YOSUA 19 - Allah Wene Fano Wene Hupla Inane

Kweang it inunggulenu Simeon mene sumburisasikhe wene

¹ Kweang enggi pirenek mene sumbutikhe mene re it inunggulenu Simeon mene ineisok erokwe omanogo sumburisasikhe. It inanggweang huli-hulire it inunggulenu Yehuda mene omanogoba kwelabek.

^2-6 It inoba re o kota 13 nen yi inom, o sili era'lukwe haningisogo werek mene inom he yi: Bersyeba, Syeba, Molada, Hazar-Sual, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, Saruhen, inom andem.

⁷ Andi nen o kota ekhe enggaminogo yi inom he, o esanggokwe maserogo werek mene inom seberogo re yi: Ain, Rimon, Eter, Asan inom andem.

⁸ Ekhe desa-desa o kota andoma esanggokwe maserogo welagaukwa mene mondogat inom soganogo re, o Baalat-Beeroba huli (o andi re Rama agarek) kweang abel selatan fikhit meneba andoma. Kweang it inunggulenu Simeon mene ineisok erokwe mene asuageluk wogisasikhe mene re andoma.

⁹ Kweang it inunggulenu Yehuda mene re mondok langse'ma re, kweang andem mene fenakwe re it inunggulenu Simeon mene inoba wogisasikhe.

O kweang inunggulenu Zebulon mene sumburisasikhe wene

¹⁰ Kweang henaganek mene sumburisasikhe mene re, it inunggulenu Zebulon mene ineisok erokwe mene omanogo inoba sumburisasikhe. Kweang it inoba sumburisasikhe mene andoma huli-huli re o Sarid huli.

¹¹ O Sarid en huli-hulimo mo ubuk ikherek fikhit ilirengge hilingik mene re lagasik o Marala nen he, o Dabeset inom i endep mene o Yokneam mo lagai wagarek fikhit lagarek mene andi esanggo sen-sen andoma huli hilingik.

¹² Mo lagai wagarek fikhit he huli-huli warek mene re o Sarid en lagasik o Khislot-Tabor inom huli-hulimo andoma nen he hiling-hiling o Dobrat oba nen he liabek o Yafiaba hilingik.

¹³ Andemen he huli-huli hilingi'mo aremnogo nen laga lagasik mo liabi wagarek fikhit o Gat-Hefer inom o Et-Kazim inom oba nen he o Rimon oba hilingik.

¹⁴ Abel utara fikhit kweang andi huli-huli re kwanirogo o Hanaton nen he, wurep he o Yifta-El tonggoma andomaba hilingik.

¹⁵ Wilayah inunggulenu Zebulon mene andiba re: o Katat, Nahalal, Simron, Yidala, Betlehem andem inomat welagaikkhe. It inaiba andoma re o kota ebe 12 nen inom, o sili endep-endep kwe haningisogo werek mene inom welagaikhe.

¹⁶ O kota inom o sili endep-endepkwe andoma inom he it inunggulenu Zebulon mene inanggweang asuageluk wogisasikhemo andoma welagaukwa.

O kweang inunggulenu Isakhar mene sumburisasikhe mene

¹⁷ Kweang enggaminogo nek mene sumburisasikhe mene re, it inunggulenu Isakhar mene ineisok erokwe andoma sumburisasikhe.

¹⁸ O it inaiba kweang andi inom he o Yisreel, Khesulot, Sunem,

¹⁹ Hafaraim, Sion, Anaharat,

²⁰ Rabit, Kisyon, Ebes,

²¹ Remet, En-Ganim, En-Hada, Bet-Pazes inom seberek welagaikheat.

²² It inanggweang huli-huli re o Dabor, Sahazima, Bet-Semes nen hiling-hiling he i Yordan huliba hilingik welagaikhe. It inawi kota andoma 16 nen were'ma re, o sili endep-endebengge era'lukwe haningisogo hilingik welagaikhe.

²³ O kota inom o sili endep kwe andoma inom he, kweang it inunggulenu Isakhar mene inoba ineisok erokwe hilingik hakhogo it inangge mene asuageluk wogisasikhe mene elonggoma welagaregat.

O kweang inunggulenu Asyer mene sumburisasikhe wene

²⁴ Kweang fuap mene sumburisasikhe mene re, it inunggulenu Asyer mene ineisok erokwe omanogo inoba sumburogo wogisasikhe.

²⁵ It inanggweang he: O Helkai, Hali, Beten, Akhsaf,

²⁶ Alamelekh, Amad, Misal inom andoma. It inanggweang huli-huli mo ubuk ikherek fikhit he Tom Karmel inom i Libnat inom oba nen hulirogo andoma.

²⁷ Andemen he it inanggweang huli-huli a'nogo haningisogo re mo liabi wagarek fikhit o Bet-Dagon nen he it Zebulon mene inanggweang oba andoma nen haning-haning he o Yiftah-El tonggoma nen liabek he abel ambolkwe utara fikhit o Bet-Emek inom Nehiel inom oba andoma huli nen,

²⁸ o Ebron, Rehob, Hamon, Kana inomen he o Sidon soganhogo andoma huli.

²⁹ Andemen huli-huli hilingik mene a'nogo haningisogo re o Rama nen hiling-hiling o kota Tirus, (o kota andi re leget waganogo kwelabek mene) andoma huli. Andoma nen he huli-hulimo hilingik mene a'nogo haningisogo re o Hosaba nen wurep he i Laut Tengah huli hilingik. Huli-huli werek mene andoma elonggoma re o Mahalab inom Akhzib inom,

³⁰ Uma inom, Afek inom, Rehob inom. It inawi kota re 22 nen inom o sili endep-endebengge era'lukwe werek mene inom mangorogo welagaukwa.

³¹ O kota inom o sili endep-endebengge inom omanogo re o kweang it inunggulenu Asyer mene nen ineisok erokwe mene inoba it mene asuageluk wogisasikhe mene andoma elonggoma welagaikhe.

O kweang inunggulenu Naftali mene sumburisasikhe wene.

³² Kweang falfalik mene sumburisasikhe mene re, it inunggulenu Naftali mene ineisok erokwe omanogo inoba sumburisasikhe.

³³ It inanggweang huli-huli re o Helef oba nen he o Zaananim en e patie ekheba nen hiling-hiling he, o Adami-Nekeb oba andoma nen he o Yabneel en o Lakum huli, andoma nen i Yordan huliba hilingik.

³⁴ Andemen he huli-huli hilingik mene a'nogo haningisogo abel barat fikhit o Aznot-Tabor oba nen he o Hukok oba hilingik. Abel a'makwe selatan fikhit kweang andi re it Zebulon mene inanggweang inom huli-huli hilingik, nen abel barat fikhigen he Asyer inom huli-huli hilingik, nen timur fikhit he i Yordan inom hulirek.

³⁵ O Kota-kota andoma nen leget maserogo waganek mene re: Zidim, Zer, Hamat, Rakat, Kineret,

³⁶ Adama, Rama, Hazor,

³⁷ Gedes, Edrei, En-Hazor

³⁸ Yiron, Migdal-El, Horem, Bet-Anat, Bet-Semes inom andoma. It inaiba inanggweang andoma mondogat he kota ebe 19 nen were'ma, o sili endep-endebengge era'lukwe inom welagaikhe.

³⁹ O Kota-kota inom, desa-desa inom andoma re kweang it inunggulenu Naftali mene ineisok erokwe meneba it inangge mene asuageluk wogisasikhe mene andoma elonggoma welagaukwa.

O kweang inunggulenu Dan mene sumburisasikhe mene a'nogo

⁴⁰ Kweang sabit mene sumburisasikhe mene re it inunggulenu Dan mene ineisok erokwe omanogo inoba sumburisasikhe.

⁴¹ It inanggweang andi re: O Zora, Esytoal, Ir-Semes,

⁴² Salabin, Ayalon, Yitla,

⁴³ Elon, Dimna, Ekron,

⁴⁴ Elteke, Gibeton, Baalat,

⁴⁵ Yehud, Beneberak, Gad-Rimon,

⁴⁶ Me-Yarkon, Rakon, andi mene o Yope horok-horokwe kweang werek mene andoma inom wogisasikhe.

⁴⁷ Ap inunggulenu Dan mene andoma re wilayah it inoba nen fenakwe lek agaikhe. Andiba re it inebe o Lesem lagaukwasik o kota andi pin kwisukwa. Iren o andi telogo helikhi logolik he afuni o andi mene pinggi wathigik fisasukwa. A'nogo hilingitukwasik it inebe o kota andiba welagaukwa. A'nogo hilingitukwasik he it inebe andoma logolik o kota andi enu re Lesem oba nen he iren agaukhogo re kota Dan inambu enu bene salhukwa.

⁴⁸ (Kota inom desa-desa) inom andoma re kweang it inunggulenu Dan mene ineisok erokwe meneba it inangge asuageluk wogisasikhe mene andoma elonggoma welagaukwa.

Wurep kofokhogo sumbutukwa wene

⁴⁹ It afuni Israel mene nen kweang omanogo mondogat sumbut-sambathogo hilinglagaukwasik iren he Yosua hun Nun amlogo a'nogoba kweang at mene asuageluk wogetukwa.

⁵⁰ Tuhan nen wene melalogo yagaisasikhe mene re, iren kweang o kota at onggwaregen kino isikhe higithogo wogetukwa. Kweang andoma ebe re: O Timnat-Serah o Efraim tom oba andoma wogetukwa. At Yosua nen he kota andi nekhengge wutikhesik he at ebe andoma welagaikhe.

⁵¹ A'nogo at imam Eliazar, Yosua hun Nun amlogo a'nogo inom, it inunggulenu Israel mene nen it ineisok erokwe lombok inogogwi kaindek welagaukwa omanogo inom he, Tuhan nen wene yi'nogo hilingi'no iluk yagaisasikhe higithogo kweang a'nogo inenggi helebenggen oba walhigik sumbutukwa. Andi re iren o Silo Tuhan awi lelunggulmo nen sumbutukwa. A'nogo sumburik laga lagaukwasik he kweang a'nogo mondogat elugun warogo sumbuthukwa andi.