YOSUA 17 - Allah Wene Fano Wene Hupla Inane

Inunggulenu Manasye mene i Yordan fena fikhit helasukwa mene a'nogo

¹ O kweang i Yordan abel barat fikhit omanogo nen fena re it hun Manasye hun Yusuf amlogo manggusa mene a'nogo ambisangma mene ineisok erokwe omanogo inoba wogisasikhe. Hun Makhir, abo Gilead eisena andire, at Manasye amlogo manggusa mene. Nen at ebe re weim yafu aple faget amururu weak agun hilingi'more o kweang Gilead oba inom Basan oba inom i Yordan fena timur fikhit andoma re at wogetikhe.

² O kweang i Yordan ima nen mo ubuk ikherek fikhit andoma re, at Manasye ambisangma mene nen it ineisok erokwe amu mene omanogo wogisasikhe, it helasukwa mene andem he: Abiezer inom, Helek, Asriel, Sikhem, Hefer, Semida inom. It inebe abirengge andem he hun Yusuf amlogo Manasye a'nogo ambisangma mene ap enek andem. Nen it inebe re it ineisok erokwe aremnogo faget kepala welagaukwa.

³ Zelafehad, hun Hefer amlogo, Gilead omba, (Gilead andire hun Makhir amlogo, hun Manasye omba), at andi amlogomi ap mene ekhe welagaikhe lek, we a'logomi nek welagaukwa mene inenu re: Hele Makhla, Noa, Hogla, Milka, Tirza, inom andem.

⁴ It inebe re imam Eliezer inom, Yosua hun Nun amlogo a'nogo inom, it inogogwi melalinafu mene inoba lagaukwasik yagaisikhi logolik he, ”Tuhan nen Musa oba ikhi logolik nirogo ninagaila'lak ap amu mene nen kweang helaga andi hakhogo ambineat sumbut nisamo helogoin o,” iluk yagatukwa. Andi re, Tuhan Awene melalek higithogo helime hun Zelafehad againafuri andem he kweang it inerugwi inomat lambulogo wogisani o.

^5-6 Andiba re we at Menasye againafuri ap tago omanogo mene nek aga logogun lego, meneat he it helime aren tagomangge mene ogo helogoin aro. Ariginik andi nen he, it inunggulenu Manasye mene kweang ebe asiok 10 nen wogisasikhe. It inanggweang i Yordan fena fikhit o Gilead inom Basan inom omanogo werek kwelek oba nen he, kweang o Gilead andoma re at Manasye ambisangma mene it ekhe amu mene wogisagain.

⁷ It ununggulenu Manasye mene andi inaiba wilayah iren huli-huli re, o Asyer en erora'luk he o Mikhmetat o Sikhem en mo liabi wagarek fikhit omanogo huli. Andemen huli-huli pelabek he abel a'makwe selatan fikhit it ap inunggulenu En-Tapuah mene inawi hulimo andoma.

⁸ O Tapuah andi re it inunggulenu Manasye mene inaiba, oba nen he o kota Tapuah andi huli-hulimo re, it Efraim ambisangma mene inanggweang mene welagaikhe.

⁹ Andi nen huli-huli wilayah Manasye mene nen a'nogo re, pelabek i Kanaba andoma, i andi ima nen abel malikwe selatan fikhit o kota-kota andoma re wilayah it Manasye meneba werek oba nen he at Efraim en mene. O wilayah Manasye nen mene huli-huli a'nogo lisogo re kwe i akhogo lagarek mene a'nogo ambolkwe nen he, wurep kobokhogo i Laut Tengah a'nogoba hilingik.

¹⁰ A'nogo hilingi'mo re Efraim menere abel a'makwe selatan fikhit werek kwelek, Manasye menere abel ambolkwe utara fikhit welagaukwa. Nen i Laut Tengah andi re mo ubuk ikherek fikhit it inanggweang huli-hulimo welagaikhe. Nen. abel barat laut fikhit andoma re wilayah it inunggulenu Manasye nen mene huli-hulire, it inunggulenu Asyer mene inom hulirek welagaikhe, nen abel timur laut fikhit he, it wilayah Isakhar mene inom huli-hulimo hilingik welagaikhe.

¹¹ Nen wilayah Asyer en mene inom, Isakhar en mene inom andomaba re kweang Manasye nen mene ogo welagaikheat. Kweang andoma re: Bet-Sean inom, Yibleam o sili-sili esanggokwe andoma inom. Nen ekhe o kota Dor i laut esanggoma welagaikhe mene andi inom, Taanakh inom, Megido o sili esanggokwe welagaikharek mene inom andoma.

¹² Oba nen he, it inunggulenu Manasye mene nen he afuni o kota-kota andomaba werek mene mugusogo wulak fisasukwa le'ma re ap Kanaan mene o andoma femhogo welagaukwa.

¹³ Hobugen it Israel inap inomame agaukwasigen mene ogore, iren ap Kanaan mene andoma mondogat mugusogo wulaginafukwa lek, iren he ap omanogo inomameba yabu ninghogo hilingiti logouwageluk yagaisikhi lagaukwa.

Inunggulenu Efraim mene inom, Manasye mene inom mo ubuk ikherek fikhit welagaukwa mene omanogo nen kweang ekhe manggorogo kino isukwa wene

¹⁴ It Yusuf ambisangma mene omanogo nen Yosuaba ikhi logolik he, ”Nit he Tuhan en fanot ninobagagunem ninebe hokho-pokhorogo welagoba nen he, nenahalok kweang siok misik enek wo'nisogoin nogo?” isukwa.

¹⁵ Andi isukwama at Yosua nen onggo ikhi logolik he, ”Hit he hinebe hokhorogo welagep, nen kweang tom Efraim fikhit andoma hit logou oba faget he mondogat onggok-fonggok se'ma re, hit he o kweang ap Feris mene inom Refaim mene inomen mene andomaba lani. It inogoimo andoma o obalik ket mene halogo kwino,” iluk yagaisasikhe.

¹⁶ A'nogo isikhemo it Yusuf ambisangma mene omanogo nen ikhi logolik he, ”O kweang tomkwe andoma re nit ninom higit he lego, nen it inunggulenu Kanaan mene o kweang tonggo langse'ma andoma logolik inangge kereta weim yafarek mene posiemanggen oba wurik mene fisogo andoma re it o Bet-Sean werek mene inom, it era'lukwe maserogo werek mene andoma mondogat inom, nen it o Yizreel tonggo kwe werek mene andoma inom ogo re, a'nogo nek hilingik,” iluk yagatikhe.

¹⁷ Andi isikhemo at Yosua nen it inunggulenu Manasye mene inom, Efraim mene inom omanogo inoba ikhi logolik he, ”Ibi-eberogo, hit he hinebe hokho-pokhorogo logolik hinomame hokhorek welagepma re, kweang ekhe inom mangorogo wokhisogoin aro.

¹⁸ Hit he o tomkwe andoma helani, o andoma re o ogoi werek oba nen he hiren e mugusogo kugun halok he andoma mondogat hit eise asugun. Nen ap Kanaan inap andi faget he, it inebe inomame hokho, inangge kereta weim yafarek mene faget posiemanggen mene fisogo logolik werek oba nen he, hiren elok mugusogo wulak fisogoino.” iluk yagaisasikhe.