YOSUA 21 - Allah Wene Fano Wene Hupla Inane

O kota-kota inunggulenu Lewi mene faget fesikhe wene

^1-2 Linggene misik sambul he it inunggulenu Lewi meneba nen ineisok erokwe mene inogogwi omanogo ap mene nek o Silo Kanaan kweang oba kwi lagaukwasik ap imam Eleazar were'ma ambit lagaukwa. Lagaukwasik ap Yosua hun Nun amlogo a'nogo inom, nen ap inunggulenu Israel mene ap mene nek omanogo mondogat inom, inambit lagaukwa. Lagaukwasik iren ikhi logolik he, ”At Musa bene nen, Tuhan nen melalfikhi logolik he, nit ap Lewi ninap yi ninawi o kota-kota ninebe were'ma inom, nen engga lei o kota andoma horok-horokwe nit ninanggo faget inom, wo'nisoageluk melalfisano,” iluk yagatikhe.

³ A'nogo isikhemo re, afuni Israel mene nen he Tuhan nen wene melalek a'nogo higithogo hilingitukwa. Kweang it inonggwaregen mene omanogo re, it ap Lewi mene inoba o kota-kota logogun kwe inom, nen engga lei inom wogisasukwa.

⁴ Fem attak-attak o kota-kota helasukwa mene re, it inunggulenu Lewi mene oba nen minggilogo inunggulenu Kehat mene a'nogo tak helasukwa. At imam Harun ambisangma mene nen ineisok erokwe omanogo inoba re o sili 13 nen o wilayah Yehuda mene inom, Simeon mene inom, Benyamin mene inom wogisasukwa.

⁵ It ineisok erokwe amu mene unggulenu akhogo Kehat meneba omanogo nen o kota 10 nen mene wilayah Efraim mene inom, Dan mene inom, Manasye mene i Yordan fena barat fikhit mene inom wogisasukwa.

⁶ Inunggulenu akhogo Gerson mene re o kota 13 nen mene wilayah inunggulenu Isakhar mene inom, Asyer mene inom, Naftali mene inom, inunggulenu Manasye mene i Yordan fena timur fikhit a'nogo inom wogisasikhemo helasukwa.

⁷ Inunggulenu akhogo Merari meneba ineisok erokwe mene omanogo re kota-kota ebe 12 nen mene wilayah inunggulenu Ruben mene inom, Gad mene inom, Zebulon mene inom inoba nen wogisasikhemo helasukwa.

⁸ A'nogo afuni Israel mene nen kota-kota omanogo inom kweang omanogo engga lei inom, helep enggen oba inenggi walhigik ap Lewi mene inoba Tuhan nen Musa bene nen wene melaletikhe mene higithogo sumburisasikhe.

O kota-kota inunggulenu akhogo Kehat mene faget fesikhe mene

^9-19 It inunggulenu Lewi meneba nen inunggulenu akhogo Kehat mene a'nogo inomen imam-imam hun Harun ambisangma mene inom tak inaiba kota-kota helasukwa. It andiba re o kota 13 nen inom kweang engga lei inom wogisasikhe. It inunggulenu Yehuda inom, Simeon inomen he it inawi sili 9 nen helasukwa, o andem enu re: Libna, Yatir, Estemoa, Holon, Debir, Ain, Yuta, Bet-Semes, Arba inom o ebe enu re hun Enak eisena enubene salek welagaikhe. O kota andi re yogondak enu Hebron o ebe inagap telagarek awi Yehuda andom oba andoma welagaikhe. Yabu kwe inom o sili endep-endepkwe mene inom he, Kaleb hun Yefune amlogo a'nogo mene asuageluk wogotikhe. Unggulenu Benyamin meneba nen he iren o kota 4 en helasukwa, kota andem enu re: Gibeon, Geba, Anatot, Almon.

^20-26 Inunggulenu akhogo Kehat mene andiba nen ineisok erokwe amu mene omanogo re o kota 10 nen inom kweang engga inomat wogisasikhe. Inunggulenu Efraim meneba nen he it andi o kota 4 en helasukwa mene o andem enu re: Bet-Horon, Kibzaim, Gezer, Sikhem o kota inagap telagarek oba re Efraim andom oba omanogo inomat wogisasikhe. Unggulenu Dan meneba nen he it o kota 4 en helasukwa, o andem enu re: Elteke, Gibeton, Ayalon, Gad-Rimon inom andem. Unggulenu Manasye mene barat fikhit werek mene a'nogo nen he o kota pire helasukwa, o andem enu re: Taanakh inom he Gat-Rimon inom andem.

O kota-kota unggulenu akhogo Gerson mene faget fesukwa wene

^27-33 It inunggulenu Lewi meneba nen akhogo amu mene ekhere Gerson mene andi. It inunggulenu akhogo Gerson mene andiba re o kota 13 nen inom, kweang engga inomat wogisasikhe. Inunggulenu Manasye mene mo lagai wagarek fikhit werek mene a'nogo nen he, o kota pire wogisasikke, o andem enu re: Beestera inom, Golan o inagap telagarek awi iluk o Basan oba andoma fesukwa mene a'nogo inom helasukwa. Inunggulenu Isakhar meneba nen he o kota 4 en helasukwa, o andem enu re: Kisyon, Dobrat, Yarmut, En-Ganim inom. Unggulenu Asyer mene nen he o kota 4 en helasukwa, o andem enu re: Misal, Abdon, Helkat, Reboh inom. Inunggulenu Naftali mene nen he o kota henagan mene helasukwa, o andem enu re: Hamat-Dor, Kartan, Kedes o andi re inagap telagarek awi iluk o Galileaba andoma fesukwa mene a'nogo inom helasukwa.

^34-40 It inunggulenu Lewi meneba nen unggulenu akhogo misik ekhere Merari mene, it andiba re o kota 12 nen inom he kweang engga omanogo inom mondogat wogisasukwa. Inunggulenu Zebulon mene nen he o kota 4 en helasukwa, o andem enu re: Yokneam, Karta, Dimna, Nahalal inom. Inunggulenu Ruben mene nen he o kota 4 en mene helasukwa, o andem enu re: Bezer, Yahas, Kedemot, Mefaat inom. Inunggulenu Gad mene nen he o kota 4 enat helasukwa, o andem enu re: Mahanaim, Hesybon, Yaezer, Ramot, (o Ramot) andi re wesa awi inagap telagarek oba iluk fesukwa mene a'nogo inom helasukwa.

^41-42 Arigini'mo re kweang it afuni Israel mene inaggweang agaikhemo andi nen he o kota re 48 nen inom nen kweang engga haningisogo wulibik mene mondogat inom ap Lewi mene wogisasikhe.

O Kanaan afuni Israel mene inawi agaikhe wene

⁴³ A'nogo Tuhan nen he afuni Israel mene inoba kweang mondogat hombuk palogo abok it inambu-inomba inoba yagaisasikhe mene omanogo wogisasikhe. O kweang andiba sebeli kwisukwasik he afuni Israel mene re femhogo andoma welagaukwa.

⁴⁴ A'nogo hilingitukwama re Tuhan nen it inambu-inomba inoba wene warisasikhe mene higithogo kweang andiba re At Tuhan nen omame a'ma ferinarek were'ma re inailo legengge inambong serogo welagaukwa. It inaselei mene misik iluk ogo it inom weim kagalasu hak mene ekhe hilingiti lagaukwa mondok lek, andi re Tuhan nen it inoba inalonget fisasikhemo a'luk hilingiti lagaukwa.

⁴⁵ Tuhan nen wene warisasikhe mene omanogo misik ekhe taganet figi'lek mondok higithogo nek hilingfisasikhe.