AMSAL 10 - Alkitab Singog In Mongondow Masa In Tanaa

Tonggina mita i Salomo

¹ Naa in tonggina mita i Salomo: Adí inta mobijaksana in mokoyunggagá kon gina i amánea; adí inta bodok mokororiga kon gina i inánea.

² Kaoyúonan inta nouḻí pinongin tombogá diábí mobogoi in kauntungan; táe, gina motuḻid in mokosaḷamat.

³ Ki Tuhan in diábí mopomayá mako in intau mopia in gogoyon; táe sia in moḷamboibí kon intau moraat sinbá diá in intau tatua mokouḻí kon onu inta kinoibognea.

⁴ Intau maḷat in mobaḻíbí mororiga; intau inta morajing in mobaḻíbí mooyúon.

⁵ Intau mobijaksana in mosipunbí kon bungai in boyónea kon semponea, táe intau inta tongá mosiug kon sempo in posipunan kon bungai in boyó, mokopooyábímai kon inia tontaní.

⁶ Intau mopia in mokouḻíbí kon barakat. Aid moromú noibuni kon tosingogon mita in intau moraat.

⁷ Monanob kon intau mopia in mobaḻíbí barakat, táe intau moraat in baḷúdon koḻiongan.

⁸ Intau inta mopandoi, moibog motarima kon tonggina; intau inta tongá kino singo-singognea in moiḷangkambí.

⁹ Intau motuḻid, moaman in kobiagannea; intau inta monguboḷ in kotaauanbí.

¹⁰ Ki ine in mobuni kon inta moitutui, mokopomuká kon roriga; ki ine in monoboḷow moyogintayow mako, moḷongasi mopoangoi in kobiagan motompia.

¹¹ Pososingog in intau mopia mokopoangoi kon kobiagan mopia, táe kon tosingogon mita in intau moraat noibuni in gina inta moromú.

¹² Yaat in gina mokopomuká kon ropatoi; totabian mongampung kon bayongan in taḷá.

¹³ Intau inta mopandoi in pororainea mopoyaput in tosingogon mita inta mobijaksana; intau bodok paraḷubí ḷubagon.

¹⁴ Intau mobijaksana mosipun kon ilimu; aka intau bodok mosingog, sia in mokopopisí kon bodito.

¹⁵ Kaoyúonan moḷukad kon inia inta nooyúon, malarat morimumud kon inta nobogá.

¹⁶ Aka mogaid kon inta mopia, yo tontuḻínea in kobiagan mosanang; aka mogaid kon dosa, yo bungainea in modugang mobayong in dosa.

¹⁷ Ki ine in mokidongog kon toboḷow yo mobiag motompia, ki ine in mooyá in mongaku kon taḷá yo kon bonudon in bodito in sia.

¹⁸ Intau inta mobuni kon yaat in gina yo sia in intaubí mouboḷ. Intau inta moponapud magí mako in uboḷ in intaubí dondunguḷ.

¹⁹ Mobarong in singog, mokodugang doman kon dosa; intau inta mokoḷukad kon dilánea in mobijaksana.

²⁰ Tosingogon in intau mopia naonda bo saḷaka taakan; raian in intau moraat diá in mangaḻenea.

²¹ Tosingogon in intau inta mopia, in mobaḻí barakat kon intau mobayong; kobobodok in intau bodok in moḻimodbí kon inia tontaní.

²² Tongábí popisí in barakat i Tuhan dá intau in mobaḻí mooyúon; simiḷopí totok diábí mokodugang kon kaoyúonan.

²³ Intau bodok mopia in ginanea in mogaid kon moitaḷá; intau mobijaksana morajing motayak kon hikmat.

²⁴ Intau inta motuḻid in gina mokouḻí kon onu inta sinayaknea; intau moraat mokouḻí kon onu inta totok in kinoondoknea.

²⁵ Aka deḷang mondangat, moyopúdon in intau moraat; táe intau inta motuḻid in gina in umuranbí moroton.

²⁶ Dika mopotabá kon intau maḷat, tongábí in sia mokonapusu, naonda bo boil mokonilu kon ingipon andeka poyok mokopomporí kon mata.

²⁷ Horomatbí in ki Tuhan, dá moonggot in kobiaganmu; intau moraat matoi deemanpa wakutunea.

²⁸ Kamang in intau mopia mokopobaḻí kon inia mosanang; kamang in intau moraat diá in batainea.

²⁹ Ki Tuhan in moḷukad kon intau motuḻid in gina, táe moyopú kon intau inta mogaid kon inta moraat.

³⁰ Intau motuḻid in gina in mobiag moaman bo motompia; intau moraat in diábí mogutun kon butá inta inogoi kon inia.

³¹ Intau motuḻid in gina mopoyaput in tosingogon inta mobijaksana; intau moraat in pinomponan in bibignea.

³² Tosingogon mita inta motuḻid mokosanang kon gina; tosingogon mita in intau moraat umuran mokonakit.