YOSUA 16 - Allah Wene Fano Wene Hupla Inane

O kweang Efraim inom Manasye inom wogisasikhe mene a'nogo

¹ Kweang huli-huli it Yusuf againafuri mene a'nogo faget palogo wogisasikhe mene re, i Yordan ima andoma nen hiling-hiling lagasik, o Yerikho horokhogo nen he mo lagai wagarek fikhit o Yerikho i elesi wulibisogo lagarekwe andoma nen he ilingage bene leimo andoma O Yerikho huli nen liabek he o Betel tom oba andoma huli.

² Betel huli nen lagasik, o Lus huliba nen o Atarot kwe nen he ap Arki mene were'ma andoma.

³ Andoma nen lagasik, barat fikhit he o ap Yaflet mene werek fikhigen lagasik o Bet-Horon-Hilir fikhit andoma nen hiling-hiling o Gezer oba nen fem wurepma i Laut Tengah were'ma andoma.

⁴ Andi re kweang ap inunggulenu Manasye mene inom, Efraim mene inom, at Yusuf ambisangma mene omanogo it inanggweang mondogat logouwageluk wogisasikhe mene andoma.

Kweang Efraim mene wogisasikhe mene a'nogo

⁵ Ombo'ne yi re kweang omanogo unggulenu Efraim mene ineisok erokwe lombok hulithigik wogisasikhe mene. Fena timur fikhiren kweang iren mene huli-huli re, Atarot-Adar en hiling-hiling laga lagasik o Bet-Horon-Hulu fikhit andoma.

⁶ Andi nen pikhit i Laut Tengah huli andoma. O Mikmetat andi re abel utara fikhit welagaikhe. Nen timur fikhit he kweang huli-huli maserogo o Taanat-Silo fikhit andoma nen hiling-hiling abel timur fikhit soganogo re pikhit o Yanoah huli andomaba.

⁷ Andoma nen he huli walsek mene andi nen pelabek o Atarot en he Naharat huli nen pikhit o Yerikho walingisogo wurep kobokhogo re i Yordan huliba.

⁸ Abel fena barat fikhit Efraim mene faget huli-huli re, o Tapuah nen laga-laga i endep mene Kana ima nen he, huli-huli re i Laut Tengah andoma hulirek. Andi re kweang it inunggulenu Efraim mene inanggweang asuageluk inebe ineisok erokwe lombok sumburisasikhe mene re,

⁹ o kota endep mene inom, o sili wilayah Manasye mene inanggelekwe welagaukwa mene inom andoma.

¹⁰ Oba nen he, it inunggulenu Efraim mene nen he ap Kanaan mene re o Gezer oba andoma nen mugusogo wulakfisasukwa lek. Andiba re. yogondak huli nen ap Kanaan mene re o Gezer andoma it Efraim inap inom seberogo welagaikharek, oba nen it ap Efraim mene nen he inamimingengge a'luk yabu hilingiti logouwageluk inane ninghogo yagaisugunem it ineabu hilingitu mondok welagaikharek.