YOSUA 2 - Allah Wene Fano Wene Hupla Inane

At Yosua nen ap ineil penesi loageluk inayonggo fesikhesik o Yerikho lakfisa wagaikhe wene

¹ A'nogo yagatukwama, at Yosua nen o Sitim en ap inebe pire mene o Kanaan ineil penesi loageluk inayonggo fuluk wulakfisa wagaikhe. Ap inebe pire andem wulakfisa waga logolik, ”Hinebe hinagaisogo lambik, o Kanaan andoma ebe esin hangge re, o Yerikho andoma hineil fanorogo pene'no o,” iluk yagaisasikhemo ap aremnogo o kota a'nogo wulibi wagaukwasik, he yanani nilik nikhi lagaikhe mene enu Rahab aiba kwisukwasik welagaukwa.

² A'nogo were'ma afuni nen he, ”O yogondak hubanggo yi afuni Israel mene o Yerikho yoma ineil penesi wagaikhasik werek,” iluk ugunem at kain enupogot o Yerikho mene esanggo holhikhe.

³ A'nogo ugunem esanggo holhikhesik ap ekhe inayonggo fesikhesik he, Rahab oba lakfisikhi logolik wene yi'nogo yaga'no, isikhe: ”Ap haiba werek andi, o kota Yerikho yoma mondogat felelenghogo ineil fi-furogo penesuogeluk wagaikhasik werek andi nen he, inebe wulakfisa wesuago o,” iluk yagaisasikhemo yagasi lagaukwa.

^4-6 A'nogo yagasi lagaukwama, at he Rahab en, it ap ineil wanuogeluk wagaukwa mene aremnogo engga palogo henambo let fesikhe mene andomaba sebelogo hinak fisasikhesigat he, mel yagaisasikhe: ”Eberogoat ap andi an were'ma wagaikhasik o. A'nogo meneat he, ap inebe o koma mene he, an nonggoro. It he, o hubasigiluk ugu kwelegat o kota leget pa'leget ambe palekwe oan yagatfigi'lek werek kwelek arat wulifa o. It wulifunem an nen, hit koma louwogeluk, iluk heinok wanhi'lek. Ma re, mugisa logoin halok he, it oan lagunem elok fakfisa logoin anggikhi lagi o,” iluk yagaisasikhe.

⁷ A'nogo yagaisasikhemo, it ap at kain enupogot Yerikho mene nen inayonggo fuluk lakfisasikhe mene aremnogo, o kota herakfuluk wulifukwa. A'nogo wulifukwasik leget enda'ma werek kwelek, leget pa'leget wurik ambe palek a'nogo kwe yagatukwa. It ap a'nogo nen ap pire ineil wanuogeluk wagaukwa mene aremnogo heraginabik, heraginabik, huli i Yordan palogo wulifarek huli asi lagaukwa.

⁸ A'nogo asi lagaukwama, it ap pire Israel mene ineil wani wagaukwa mene aremnogo nogo oan igi'lek were'ma, at he Rahab a'nogo it inoba henambo lagasikhe.

⁹ Lagasikhesik mel yagaisasikhe: ”At hineisena Tuhan nen o yoma hit hinenggiba fikhemo werek andi re, an nelu o. Afuni yoma mene abirengge hit hinoba inailo mondok werego.

¹⁰ At hineisena Tuhan nen hit hinebe o Mesir en wulibi wesuogeluk wagunem, hinelokhoma i laut enu Yobin yenggelek mene firokhogo fesikhe a'naga abok ninesanggo holhugu o. Nen, hiren afuni Amori mene inogogwi inenupogot inebe pire Sihon inom, Og inom, o i Yordan aik eliba mo yegelogo liabi wagarek higit a'lima nen inoatigip a'naga hinabok ninesanggo holhugu aro.

¹¹ Nit wene andi ninesanggo holhugusik he ninailo mondok agaikhe o. Nen, afuni nit mene inailo lek mene ekhe mondogat hit hinom yabugun he inailo mondok agaikhe o. Hit hineisena Tuhan Allah andi eberogoat yi mene ti mene kweangma mene pogoroba mene elok hilingisu hak enego.

^12-13 An nendawimo namolo re, hiren he, an nen hit wokhinafirik fano hilinghinafi yi hak, hiren afuni an mene ninom wo'ninabimbik fanoat hilingninabuogeluk hineisena Tuhan Allah enu hombuk palogo wene wa'nesugun anggikhi lagi o. Hiren wene wa'neti logolik, Hat heisena inom, hagaisa inom, herugwi hagaila'lak inom, it inagainafuri mondogat inom, hinebe hinoati'lek telogo hinobabagun, iluk wene wa'ne'ni o. Andi faget, an nen he, iren eberogoat telogo ninobagagun, iluk anggagen he, nendawi wenggelogo logoigen he yagane'ni o,” iluk yagaisasikhe.

¹⁴ A'nogo yagaisasikhemo re, it ap inebe pire aremnogo nen he, mel yagatukwa: ”Haren nit ninabok afuni ekhe yagaisagain mondok lek halok, nit nineisena Tuhan nen o yoma nit ninenggiba fugunem hilingiti logolik he, hit fano hilinghinabugun o, iluk wene watheto o. A'nogo wene watheto meneat he, niren eberogoat fano hilinghinafi'lek halok he, nit nineisena Tuhan nen homan ninobagauwago,” iluk Allah enu hombuk palogo wene waretukwa.

¹⁵ A'nogo yagatukwama, at he Rahab awi re, o kota leget pa'leget wurik andi oba tiphogo wutukwama welagaikhe andi nen he, aren it ap inebe pire a'nogo re, jendela ambe palekwe nen hele kelogo pelakfisa wagaikhe.

¹⁶ A'nogo pelakfisa waga logolik mel yagaisasikhe: ”Ap kain enupogot Yeriko mene nen ap inayonggo fuluk lakfisa waga mene omanogo nen hinebe fakhinobagai nogo nen he, it inambotkwe wagunemen lobagaigen he, o tom oba a'lima hina'lasi lambik hinenggi 3 hari logoino o,” iluk yagaisasikhe.

¹⁷ A'nogo yagaisasikhemo, it ap ineil wani wagaukwa mene aremnogo nen, he Rahab mel yagatukwa: ”Nit wene wathesuageluk kino yaganisegen hagat watheto andi, eberogoat hilingisugun aro.

¹⁸ Ma re, haren hilingisigin he yi'nogo. Hat haiba kota yoma niren pin talogo kwi wago halok he, hele elokhonggen mep mene yi jendela ambe palekwe nen nit pelakninobagai wagen oba yoma kelogo feino. A'nogo kelogo fembik he, hat heisena hagaisa inom, hogogwi hagaila'lak inom, heisena oe agot mondogat inom, o hat haiba yoma andogorogo fisambik logoino o.

¹⁹ Logolik, it mene ekhe endakwe wulibumo wesugun halok he, nit weak lek. At onggwarek weak oba o. Ma re, at faget niren yi'nogo ti'nogo ekhe ugun mondok lego. A'nogo meneat he, oloba yoma were'ma weak asigin halok enek he, nit ninoba lombok ugun o.

²⁰ Niren a'nogo hilingisugun ogo meneat he, haren nit ninabok afuni ekhe yagaisagain halok, haren kino yaganisegenma wene watheto mene andi ebe eberogoat hilingisugun mondok lego,” iluk yagatukwa.

²¹ A'nogo yagatukwama, at he Rahab en he, ”Elok egep,” iluk isikhesik, it arat loageluk wulakfisasikhe. A'nogo wulakfisasikhesik, jendela ba hele eil mep mene kelogo fesikhe.

²² It ap inebe pire ineil penerik wagaukwa mene aremnogo o tomkwe andoma hina'lasi lagaukwasik werek kwelek, ap kain enupogot Yerikho mene agoromi inayonggo fuluk lakfisasikhemo inenggi henagan o kota endakwe andoma heraginafukwa menere inebe legen he, inambotkwe sugulogo o Yerikho wagaukwa.

²³ A'nogo lagaukwama re, it ap inebe pire ineil wani wagaukwa mene a'nogo o tom oba nen pi wagaukwasik he, i Yordan palogo re, at Yosua oba inambotkwe lagaukwa. A'nogo lagaukwasik, ineilenggen hasukwa mene omanogo mondogat Yosua ap Nun amlogo a'nogoba tindelogo yagatukwa.

²⁴ A'nogo yagatukwasik, hobuk at Yosua mel yagatukwa: ”Nineisena Tuhan nen o andoma mondogat eberogoat nit wo'nisagain o. Afuni o andoma mene mondogaren he ninoba inailo mondok werego,” iluk yagatukwa.