YUNUS 4 - Allah Wene Fano Wene Hupla Inane

Allah nen afuni Niniwe mene endawirinafunem he, at Yunus a'mage lagasikhe wene

¹ Allah nen afuni omanogo inoba unggum figi'lek oak waganogo herakfesikhemo re, at Yunus a'nogo endawimo mondok weak agaikhesik, a'mage lagasikhe.

² A'mage lagasikhesik, Allah ayonggo fikhi logolik he, mel yagatikhe: ”Tuhan neisena! O attagenat an naiba logolik aremnogo Haren a'nogo hilingisigin iluk an nen isigi lek nogo? Isigiat anggigi! Hat he hobabut inelagaik isigik, afuni hendawi hundik hilinginafik, hendawinggen sakhorek oba hilingitik, hobabut fetakhogo hilingiti'lek logolik afuni weak hilingitu mene inoasigin iluk inabok palherendigen he, hobuk hendawirinafi legen a'nogo nelu logolik he, an heise o Spanyol lagaluk lagagi anggigi.

³ Yogondak he Tuhan neisena, an nebe wa'la'le anggikhi lagi o. Neluk werek aple re nabiro,” iluk yagatikhe.

⁴ A'nogo yagatikhemo re, Tuhan nen onggo yagati logolik mel yagatikhe, ”Hat he wene ha'mage lagau legobaat ha'mage lagegendigen ikhi lagen o,” iluk yagatikhe.

⁵ A'nogo yagatikhemo re, Yunus o kota nen wulifikhesik, o mo liabi wagarek fikhit andoma lagaikhesik hurek welagaikhe. Andoma logolik o sabu ekhe wutikhesik he, elonggoma kwisikhesik hurek logolik he, ”Afuni o kota Niniwe mene inoba ninggi'nogo hilinglasigin,” iluk nenangot hikhi logolik welagaikhe.

⁶ Were'ma re, Tuhan nen at Yunus endawimo fanorogo kunmo logouwagaluk hobut hangge mene ekhe yakfei wagaikhe. A'nogo yakfei wagaikhemo re at Yunus endawimo agaiyek mondok hokhorogo agaikhesik kun a'ma welagaikhe.

⁷ A'nogo meneat he, hubet o hil lakfei wagu kwelek he, Allah nen kon ekhe lakfei wagaikhemo wagaikhesik he, hobut oak a'nogo aigen palhikhemo re, sawet agaikhe.

⁸ A'nogo hilinglagaikhemo, ohealek hubet mo arat lagai wagaikhemo Allah nen, sogoi aganhan weak mene o mo lagai wagarek higiren funha wesuagaluk hilingitikhemo re, funha wagaikhe. A'nogo funha wagaikhemo mo aigen Yunus ungguloak hutethasikhemo re, eilfuruk feigeluk isikhe. A'nogo hilingitikhemo re, aren he, ”Nebe neluk logogin nabiro. Wa'lasigin namolo o,” iluk isikhe.

⁹ A'nogo isikhemo, At Allah nen he, ”Hat he hele ari faget hendawimo weak a'luk logou re lek meneba nen hilingiti lagen o,” iluk yagatikhemo, at Yunus nen he, ”Nenahalok lek nogo? An na'mage lagau obaat lagaikhemo re, nebe wa'lasigin namolo o,” iluk yagatikhe.

¹⁰ A'nogo yagatikhemo re, At Tuhan nen he mel yagatikhe: ”Hele ari hat henggi nen yati'legat, wusa yogolhi'legat. Meneat he, we hup misigat fulelhesik, yogondak puk aga mene andi faget hendawimo weak aga.

¹¹ Haren hele ari faget mene ogore, hendawimo mondok weak aga andi. Nen, An nen he, afuni o Niniwe kota hokho mene yiba inagainafuri weak hilingitu mene inom fano hilingitu mene inom penhaluk furogo hilingisu lek hak inonggot mene inebe 120.000 nen inom, inanggo hokhorogo inom, andoma nendawirinabigin lek anggegen a? Nendawirinabigin aro,” iluk yagatikhe.