YOSUA 4 - Allah Wene Fano Wene Hupla Inane

Inendawimo eberek logouwogoluk helep ebe 12 nen som wurogo fesukwa wene

¹ It afuni Israel mene a'nogo mondogat wulibi wagaukwasik, inebe i aik yikwe asi wagaukwama, At Tuhan nen Yosuaba yi'nogo yagatikhe:

² ”Ap inebe 12 nen inunggulenu lombok misiktek wenaginabino.

³ A'nogo wenaginabimbik he, helep ebe 12 nenat i Yordan enggen tulem ap imam-imam inebe mendek werek oba andem mene wani kwimbik waluk wesimbik he, o yogondak hup yiba o su mene wusugun oba andoma fei wesuagen yagaisano o,” iluk yagatikhe.

⁴ A'nogo yagatikhe andi hak, at Yosua nen inebe wenaginafikhesik, wolisasikhemo wagaukwama re,

⁵ mel yagaisasikhe: ”Hit i Yordan ima enggen tulem kwimbik he, Peti Wene Warogo nineisena Tuhan Allah nen wo'ninafikhe iluk hilingik a'nogo were'ma elokhoma kwini o. Kwimbik he, nit afuni Israel mene ninunggulenu 12 nen welago higithogoat, hinebe lombok helep ebe misiktek 12 nenat waluk we'no o.

⁶ Afuni nen inendawimo eberisagarek hak, helep andiba, nineisena Tuhan nen hilingite mene andi hit afuni Israel mene hinendawimo eberek logogun o. Hobuk hinagainafuri nen he, hiren helep yoma ebe ninggi'nogo mene faget hilingitigipmo werek iluk heinok wokhisugu halok,

⁷ yi'nogo yagaisikhi logoino: O endamat, niren nineisena Allah nen Peti Wene Warogo wo'ninafikhe iluk hilingik a'nogo waluk wulibi wagunem, i Yordan yaga'lagaikhesik firok isikhemo, waluk wulibi wagagu mene o, iluk yagaisikhi logoino. Wene andi, it afuni nen hinedawimo ebethisikhi logou hak, helep andi nen, Allah nen ti'nogo hilingitikhe iluk hit afuni Israel mene hinendawimo ebethisikhi logogin o,” iluk yagaisasikhe.

⁸ A'nogo yagaisasikhemo, it ap inebe 12 omanogo nen at Yosua nen yagaisasikhe hagat hilingitukwa. At nineisena Tuhan nen, ”Yi'nogo hilingi'no,” iluk Yosua yagatikhe hagat, afuni Israel mene inunggulenu 12 nen werek higithogoat, helep ebe 12 nenat i Yordan enggen tulem andoma nen wanhukwasik he, afuni Israel mene o su mene wusugun oba fei wagaukwa.

⁹ I Yordan ima enggen tulem andoma ogo re, at Yosua nen helep ebe 12 nenat ap imam peti Wene Warogo Allah nen wo'ninafikhe iluk hilingik a'nogo wanhukwasik mendek welagaukwaba andomaat som wurogo fesikhe. Helep wurogo fesikhe mene andi huli yogondagen weregat.

¹⁰ It ap imam a'nogo i enggen tulem mendegat mondok werek kwelek, it afuni Israel mene nen nineisena Tuhan nen, ”Yi'nogo hilingi'no,” iluk Yosua yagatikhemo yagaisasikhe mene arat hilingitukwama nen, wulibi wagaukwa. A'nogo hilingitukwa andi, at Musa nen, ”Yi'nogo hilingi'no,” iluk Yosua yagatikhe hagat hilingitukwa. A'nogo hilingiti logolik, afuni Israel mene weak-weak i Yordan palogo wulibi wagaukwa andi.

¹¹ Inebe mondogat i aik yikwe wulibi wagaukwama nen, it ap imam omanogo peti Wene Warogo Allah nen wo'ninafikhe iluk hilingik mene a'nogo waluk it hobugetfisaluk attak-attak wagaukwa.

¹² At Musa nen, ”Yi'nogo hilingi'no,” iluk yagaisasikhe higithogoat, it tentara afuni Israel mene faget weim yabugun mene inunggulenu Ruben mene inom, Gad mene inom, Manasye mene ekhe inom, it afuni Israel mene fena hobuget fisaluk attagat i palogo wulibi wagaukwa.

¹³ Ap mondok weim yabugun mene re, inarige inasikhe helaluk inebe mondogat he, 40.000 nen wulibi wagaukwa. At nineisena Tuhan eilhanemat i palogo wulibi wagaukwasik, o Yerikho higithogo tonggoma andoma logali wagaukwa.

¹⁴ A'nogo wulibi wagaukwa andi sambul At nineisena Tuhan nen yi mene ti mene hilingiti logolik, it afuni Israel mene nen Yosua ap kain iluk inane agaukhogo yagati logouwageluk hilinginafikhe. A'nogo hilinginafikhemo, iren attak Musa agaukhogo yagati lagaukwa hak, hobuk at Yosua ebe eluk were'ma agaukhogo yagati lagaukwaat.

^15-16 At Tuhan nen a'nogo hilinginafikhesik, hobuk at Yosua nen it ap imam Peti Wene Warogo wo'ninafikhe iluk hilingik a'nogo i Yordan ima nen waluk wulibi wesuageluk yagasuageluk yagatikhe.

¹⁷ A'nogo yagatikhemo at Yosua nen he wene yagatikhe hagat yagaisasikhe.

¹⁸ A'nogo yagaisasikhemo, it ap imam omanogo inebe i aik oba wulibi wagaukwa hak he, i a'nogo hurogo nabung-habung isikhesik he, attak welagaikhe hagat agum puakhogo hilingfesikhe.

¹⁹ A'nogo hilingfesikhemo, it afuni Israel mene i aik yikwe wulibi wagaukwa andire, tugi iren attak wenati lagaukwa mene a'nogoba tanggal 10 ba wulibi wagaukwa. A'nogo wulibi wagaukwasik, inawi su mene o Gilgal o Yerikho abel mo liabi wagarek higit andoma wutukwa.

²⁰ Wutukwama o andoma at Yosua nen helep i Yordan ima mene ebe 12 nen wanhukwa mene omanogo som wurogo fesikhe.

²¹ A'nogo fesikhesik afuni Israel mene mel yagaisasikhe: ”Hobuk hit hinagainafuri nen he, helep yoma ebe ninggi'nogo mene faget fesigipmo werek, iluk heinok wokhisugu halok he,

²² hiren he, O attak nit afuni Israel mene i Yordan yi firitok isikhemo ial pililirekwe wulibi wagagusik helep wurogo fesugu mene o.

^23-24 Afuni kweangma yoma welagaikharek mene mondogaren he, afuni Israel mene ineisena Tuhan andi omame mondok hokho iluk inelu agik, nen hiren nineisena Tuhan Allah agaukhogo fogeratu mondok welagik, ikhi logoubagaigeluk Tuhan Allah nen i laut enu Yobin yenggelek mene firitokhogo fesikhemo wulibi wagagu andi hak, i Yordan firitokhogo fesikhemo ninebe mondogat wulibi waga logolik helep yoma waluk i aik oba arat wulibi wagagu mene o, iluk yagaisikhi logoino,” iluk yagaisasikhe.