YOSUA 3 - Allah Wene Fano Wene Hupla Inane

Afuni Israel mene i Yordan palogo wulibi wagaukwa wene

¹ A'nogo yagatukwama, ohealekwe re, at Yosua ebe inom, it afuni Israel mene mondogat inom, huberat siakhogo ineluk a'luk he, o Sitim o su mene wutukwaba andoma herakfuluk i Yordan ima wagaukwa. Wagaukwasik, i palogo wulibi logoin oba oan asi wagi'legen nenangoti logolik o su mene andoma wutukwa.

² A'nogo wutukwasik, inenggi henagan welagaukwasigen, it afuni Israel mene inogogwi inebe o lombok mondogat inoba fa'larik lagaukwa.

³ Laga logolik, afuni Israel mene mondogat wene mel yagaisasukwa: ”It ap imam-imam omanogo nen Peti Wene Warogo Tuhan Allah nen wo'ninafikhe iluk hilingik a'nogo waluk lagunem hineilenggen isegep halok he, hirogo re o su mene wuri'mo yoma herakfuluk Peti andi waluk lagunem inombo'neat lano.

⁴ A'nogo meneat he, hinebe peti andi oba horokhogo nek he, lagubo. We, inombo'ne endebat hekhogo satu kilometer hangge lano o. A'nogo logoin halok, hit kwe logoin andi hinonggot meneat he, Kwe andi kwe, higit logoin higi, iluk hinelu asigin o,” iluk yagaisasukwa.

⁵ A'nogo yagaisasukwama, at Yosua nen he, afuni Israel mene mel yagaisasikhe: ”Ohealek he Tuhan nen hit futfouwageluk elalin mene ekhe hit hinanggele'ma hilingisigin andi nen he, hinebe Allah faget fanorogo tegelogo fakhambik logoino o,” iluk yagaisasikhe.

⁶ A'nogo yagaisasikhesik, it ap Allah eisewerek mene nen Peti a'nogo waluk he, afuni Israel mene inebe hokhorogo hobugetfisaluk attagat wesuagaluk yagaisasikhemo, iren at Yosua nen yagaisasikhe hagat hilingitukwa.

⁷ A'nogo hilingitukwama, At Tuhan nen Yosua mel yagatikhe: ”An nen hat o yogondak yi huli nen hebe kain hilinghabigin o. A'nogo hilinghafunem, it afuni Israel mene mondogaren he, hat agaukhogo fogethafi logolik, An nen at Musa serogo mondok welagagi andi hak, hat setharek mondok logogin andi, futhobagagun o.

⁸ Ma re, haren it imam en, Peti Wene Warogo An nen wokhinafigi iluk hilingik andi waluk, i andi ima arat asi lagaikha halok he, ima pikhit kwimbik i era'lu mendek logouwagen yagaisano o,” iluk yagatikhe.

⁹ A'nogo yagatikhemo re, at Yosua nen afuni Israel mene wolisasikhemo wagaukwama re, mel yagaisasikhe: ”Nineisena Tuhan nen yaganisikhe mene yi hinesanggo fanorogo holini o.

^10-11 Hit logoin sambul he Tuhan nen hit hinaselei mene afuni o Kanaan mene inom, Feris mene inom, Het mene inom, Hewi mene inom, Girgasi mene inom, Amori mene inom, Yebus mene inom, mugusogo wulak fisikhi logogin. Nen Peti Wene Warek Tuhan pogot kweang elalhikhe mene a'nogo nen hit hinelokhoma i Yordan palago wulibi logoin oba andemen, Allah eluk mondok welagarek mene a'nogo hit hinanggele'ma andoma were'ma hineilenggen hogoin o.

¹² Ma re, yogondak hiren ap inebe 12 nen afuni Israel mene inunggulenu lombok ap inebe misiktek wenagaisogo fisani o.

¹³ Hobuk it ap imam en Peti Wene Warogo Tuhan nen wo'ninafikhe iluk hilingik a'nogo waluk i Yordan ineisogen sebelhugunem he, i yaga'lasimbik firok igin o. A'nogo firok imbik he, i misi'mo yenggelasimbik logogin o,” iluk yagaisasikhe.

^14-15 O andem sambul he, yi mene ti mene yago mene enggen palhuba, i Yordan fu mondok hokhorogo wagarek oba. A'nogo meneat he, afuni Israel mene i Yordan palogo wulibi wesuogoluk he, o su mene wutukwaba nen herakfisaluk wagaukwasik, it ap imam omanogo nen peti Wene Warogo Allah nen wo'ninafikhe iluk hilingik a'nogo waluk attagat wagaukwa. A'nogo waga logolik, i Yordan ineisogen sebelhugu kwelek

^16-17 aremnogoat, i waga lagaikhe mene a'nogo yaga'lagaikhesik mogo yenggelhikhe. A'nogo yagarogo yenggelhi logolik he, i a'nogo elesikwe higithogo yatkwe o Adam, o kota Sartan era'lu andoma huli yenggeli lagaikhe. A'nogo yagarogo yenggela-gaikhemo, i ambut laut yenggelek mondok welagare'ma pikherek mene firok isikhemo, afuni Israel mene i firokse'ma ial ebene nen, o kota Yerikho higit wulibi wagaukwa. It a'nogo wulibi wesuogoluk he, it ap imam peti Wene Warogo Allah nen wo'ninafikhe iluk hilingik a'nogo waluk i enggen tulem mendek mondok werek kwelek he, afuni Israel mene mondogat i palogo wulibi wagaukwa.