ZEFANYA 2 - Allah Wene Fano Wene Hupla Inane

Weak hilingiti lagep mene andoma herakfisani iluk yagaisasikhe wene

¹ Yago, hit afuni hinunggulenu yi mene hinenggali legengge hilingirik laga-lagep mene yi sani,

² hit hinebe owil-owilengge higit oan sawet agik, puk agik, igi'lek logolik he hinobabut hebelini o. O linggene Tuhan nen anini lagali'lago mene andi oan asi wagi'lek werek kwelek inom, nen Tuhan a'mage lagagu werek mene andi hinoba fei wagi'lek werek kwelek inom, wenggel hikhi logoni o.

³ Yago, hit afuni o kweang yiba welagep mene nen hinendawinggen sebelfakhaluk hilingiti lagep mene inom, nen Tuhan Awene melalek hologo hilingiti lagep mene inom, sugulogo Tuhan ambit waga logoni o. At elokhoma sebe iluk At endawimo anggikherek mene nek hilingiti logoni. A'nogo hilingisugun halok he, At Tuhan awi mondok anini oba louksek awi a'nogo weinamet fei wesigin sambul andi re hit hinagap telhinabigin logou hak.

It afuni inunggulenu amu mene it Israel inap inera'lukwe horok-horokwe werek mene andoma homan ikfisasikhe wene

⁴ O kota Gaza oba andoma re ap misigiluk ogo ekhe herakfogoin lek. O Askelon he afuni werek le'ma re olun enek to igin. Afuni Asdod mene re lingge andindu werek kwelek misik sambul ferekhogoat inoasi kwi wesumo re mugusogo wulakfisogoin, nen it afuni Ekron mene re it inawi kota andoma nen wilibini iluk, mugisogo lakfisogoin.

⁵ Hit afuni Filisitin hinap hinebe i esanggo kwe welagep mene andoma homan ugu logoni o. At Tuhan nen he hit hinoba wene feigiluk fik foukhogo hilingfikhesik werek. Aren he hit hinebe mondogat leget hinobagaumo ap misigiluk ogo ekhe agap teligin lek.

⁶ Hit hinawi i laut horok-horokwe andoma re engga lei enek hilinglasigin, nen it ap domba konharek mene gembala inawi inom o sabu inom andoma wurogoin.

⁷ It afuni Yehuda mene fena endebengge wulibugun mene re hinawilokwe andoma logogun. Iren he inanggo kwe andoma konhi logolik o hubagunem it afuni Askelon mene inawilokwe andoma nogokhi logogun. Andi re it ineisena Tuhan Allah nen awe a'ma ferinarek were'ma, it inebeba inom inangge yi mene ti meneba inom hobuk ambotkwe fanotfisugunem he sik-pikhogo mondok logogun andi.

⁸ Tuhan Omame Mondok Hokho Mene a'nogo nen ikhi logolik he, ”It afuni inunggulenu Moab mene inom, Amon mene inomen he An nagainafuri li'norinafi logolik pilibinabi'lagwi mene andoma An mondogat nesanggo holhi o. It An nagainafuri inanggweang omanogo teluogeluk he inane nen lalinafi lagaikha.

⁹ An Nebe afuni inunggulenu Israel mene ineisena Allah, Nebe Neluk Mondok welagirek mene a'nogo nen enggere, An nen o Sodom inom Gomora inom oba hilingfesigi hakhogo it Moab inom, Amon inom ogore a'nogoat hilingfisamo pugulasugun o. O kweang andomaba re eluge agai mogo yenggelekwe hokhorogo were'ma o meisalek kabok lagakhi logogin kwe omanogo re engga weak mene wulibik logogin. Nen, it An nagainafuri mene fena endebat linet lasimbik wulibugun mene nen he, afuni o andoma werek mene telambik he, it inaiba andoma sebelambik logogun o,” iluk ikhe isikhe.

¹⁰ It afuni Moab mene inom, Amon mene inomen inonggwarek leget fakhigik, winik-wonok igik, nen At Tuhan Omame Mondok Hokho mene a'nogo againafuri omanogo sebelogo fisikhi lagaukwa andiba re unggum a'nogo inoba fagain andi.

¹¹ Tuhan nen he, it inebe inailonek asuageluk hilingfisagain. Aren he, kembu Dewa o kweangma werek mene andoma mondogat wolelenggenhogo lakfisagain. A'nogo hilingfisamo re yi afuni ti afuni inunggulenu lombogen he, Tuhan obaget inonggwarek inailokwe lombogen hilingiti logogun.

¹² Andi nen afuni Sudan mene ogore Tuhan nen unggum wa'lagaikharek mene inoba fagainat.

¹³ A'nogo hilingfisambik he, At Tuhan omameba re, Asyur wolelenggenhogo fagain. O kota Niniwe re, afuni inareng tiring-terengse'ma lei enek pirimse'ma hilingisogo fagain.

¹⁴ O andoma re, loboteregengge esa ulukhogo inom yi wam ti wam amu-amu mene wengik logolik set warikhi logogun. Sue amu-amu arue re olunkwe andoma awi wurik logolik he, o jendela folelekwe andoma nen inane humeti logogun. Sue pel hangge mene re, kwe sou hurikwe andoma nen ane pararak eti logogin, e sin oak o kota andi bene wurik logogin mene omanogo mondogat wokhigik helogoin.

¹⁵ A'nogo o kota mondok inagaiyekhogo logolik fani-fanorogo logogun anggagarek mene andoma inoba a'nogo hilinglasigin. Afuni andoma logogun mene nen anggikhi logolik he, it inawi kota andi re kota amukwe o kweangma yoma werek mene nen he kota andi nek hokho mene werek anggagarek awi a'nogo. Oba nen he o andoma afuni le'ma we yi mene ti mene enggama mene nek he andoma inawi wurogo logogun! Afuni o kota andi kwe laga logogun mene nen he ineilenggen haluk youk laluk he inamel-mel eti logogun.