moiduduimai saḷaku bungai in torú i Allah. Sin oontongonmu tatua in mogumanbí kon onu in mobaḻí kon singgai tumi.

²⁰ Domba koḷakian inta inontongmu tatua, inta kotungoi doyowa, nobaḻí lambang in dodatuan in Media bo Persia.

²¹ Bembé koḷakian tatua in nobaḻí lambang in dodatuan Yunani, bo tungoi inta noiḷontú kon sigad in matanea doyowa tatua in dodatuannea inta muna.

²² Tungoi opat inta nomuká naonda in tungoi muna noputoḷ, tua in mangaḻenea kon dodatuan in Yunani in mosila-silaidon mobaḻí opat nododatuan, táe tobatúmai in diábí in ná koropot in dodatuan inta dungkuḷ tatua.

²³ Kon tungkuḷ in kopaḷutandon in dodatuan mita tatua, aka aid moraat moiḻiudon, dá moiangoidon in datu tobatú inta motogat in uḷu bo mopandoi monguboḷ.

²⁴ Sia in mobaḻíbí moropot totok, táe deemanbí noidoyon kon ropotnea tontaní. Sia in mopoangoibí in inta mokoyopú inta mokokoningkim bo onukabí in aidannea kodapotanneabí. Sia in momutúbí kon intau mita inta motorindog bo umat i Allah.

²⁵ Popisí in sia moakaḷ, uboḷnea mita in mobaḻíbí. Sia in ḷumoḷatúbí, bo diábí in sia muna mobogoi in tompoingat momutú in sia kon mobayong in intau. Nodapotbí in sia mokobaḻí in monayow kon i Datu Inta Totok in moḷoben. Táe sia in rimumudonbí deemanbí mopomaké in ropot in intau.

²⁶ Oontongon soaḷ kuruban muḷoi in ḷoḷabungnea bo muḷoi in doḷo-doḷom inta ain ininsilangan kon inimu tatua, in totu-totuubí kon mobaḻí. Táe tua komintan in mobaḻíbí kon singgai moiduduimai inta moonggotpa; dá dikadon oumanon kon i ineka.”

²⁷ Onda intua noḷungkoyódon in akuoi bo notakit tongonumai nosinggai in koonggotnea. Nopaḷut mako kon tua nobangondon in akuoi bo buidon nogaid kon oaidanku mita kon i datu. Táe moḻia-ḻiaw in ginaku in moraimai kon oontongon mita tatua bo diá mokomangaḻe.