YUDAS 1 - Allah Wene Fano Wene Hupla Inane

Hai warinafikhe wene

¹ An Yudas, Yakobus agot, Yesus Kristus amingmingengge a'nogo nen, hit wene yi lisu palogo hinoba lakfei wagi andi. Nerugwi nagaila'lak. Allah nenat hinayonggo fesikhesik hinebe endawi logolik, hinoe Yesus Kristus inomenat fethinarek mondok werek andi.

² At Allah nen hinebe endawithinafik, hinendawinggen hambugethinafik, hit-hit nendawi-hendawirogo logouwageluk hilinghinafik, hokhorogo hilinghinafi logouwago.

”Afuni ekhe Allah ane yagaisagarek mene hak hilingisogo we'luk, lalhinabi wesugun,” iluk yagaisasikhe wene

^3-4 Nerugwi nagaila'lak. Hinebe nendawi e. Wene Allah nen hit ninomat telninafikhe a'nogo faget wene lisu palogo hinoba lakfei wesigeluk nendawinggen eberek mondok welagirik he, hobuk nendawinggen sebelu elo'lek agama re, wene mel faget lakfei wagi andi. Andi re, it afuni ekhe Allah ebe inabit mene nit ninonggot werek kwelek ninanggele'ma kwi wesimbik he, Allah obabut fano nen wo'ninaferek mene andi, iren lagakhogo wene hunogo mene yagahisikhi logolik he, ”Weak mene hesanggeat hilingiti logogun,” iluk, ninoe Enupogot Yesus Kristus omame hokho a'nogo ebe herakfisaluk, hilingiri'lagwi andi. A'nogo hilingiri'lagwi andi nen, Allah nen he, ”Wene yi'nogo inoba fagain,” iluk isikhemo fagearen lisu palogo fesukwama werek. Wene Allah nen misigam faget nit againafuri wo'nisasikhemo ninendawinggen oba himbirik welago andi mene, it andi nen legetfouwogeluk ugunem, hiren elele waganogo hinomamerogo fisogo logobagaigeluk hinendawimo kagalogo lakfei wagi andi.

⁵ Wene yagahisagain yi, attagaren hinelu meneat he, hobuk hinendawimo ebethisagain andi. Ninoe Enupogoren againafuri Israel mene o Mesir were'ma telinafikhe meneat he, hobuk it mene ekhe inendawinggen at oba himbirik welagaukwa lek mene re inebe inoatikhe.

⁶ Nen, at Allah nen it malaikat yonggo pelakfisa wagarek mene hilingisu mene sumburogo wogisasikhe meneat he, it ekhe nen inagaila'lak hilingisugun mene inafane hilingi'luk he, inonggwarek inaiba herakfisasukwama, Allah nen hele mondok logogin meneba inenggi hele warogo o mondok mum wea'ma kweang abel manggwe fisasikhemo werek andi. A'nogo mondok logombigen, hobuk afuni wene hokhorogo inoba fagain andi sambul, it inomat inoba feigeluk he, inenggi hele fikhalinabigin andi hinendawimo ebe'ni.

⁷ It hilingitukwa higithogoat he, it afuni o Sodom mene inom, Gomora mene inom, o sili inera'lukwe mene inomaren, pailak fakfisigik, ap-ap, hemi-hemi hilingisu lek mene hilingitik, isukwaba unggum he, endu nunggu mondok welagare'ma mondok logouwageluk, lakfisasikhemo andoma werek, iluk, nit afuni mondogat futfikhi logogun.

⁸ A'nogoat he, it afuni andi inabi hili'lagwi hak inendawinggen lek logolik he, inonggwarek inebe weagetfakhigik, ninoe Enupogot inendawimo sebelfigik, pogoroba fogerinafarek mene andi inabok weak igik, ili'lagwi andi.

⁹ At Mikhael, malaikat Allah nen yonggo pelakfisa wagarek mene inoe kain andi nen, it ap andi hilingiri'lagwi andi hak hilingisu ailo welagaikhe. Athe, Musa ebe warek faget, Iblis emberek wene palhi logolik, ane ninghogo wenagetikhesik wene oba fou elok meneat he, ailorogo, mel yagatikhe: ”Nineisena, Enupogoren wenakhesuago,” iluk yagatikhe.

¹⁰ A'nogo meneat he, it afuni andi yi wene ti wene inonggot logoligat he, abok weak pali'lagwi andi. A'nogo palhi logolik, wam endawinggen lek mene nen hilingiterek andi hak, inabisak inelu a'luk hilingi-ri'lagwi andiba inobabut oba inebe weaget fakhili'lagwi andi.

¹¹ It andi Allah nen weagerinabigin o! Attagat Kain hilingitikhe andi hak ombo'ne lili'lagwi andi. At Bileam weak hilingitikhe andi hak, inonggwaregen uang saburogo heluogeluk, a'nogoat hilingiri'lagwi. At Kora nen Allah faget, ”Anat hilingiti logogin,” iluk it ekhe sebelfisageluk hilingitikhe andi hak hilingiri'lagwi andiba, inebe nong akhili'lagwi andi.

¹² Hit hinerugwi hinagaila'lak inebe hinendawi nen seni isago hinom misi'mo andogorogo nunggunem, it ap andi inenggali legat hinoba kwi wesimbik he, afuni ekhe kwelaginarek welagi'lek inonggwarek faget enek oba ebeti logolik hinom ninggi lagep andi re, weago. Su fano mola were'ma muli mene oba labulagarek andi hak, hinom weak ninggi lagep andi o. Inebe re, ohena meiso nagain lek meneat sogoien aburungweak waluk nikherek andi hak nikho o. Nen, ekhe re, e enggen iti'lek, engga mondok lek agunem, omanggen inom feisalhunem mondok puk agarek andi hak werego.

¹³ Nen, ekhe re, i laut hokho yenggele'ma ha'labu hesangge-pesangge aninirogo mondok wati logolik, wesilagap hilingisogo fikherek andi hak, it andi hesanggeat hilingiti logolik, inenggali lek weak hilingiri'lagwi. Hesagal furunghogo mum wea'ma lagarek andi hak, Allah nen it andi o mondok mum hikhakse'ma logouwageluk inobagagin werego.

¹⁴ Omanggum Adam huliba nen ta'larik waga lagaukwasik, huli 7 ba mene huli, at Henokh ta'lagaikhe mene nen, it afuni andi wene inoba fagain mene faget mel isikhe: ”Yethani. Ninoe Enupogot a'nogo nen agoromi at onggwaregen yonggo pelakfisa wagarek mene inebe mondok hokhorogoat woginarek pi wesigin o.

¹⁵ Pi wesimbik he, afuni mondogat wene inoba figik, kotik, ikhi logolik he, it afuni Allah ebe inabit mene halok inebe mondogat wene inoba fagain o. It Allah ebe inabit logolik, yi weak ti weak hilingiri'lagwi mene lombok wene inoba figik, Allah inabiren weak hilingiti logolik inane puk weak at abok weak pali'lagwi mene andi inebe lombok wene inoba figik, igin o,” iluk isikhe.

¹⁶ It andi afuni inabok weak palhik, wenagisigik, ugu mondogat welagaikharek mene. Yi mene ti mene inendawinggen en nunggunem, ”Namolo.” anggikhi logolik he, andi meneat hilingitik, inonggwaregen fogerakhikhi logolik, yi mene ti mene saburogo heluogeluk, it ekhe inane agaukhogo fogerinafik, agarek mene.

Wene attak yagaisasukwa mene, inendawimo eberek logouwageluk, komorogo yagaisasikhe wene

¹⁷ Menere, nerugwi nagaila'lak. Hinebe nendawi e. It ap ninoe Enupogot Yesus Kristus nen inayonggo fuluk lakfisa wagaikhe mene nen wene fageat yagahisasukwa mene andi hinendawimo ebe'no o.

¹⁸ Iren he, wene mel iluk yagahisasukwa andi: ”O wurep kobokhogo logolik he, it afuni ekhe Allah ebe inabit logolik inendawimo nen, yi mene ti mene inendawinggen en nunggunem, namolo, iluk andi meneat weak mondok hilingiti logolik, inane asegen wokhisa wesugun o,” iluk yagahisasukwa andi.

¹⁹ It andi re, Allah Areagun inendawimo lek logolik he, inobabut afuni inobabut inetogat logolik, it ekhe fano lambulogo were'ma, minggilogo huli-huli inobagai weri'lagwi mene andi aro.

²⁰ Menere, nerugwi nagaila'lak. Hinebe nendawi e. Wene Allah onggwaregen wo'nisasikhemo hinendawinggen Yesus Kristus oba eberogoat himbiret fuluk, hinendawinggen wurik hogoat logoino o. A'nogo logolik, Allah Areagun hinendawimo kagalhunem samban ikhi logoino o.

²¹ A'nogo ikhi logolik, hinendawimo nen, ”Ninoe Enupogot Yesus Kristus ninebe endawi nen, nit hobuk nabulal-habulal hilingninabigin,” iluk, nenangorogo logolik he, at Allah nen ninebe endawi andi re, hiren at hinom hundigat logoino o.

^22-23 Afuni inebe o inom endu na mene, telogo wulakfisagarek andi hak, it ekhe inendawinggen pire mene, hinendawirogo telinafi logoino. Nen, it afuni ekhe yi mene ti mene inendawinggen en nunggunem weak hilingiri'lagwi andi re, su mola fano were'ma, muli weak mene oba labulagunem elokhonggen inabit agarek andi hak, it inobabut weak hilingiri'lagwi andi, hinabiren hinailorogo logolik he, inebe nek he, hinendawirogo logoino o.

Wene wurep kobokhogo samban it faget isikhe wene

²⁴ Hit nineisena Allah omame logolik elok fethinarek logogin mene a'nogo oba lagunem, hineisok peikhogo warigi'lek fanorogo fethinarek logombik he, at ebe fogerari'lagwiba andoma, wene hinoba figi'legat, hinendawimo hinagaiyek anggugu kwelek, at elokhoma hinobagai lagain mene andi, hai wati logouwogo.

²⁵ Nineisena Allah alegaren ninoe Enupogot Yesus Kristus hilingitikhe andiba telninafikhe mene a'nogo eisewerek omame hokho aro, iluk, at fogeratik, esinet figik, ikhi logouwogen, eroba yi mene ti mene walhigi'le'ma Allah alegat welagaikhe andiba nen, yogondak ya nen, hobuk mondok logolik, a'nogo fogeratu mondok logouwok, iluk ”Amin,” igi andi.