YOSUA 22 - Allah Wene Fano Wene Hupla Inane

Ap inunggulenu fena mo ero fikhit wagaukwa mene a'nogo inambotkwe wilayah iren meneba loageluk yagaisasukwa wene

¹ A'nogo hilingi'luk at Yosua nen inunggulenu Ruben mene inom Gad mene inom Manasye mene fenakwe i Yordan fena mo ero fikhit werek mene a'nogo inom wolinafikhesik,

² aren it inoba ikhi logolik he, ”Hit he Tuhan amingmingengge Musa a'nogo nen melalhinobagaikhe mene a'nogo ekhe mene ekhe mene mondok higithagathogo hilingitep. Nen hiren he an nen wene melalhinafu mene omanogo hologo nek hilingiti lagep.

³ O yogondak welago yaba ogo re hiren hinagaila'lak ap Israel amu mene andoma inalegenek hilingisuageluk herakfisikhi lagep lek. Hit he hineisena Tuhan Allah nen Awene melalek a'nogo ibi-eberogo tibet fuluk hilingiti lagep.

⁴ Arigini'more, hit hineisena Tuhan Allah nen wene wathisikhe higithogo re, it hinagaila'lak Israel inap amu mene andoma inoba re hambukhogo logouwageluk hilingisogo fisani o. Ma re, yogondak hit hinebe wilayah hiren mene i Yordan fena mo liabi wagarek fikhit attak Musa nen wokhisasikheba omanogo lani.

⁵ Wene melalek Musa nen hit yagahisikhe mene omanogo hologo hilingiti logobagaigen he furogo kagalek logoino. Wene melalek andi re: Hineisena Tuhan Allahba hinendawinggen hundik hilingitik, At endawimo anggikherek mene nek murok lagik, At Awene melalek omanogo fi-furogo hologo nek hilingitik, At oba lombokhogo welagik, hinendawinggen oba inom, hineluk hinareagun oba inom mondogaren At obaget enek hilingitik, ikhi logoino o, yagahisikhe a'nogo,” iluk yagaisasikhe.

^6-9 Andi nen at Yosua nen loageluk fano anggasikhesik, it inebe inambotkwe wilayah iren meneba loageluk lakfisikhi logolik he wene hilingisugun mene ebere yi'nogo, ”Yogondak he hit hinenggi werek agepsik he hit hinebe hinambotkwe laga logolik, hinanggo inom, hinangge perak, emas, tembaga, inom, posiemanggen inom su labetu mene inom, helaluk logoino. Hiren telogo helogoin mene andoma re hinagaila'lak hit hinunggulenu mene inoba ogo sumburisano.” iluk yagaisasikhe. A'nogo isikhemo re inunggulenu Ruben mene inom, Gad mene inom, Manasye mene i Yordan fena timur fikhit welagaikharek mene omanogo inom he, ap Israel amu mene omanogo herakfisasluk he o Silo Kanaan oba omanogo nen he it inanggweang oba o Gilead omanogo logoin iluk lagaukwa. It inebe kweang andiba re Tuhan nen wene melalogo Musa bene nen yagaisasikhe higithogo welagaukwa. (It inunggulenu Manasye mene fena minggilogo re kweang i Yordan barat fikhit omanogo Musa nen wogisasikhemo helasukwa, nen inunggulenu Manasye mene fenakwe mene re kweang i Yordan fena barat fikhit omanogo Yosua nen it inunggulenu amu mene inom seberogo wogisasikhemo welagaukwa.)

Mezbah i Yordan horokhogo andoma wutukwa wene

¹⁰ It inunggulenu Ruben, Gad, Manasye mene fena o Kanaan oba oan logolik o Kelilot asi lagaukwasik, iren he mezbah misik ekhe hokho mene mondok fano mene i Yordan horokhogo andem wutukwa.

^11-12 Afuni Israel mene fenakwe nen inesanggo holhunemen he it inunggulenu mene fenakwe omanogo nen ikhi logolik he, ”Ap inunggulenu Ruben, Gad, Manasye mene i Yordan ima nen mo liabi wagarek fikhit mene nen he o Gelilot i Yordan horokhogo wilayah niren meneba omanogo mezbah ekhe wurogo menfagama werego,” ugunem inesanggo holhukwa. Holhukwasik he it inebe mondogat o Silo kabogetukwasik iren he, it inunggulenu Israel amu mene i Yordan ima mo liabi wagarek fikhit welagaikharek mene andi inoasi logoin iluk hilingiti lagaukwa.

¹³ A'nogo hilingiti logolik it afuni Israel mene nen he at Pinehas, imam Eleazar amlogo a'nogo it inunggulenu Ruben inom, Gad mene inom, inunggulenu Manasye mene o Gilead i Yordan fena mo liabi wagarek fikhit werek mene a'nogo inom inoba lakfesukwa.

¹⁴ At Pinehas andi inom he ap kaindek Israel mene inebe 10 nen inom lagaukwa, it inunggulenu fena i Yordan mo ubuk ikherek fikhit werek mene omanogo ap inebe misikdek higik inunggulenu lombok lakfisasukwa, it andi re inebe lombok he ineisok erokwe omanogo faget inogogwi kaindek werek mene nek lagaukwa.

¹⁵ A'nogo lagaukwasik he it a'nogo inunggulenu Ruben, Gad, Manasye o Gilead werek mene inom were'ma omanogo asi lagaukwa.

¹⁶ Andi nen he afuni Tuhan againafuri omanogo inenuba re it inunggulenu Ruben, Gad, Manasye inom omanogo inoba ikhi logolik he, ”Nenahalok hiren Allah afuni Israel mene ineisenaba mondok weak mene yi hilingitep? Hiren helep mezbah hinamu wutep andiba re Tuhan awene sagalogo fegep andi o! Hiren he At awene melalek a'nogo higithogo hilingitep lek andi!

¹⁷ Hit he nit ninom o Peor en weak hilingito mene a'nogo wenggel hegep lega? Aremnogoba re nit yi re Tuhan againafuriat hilingik welagoba nen he, Aren ou enggin-fenggin hokho mene nit ninoba fikhe a'nogo! Nen yogondak huli ya mene ogore a'nogoat ambisangma hikhi lagoat andi. Andi re hit hinendawimo nen endebat anggegepsigen hilingiteba?

¹⁸ Yogondak he hiren Tuhan hinambot wogosuogeluk hilingiti lagep ari ri! Hiren yogondak yiba Tuhan ane sagalogo hilingisugun halok he, hobit he Aren afuni Israel mene mondogat inoba wene fagain o.

¹⁹ Nen hit hinaiba welagep oba andi obalik mondok emere'ma hiren wene kaboge'luk Tuhan obaget hilingituba iluk ekhe hilingisu elo'legen hilingiti lagep halok he, o hinebe pugulogo re Tuhan Awi Sabu Salek werek fikhit yoma we'ni o. Nit ninaiba andoma kino ugun he fano, oba nen he nit nineisena Tuhan Allah obaget he mezbah mondogat werek kwelek oba nen he, hiren mezbah amu mene ekhe mangoti lagep andiba re Tuhan ane sagalhik, nit ninane sagalhik ikhi lagep andi re mondok elo'lego.

²⁰ Akhan hun Zerah amlogo yi mene ti mene mondok legaphogo fugu mene a'nogo faget Tuhan nen wene melalogo yagaisasikhe mene holfuluk hilingitikhe lek oba ambisangma ninggi'nogo hilinglagaikhe nogo? Iluk wenggel hano! Afuni Israel mene mondogat wene inoba agaikhe! Andi hilinglagaikhe a'nogo re, we at Akhan amu weak hilingitikhe oba nen, wa'lagaukwa mene re at amu nek wa'lagaikhe nogo!” iluk yagaisasukwa.

²¹ A'nogo yagaisasukwama re, it afuni inunggulenu Ruben, Gad, Manasye mene mo ero fikhit werek mene omanogo nen ikhi logolik he,

²² At Tuhan andi re Omame Mondok Hokho mene werek! At Allah andi re Lego Mondok werek! Athe niren ebetosik hilingito mene andi re elurek, nen hiren ogo ninggi'nogo hilingita iluk andire hinelu asuak anggikhi lago! Niren ambi Tuhan ane sagalogo fogoin iluk hilingito halok a, athe niren At oba eberogo angga mene werek legen a'nogo hilingito halok a, nit yogondak ya nen wa'lasugun fano aro!

²³ Niren Tuhan ane sagalogo fuluk mezbah ari nit ninamu nen warogo fuluk nolhu mene iluk inom, nen gandum inom seberogo nolhu mene iluk inom, ari amboloba nolugun iluk anggogosik hilingito halok he, Tuhan amu nenat nit wene ninoba fagain o.

²⁴ Oba nen he nagaila'lak, niren anggogo menere a'nogo fuk! Niren mezbah wuto andi re, ninendawimo yi'nogo anggogosik wuto, Hobuk andomaba hit hinambisangma mene nen nit ninambisangma mene inoba ikhi logolik, ”Hit he Tuhan it afuni Israel mene ineisena Allah andi hinom hundik welagep mene re fuk!”

²⁵ Kwelakhani! Aren i Yordan ari nit ninanggele'ma tulem fikhe arire nit inom hit hinunggulenu Ruben mene, Gad mene ninom hulirogo logouwageluk fikhe. Ibi-eberogo nen, hit he Tuhan hinom he ero werek fuk,’ iluk yaganisaga hanogoluk ninendawi fiti logolik wuto. Nen hit hinerembulmo mene nen nit ninerembulmo mene inoba re, Tuhan andi fogerati logoinogo iluk hilingfisaga hanogoluk hilingito.

²⁶ Mene re, niren mezbah wuto mene andi re warogo nolhuba faget iluk inom, nen niren yi mene ti mene wogetuba faget iluk wutore fuk,

²⁷ athe nit inom hit inom faget enegenggerogo logouwageluk inom, nen nit ninerembul oba hobuk mene faget inom wuto. Nit ogore ibi-eberogo Tuhan oba At Awi Sabumo Ebe weinam asi waguba omanogo, warogo nolhu mene inom, yi mene ti mene obaget fugu mene inom, ninom hundik logogun iluk warogo fugu mene inom fei laluk obaget hilingiti lago anggikhi logouwageluk hilingito. A'nogo hilingiti logogun oba re it hit hinambisangma mene nen he nit ninambisangma meneba ikhi logolik, Tuhan andi re niren tagomangge mene ninom he hundik welago lego,” ikhi logogun.

²⁸ Enggere, niren anggogo mene re: Hit hinerembulmo mene nen ambi a'nogo ugu halok ogore, nit ninerembulmo mene nen ikhi logolik he, mezbah ari hineil hani! Nit ninambu-ninombalagen he mezbah Tuhan nen a'nogo hakhogo wuta mene ari re, warogo nolhuba inom, nen yi mene ti mene obaget fugu mene obalik faget he fuk, athe hit inom nit inom faget enegenggerogo logouwageluk wuta o,’ iluk ikhi logogun.

²⁹ Fut feni, niren mezbah ekhe warogo nolhuba iluk inom, athe gandum wogetuba iluk inom, athe yi mene ti mene fuguba iluk inom, athe ninom seberogo iluk fuguba inom, nit nineisena Tuhan Allah a'nogo nen mezbah re O Sabu At ebe weinam asi wagarek oba elokhoma a'nogo werek kwelek, niren sebelogo fuluk hilingituba Tuhan ane sagal figik, nen At obaget hilingitu aple palfigik, foget figik, hilingisumo re elo'lego.” iluk yagaisasikhe.

³⁰ Yagaisasikhemo re it ap inunggulenu Ruben, Gad, Manasye mo ero fikhit mene omanogo nen tindelogo yagaisasikhe mene omanogo imam agung mene enu Pinehas inom it Israel mene inogogwi kaindek mene inebe 10 nen i Yordan aik fena mo ubuk ikherek fikhit mene omanogo inendawimo nen eberogo anggasukwa.

³¹ A'nogo anggasukwama, at Pinehas imam Eleazar amlogo a'nogo nen it inunggulenu Ruben, Gad, Manasye timur fikhit mene aremnogo inoba yagaisikhi logolik, ”Yogondak he hiren Tuhan ane sagalogo hilingitep le'ma re Tuhan nit ninom werek a'nogo hinelu aga. Hiren he Tuhan nen afuni Israel mene wene inoba feinogo iluk inagap telinafep,” iluk yagaisasikhe.

³² A'nogo yagaisasikhesik he Pinehas inom it Israel mene inogogwi kaindek omanogo inom a'nogo lagaukwa. Iren he ap Ruben mene inom Gad mene inom, Manasye mene inom a'nogo re o Gilead omanogo fisaluk lagokhogo re o Kanaan lagaukwasik, wene a'nogo afuni Israel mene inoba yagaisa lagaukwa.

³³ A'nogo yagaisa lagaukwama, afuni Israel mene omanogo re wene a'nogo faget inendawimo yamuk isikhesik iren Allah hokhorogo fogeratukwa. Iren he ap Ruben mene inom, Gad mene inom, inoatik, inawi silikwe legaphogo fisigik, hilinginabi louwogeluk isukwa mene a'nogo sebelogo fesukwa.

³⁴ Wurep oba re, ap inunggulenu Ruben mene inom, Gad mene inom omanogo nen, ”Mezbah a'nogo enu Eil were'ma,” salhukwa. A'nogo salhukwa andi re, yi re nit inom hit inom ninebe mondogat nineilhanem, Tuhan andi ebere Allah aro, iluk,” salhukwa.