YUNUS 1 - Allah Wene Fano Wene Hupla Inane

Yunus nen Allah ane sagalogo herakfisaluk lagaikhe wene

¹ Inenggi ekhe sambul he, Tuhan nen hun Amitai amlogo Yunus a'nogoba mel yagatikhe:

² ”Hat he hebe weak-weakhogo o kota Niniwe hokho sili a'nogoba lan o. Lambik he, it weak mondok hilingiri'lagwi andi An arat nelu agarik welagi andi nen he, Tuhan nen weagethinabigin o, iluk husumbi hane ninghogo yagaisano o,” iluk yagatikhe.

³ Oba nen, at Yunus endawimo nen he, Tuhan herakfisaluk agaiserogo heise o Spanyol yatmaat a'lima lagain, iluk anggasikhe. A'nogo anggasikhesik, o Yofa lagaikhe re, afuni kapal oba o Spanyol louwogeluk ugunem lagaikhe. Lagaikhesik he, kapal a'nogo onggo wogisasikhesik he, elonggoma kwisikhesik, Tuhan herakfisaluk it inom o Spanyol yatma andoma lagain iluk inom lagaukwa.

^4-5 Laga logolik, at Yunus a'nogo kapal a'nogo a'ma pisikhesik nogo obabelek agaikhe. A'nogo nogo ugu kwelek, At Tuhan nen sogoi aninirogo i laut oba lakfei wagaikhe. Sogoi a'nogo hokhorogo funhikhi logolik he, i ha'labu hokhorogoat foinalhi logolik, kapal a'nogo halogesu hak hilingitikhe. A'nogo hilingitikhemo re, it ap kapal waluk lagaukwa mene omanogo inailo hokhorogo agaukwasik, it mene tugwi kembu omanogo nen telninabuageluk inane hokhorogo kwetukwama, kapal a'nogo se asuageluk sunggwe kapal elema kwelabek mene omanogo hambokhogo i lakfisigik, isukwa. It a'nogo hilingirik laga logolik he,

⁶ it ap kapal waluk laga-lagaukwa mene omanogo inoe ekhe kapal a'nogo elema huli warek a'ma meneba pisikhe re, at Yunus a'nogo nogogunem eilenggen hasikhesik, mel yagatikhe: ”Yi'nogo hilingitu kwelek meneat he, nogo u hak nogo a? Heluk ame o! Hat heisena fogerati lagen mene andi nen nit endawit ninabimbik, ninebe weaget ninafi, lek telninabuageluk ayonggo feino o iluk yagatikhe,” iluk yagatikhe.

⁷ Yagatikhesik, emberek lagai wagaukwa re, it ap kapal waluk lagaukwa mene omanogo nen it-it ikhi logolik, ”Ero sa weak hilingiteba nen nit wene weak mene yi ninoba aga nogo, iluk ninendawinggen wenggelasuagaluk, oagengge lakfouwogo,” iluk isukwasik oagengge lakfesukwa re, at Yunus a'nogoba higit agaikhe.

⁸ At oba higit agaikhemo re, iren at mel yagatukwa: ”Eberogoat hat weak hilingiten oba nit wene ninoba aga o! Weak-weagat yaganisan. Nenahalok hat yoma waga lagen nogo? Hat haiba o koma mene? Hunggulenu ki mene nogo?” iluk heinok wanhukwa.

⁹ A'nogo yagatukwama aren he, ”An nebe Ibrani mene o. Neisena Tuhan Allah pogoroba mene i laut yenggelek inom, kweang inom, elalhikhe mene andi fogeratirek mene o,” iluk yagaisasikhe.

¹⁰ A'nogo yagaisasikhesik, ekhe mel isikhe: ”A'nogo fogeratirek meneat he, an nen Tuhan ane sagalogo herakfuluk, agaiserogo heise yatmaat a'lima lagain iluk wagari'mo nen o,” iluk yagaisasikhemo, it ap omanogo inesanggo holhukwasik he, ebenagaik mondok inailo agaukwasik, mel yagatukwa: ”Hat weak mondok hilingitenma o,” iluk yagatukwa.

¹¹ A'nogo ugu kwelek aremnogoat, i ha'labu ebenagaik aninirogo mondok hilingitikhe. A'nogo hilingitunem, it ap omanogo nen he, Yunus mel yagatukwa: ”I ha'labu nen nit ninoasinogo iluk, abolok hambuk uageluk he, niren hat ninggi'nogo hilinghabuok?” iluk yagatukwama re,

¹² at Yunus nen he, ”Ero an weak hilingitiba i ha'labu nen hinoasu hak mondok elo'lekhogo hilingiri'lago andi re, an arat futfigi o. Andi nen he, an nebe hambokhogo i laut oba pelaknobagaumo nek he sogoi abolok ili'lago mene ari hambuk igin o,”

¹³ iluk yagaisasikhe meneat he, it ap omanogo nen kapal a'nogo warogo inambotkwe sugulogo i laut aik oba wulibi wesuogoluk inomamerogo wathasukwaba nen he, i ha'labu mondok ebenagaik sebelinabigiluk hilingitikhemo wesu re, elo'lek agaikhe.

¹⁴ Elo'legat hilinglagaikhemo re, iren inane hokhorogo Tuhan mel yagatukwa: ”Nineisena Tuhan! Hat hendawimo hamolo anggegen higithogo hilingninafi lagen andi nen, ap yi nen nit weak ekhe hilingninafi'lek meneat he, i lakfogoin andi, at amep nit ninoba fembik weagetninafun o!” iluk ayonggo fesukwa.

¹⁵ A'nogo ayonggo fesukwasik he, Yunus a'nogo hambokhogo ima pelakfesukwama, i ha'labu mondok hokhorogo sebelinabuhak hilingiti lagaikhe a'nogo arat hambuk isikhe.

¹⁶ Hambuk isikhemo re, it ap omanogo Tuhan oba inailo mondok hokho agaikhe, inailo agaikhemo, it inebe kweang ambuema asi wulifukwasik he, Tuhan faget warogo wogetik, niren yi'nogo ti'nogo hilingiti logogun, iluk inane hombuk palogo Tuhan yagatik, isukwa.

¹⁷ It a'nogo hilingirik lagu kwelek he, Tuhan nen ikan hokho mene ekhe ayonggo fesikhesik lakfei wagaikhemo, Yunus ebe ikan a'nogo nen haumhogo nasikhe. A'nogo nasikhemo, at Yunus ebe ikan alabutmo kwalaikhesik werek kwelek hup enggi henagan welagaikhe.