ZAKHARIA 11 - Allah Wene Fano Wene Hupla Inane

Ap inobabut mondok weak logolik lalinafi lagaukwa mene omanogo pelaginafikhe wene

¹ Hat Libanon yi re, hagayo laik andoma endu noakhogo re, hanggwe sou andoma hutfilik lan o.

² Hat sin yi re, hagayo weile omanogo mondogat erembul nagulik lagangge re, le aga logoin o. Nen e obakhe hokhondek mene omanogo re mondogat tukumerik lagama werego. O Basan oba e hokhondek mene inom, nen engga ogoi hokho mene omanogo mondogat inom he, tagalogo kweangma mondogat lobaget fagama werek andi nen he, le aga logoin o.

³ It inomame werek inap omanogo re inenggi omameba hilinginafi lagaikha mene a'nogo mondogat lek agama, le ari'lagwi a'li holini o! I Yordan som mene singa inebe welagaikharekwe omanogo re, mondogat weak agama inane kouwari'lagwi a'li holini.

Gembala inebe pire mene faget isikhe wene

⁴ Tuhan Allah nen an noba ikhi logolik, ”Hat hobabut he ap gembala nen inanggo domba warogo senggelhu mene faget halhu mene logolik hilingitarek hak hilingiti logoino.

⁵ It afuni onggo palharek mene omanogo nen he inanggo domba omanogo wasuogeluk he nit weak hilingisugun iluk mel wenggelhi'lek hilingitarek, nen it afuni domba eino onggo wanuogeluk hilingiti logolik he, yi'nogo agarek, ’Yogondak he nit ninenggi werek agonggere Tuhan fogerasuok!’ iluk agarek. Nen it gembala-gembala domba eisewerek mene omanogo nen he inendawirati'legengge nen hilingitarek andi.

⁶ An nen he afuni o kweang yiba werek mene oma re ap misik iluk ogo nendawi hundik hilinginabigin lego. An nen afuni kweang yiba werek mene andoma mondogat he it inogogwi inenu werek mene oma inenggiba fagain. A'nogo inenggiba foumo re iren o kweang ari mondogat weagerogo fugunem he, it enggimo nen An nen nekhengge telogo wanigin mondok lego,” iluk ikhe.

⁷ An Zakharia nebe, it domba onggo palharek inap omanogo nen domba watu mene omanogo halhi logouwageluk onggo palnafa. Nen, an nandomuk he ebe pire mene were'ma re, ekhe enu, ”Endawi fano” salhigi, nen ekhe re, ”Hele homago” salhi. A'nogo salhirik he an nen domba omanogo halhu mene erorati.

⁸ An nen a'nogo halinafunem he, ap gembala inebe henagan mene nen an li'norogo wena'neti logolik inabit noba fugunem he, an na'mage sebelu mondok elo'lekhogo hilingnafi laga. A'nogo hilingnafu nen he, tugi misik meneba nek he, it a'nogo mugusogo wulakfisigi.

⁹ A'nogo hilingfisaluk an nen domba esa logalek omanogo inoba ikhi logolik, ”An he, hit halhinafi logolik logogin he nabit enggere, wa'lakhogoin halok he wa'lakhikhi logouwak. Ineil oak lek akhogoin halok he, lek akhikhi logouwak. Nen fena logogun mene re, wat-wat laluk it inonggwaregen inebe senggelhigik ninggi logouwak,” iluk igi.

¹⁰ A'nogo igirik he, an nen sige tomuk ekhe enu ”Endawi fano,” iluk salhi mene a'nogo wanhirik he, it inunggulenu mondogat inom, Tuhan nen wene warisikhe mene a'nogo leget fouwageluk sombologo lakfisigi.

¹¹ Nenggi a'nogo sambulat Tuhan nen wene watikhe mene a'nogo palagaikhe. Nen, it ap domba onggo palharek inap omanogo nen futfikhi logolik he, an nobabut hilingiti lagi mene andomaba Tuhan ane ili'lago iluk futfesukwa.

^12-13 A'nogo hilingitunem an nen it inoba ikhi logolik, ”Neisugwi hiren fano, anggegep halok he, an yabu hilingiti onggo wo'ne'ni o. Nen, lek halok he, herakfisani,” iluk yagaisigi. A'nogo yagaisigimo nen iren he an yabu hilingiti onggo uang perak mene tiga puluh nen wo'neta. A'nogo wo'netama Tuhan nen an noba ikhi logolik, ”uang andem he o An Naiba wusugun mene faget uang obalik fuguba andoma kwelakfein o,” iluk yaganete. Ma re, uang perak mene aremnogo o Tuhan Awi a'nogo faget uang fuguba obalik werek oba aremnogo kwelakfesigi. A'nogo kino igimo nendawimo fanorogoluk he we onggo andem enek wo'neta andi.

¹⁴ A'nogo hilingi'luk he an nen tomuk pirenek mene enu, ”Hele homago” a'nogo sombolisigi. Ariginhigimo re, Yehuda inom Israel inom misik seberek welagaukwa mene a'nogo minggilagaukwa.

¹⁵ Andi nen Tuhan nen an noba yaganeti logolik, ”Hat hebe nekhengge gembala welagaikharek hak hilingla'luk logoin o, oba nen yogondak andi re, gembala weak mene hakhogo hilingla'no.

¹⁶ Andi re, An nen ap misik ekhe gembala a'luk An nanggo domba esa logalek mene andoma tegelinafi logouwageluk heragaisogo fagain o, oba nen he domba longgoikhi logogin mene omanogo re futfikhi logogin lek. Aren he, domba longgoluk werek mene omanogo herati'lek, nen, domba oumo werek mene omanogo fano asuageluk lebethigi'lek, nen, domba ineluk werek mene omanogo nunggu mene wogisigik ikhi logogin lek. We aren he, domba asei hokho mene andoma eino ninggi logolik he ineisok a'lip omanogo wokhigik helikhi logogin.

¹⁷ Gembala we alomarogo werek mene andi re homan ugu logouwak! At he, domba halinafu mene omanogo hesanggema heilat fisaluk werek andi. Weim oba nen at along logogin mene a'nogo mondogat wurep kobok igin, nen, enggi omame legagik, eilenggen pikhit-fikhit mene mondogat pugagik, igin o.” iluk yaganete.