DANIEL 5 - Alkitab Singog In Mongondow Masa In Tanaa

Ki Datu Belsyazar ki adí ḷoḷaki i Nebukadnezar nomia kon bobutungan

¹ Kon singgai tobatú ki Datu Belsyazar nogoiní kon intau moḷoben toribu sin mamangoi kon bobutungannea inta mooyúon totok, bo noronginumdon kon anggur.

² Koyogot in mosia nonginumai, ki Belsyazar in nokigamá in palo mita buḷawan bo saḷaka, inta ain inagow i Nebukadnezar, ki amánea, nongkon Baḷoi i Tuhan kon Yerusalem. Makusud i Datu Belsyazar in bá intau mita moḷoben, ki buḷoinea mita, bo pahangnea mita bo sia doman tontaní, in monginum kon palo mita tatua.

³ Dá ḷagidon dinia mangoi kon inia in palo mita tatua, bo mosia komintan in nonginum kon anggur nomaké in pakakat mita tatua.

⁴ Koyogot in monginum mosia in sindaḷan doman modayow kon dewa mita inta pinomia nongkon buḷawan, saḷaka, bitú, kayu bo batu.

⁵ Bo daḻídon inontong in ḻima in intau inta nomais kon dinding tobatú in komaḻig kon tampat inta totok in nobayag kinotugatan in bayag in togá, dá inontong nosilang totok i datu.

⁶ Nobilaidon totok in sia bo nádomai tua in ondoknea nodapot in nourotdon totok in duḷudnea.

⁷ Bo nomaḷú totok in sia in nopoigum sinbá mononanow, mototaau bo intau inta nonotaau totok in bobayá in tundi in oiníon. Naonda in mosia namangoi, ki datu in noguman, “Ki ine in mokobaca kon pais tatua bo mopotaau in mangaḻenea kon inakó, yo ogoianku in pakeang dodatuan ná jubah nokamumu bo boboḷ buḷawan nobaḻí tomponuot kahoromatan. Koḻikud intua sia in duíonku mobaḻí mongongawasa intoḷunea kon dodatuanku.”

⁸ Intau mita mongopandoi minayá inumuna, táe diá tobatúmai in nongkon sigad monia in mokobaca kon pais tatua andeka mopotaau in mangaḻenea kon i datu.

⁹ Ki Datu Belsyazar inagíandon in ondok bo nobilaidon bui; bo intau moḷobennea doman mita totokdon in notoboḻingo.

¹⁰ Nokodongogmai kon karak mita i datu bo in intaunea mita moḷoben, ki iná i datu sinumuot kon yuang bobutungan tatua. Bo sia in noguman, “Mobiagdon in ki Tuangku modapot in mononoi! Pokoonow in gina i Tuangku bo dikabí mobilai.

¹¹ Sin kon bonu in dodatuan i Tuangku oyúon in ḷoḷaki tobatú inta kinawasa in dimukud in dewa mita inta motusi. Kon dodai in pinomarentaan i amá i Tuangku, noniatadon kon intau tatua in totok mopandoi, momangaḻe bo kohikmat, inta naonda bo hikmat in dewa mita. Ki amá i Tuangku ki Datu Nebukadnezar ain noduí kon inia nobaḻí itoi in mogogoiní kon dimukud, mototaau bo in intau mita inta mobayong in sinotaau bo inta nonotaau in bobayá in tundi.

¹² Sia diá in poḻiuan kopopandoi bo kobobijaksana bo motaau domandon totok in moginsilang kon mangaḻe in togoindop, mobuká kon onu inta noibuni bo moguman kon onu mita inta mororiga raion. Tangoinea in ki Daniel, táe dinonoi i datu ki Beltsazar in sia. Oiní in sia. Sia in mopotaaubí kon i Tuangku onu in mangaḻe in pais tatua.”

Ki Daniel noginsilang kon mangaḻe in pais tatua

¹³ Dá ḷagidon dinia kon tayowon i datu in ki Daniel. Bo ki datu in noḻibódon kon inia, “Iko degá in ki Daniel, intau in Yahudi inta iḷumbú, inta ain dinia i amáku nongkon butá in Yohuda?

¹⁴ Dinongogku kon iko in kinawasa in dimukud in dewa mita inta motusi, bo iko in inogoian in pandoi, pomomangaḻe, bo hikmat inta diá in poḻiuan.

¹⁵ Intau mita mongopandoi bo mototaau ain nonungkuḷ nobaca kon pais tanaa bo mopotaau in mangaḻenea kon inakó. Táe diá nokobaca in mosia.

¹⁶ Bo bagu dinongogku kon iko in mokobukat kon bayongan inta noibuni bo mokopotaau doman kon onu inta mororiga mita raion. Aka iko mokobaca kon pais tanaa poḷat mokopotaau kon mangaḻenea kon inakó, yo iko in ogoianku in pakeang dodatuan ná jubah nokamumu bo boboḷ buḷawan nobaḻí tomponuot kahoromatan. Koḻikud intua iko in baḻíonku mongongawasa nogintoḷu kon bonu in dodatuanku.”

¹⁷ Ki Daniel in notubag, “Ki Tuang in diábí paraḷu mobogoi in tombuinag mita tatua kon inakó, ogoidon intua kon intau ibanea. Bacaankubí in pais tatua kon i Tuangku poḷat mopotaau in mangaḻenea.

¹⁸ Ki Allah Inta Totok in moḷantud nomaḻí kon i Nebukadnezar ki amá i Tuangku nobaḻí datu moḷantud bo nobogoi kon inia in koḷoḷoben bo ponango-nangoian.

¹⁹ Totuu moḷoben in sia, nodapot in intau mita nongkon bayongan in bangusa, inanakan, bahasa, mourot bo moondok kon inia. Aka moibog in sia moḻimod kon intau, ḻimodonneabí doman mako in intau tatua. Aka moibog in sia moposaḷamat kon intau, dá posaḷamatonneabí doman in intau tatua. Sia in mopoḷantud andeka mopoompá kon i ineka podudui in ibognea.

²⁰ Táe naonda in sia iḷumoḷatú, motogat in gina bo moḻingá iḷabú in sia nongkon pomomarentaan dodatuannea dá noinggamádon in kahoromatannea.

²¹ Pinoguntun in sia nongkon sigad in intau bo ginanea in nobaḻídon ná gina in mahaḷuk. Sia in nobiag takin in keledai in kayuon, mokaan kon bonok naonda bo sapi bo mosiug kon rawang inta diá in oḻi-oḻingoinea dá nobuntad in oḷú. Kon imbuitnea sia in nongaku kon ki Allah Inta Totok in moḷantud in kitogi kawasa kon dodatuan in intau bo dodatuan tatua in ogoi-Nea kon i ineka in piḻíon-Nea.

²² Táe ki adínea ḷoḷaki, inta ki Tuangku tontaní, in doí tumonsiup, umpaka kinotaauandon i Tuangku in tua komintan.

²³ Ki Tuangku in dinumodia kon i Tuhan kon soroga bo nokobaḻí nokidia mangoi kon naa in bayongan palo mita inta ain inagow nongkon Baḷoi i Tuhan. Bo ki Tuangku takin intau mita moḷoben, bo ki buḷoi mita i Tuangku takin pahang mita i Tuangku in nonginum nomaké in palo mita tatua. Ki Tuangku in nodayow kon dewa mita inta pinomia nongkon buḷawan, saḷaka, bitú, uatoi, kayu bo batu, dewa mita inta diá mokoontong andeka mokodongog andeka momangaḻe kon onuka. Ki Tuangku in diá mohoromat kon i Allah inta nonantú kon kobiagan bo kopatoian i Tuangku bo inta monantú kon daḷan kobiagan i Tuangku.

²⁴ Tuamai in ki Allah nopotabá mangoi in ḻima tatua sin momais kon koyow-Nea.

²⁵ Naa in pais tatua. ‘Iniap, iniap, sinimbang, sinilai.’

²⁶ Bo naa in mangaḻenea: Iniap, sempo in pomarentaan i Tuangku ain iniap i Allah bo sinimpodandon;

²⁷ sinimbang, ki Tuangku in sinimbangdon bo nouḻí magí diá mokoorop;

²⁸ sinilai; dodatuan i Tuangku in sinilai bo inogoi kon intau in Media bo Persia.”

²⁹ Dá ḷagidon in ki Belsyazar nomarenta kon pogawainea mita sinbá mopopaké in jubah nokamumu kon i Daniel bo mopoboboḷ in boboḷ buḷawan kon sigogownea. Bo dinuínea in ki Daniel nobaḻí pongawasa nogintoḷu kon bonu in dodatuannea.

³⁰ Kon doḷom doman tatua kinoḻimodandon in ki Belsyazar datu in Babel tatua.