YOSUA 14 - Allah Wene Fano Wene Hupla Inane

O kweang i Yordan ima nen mo ubuk ikherek fikhit a'nogo sumbuthukwa wene

¹ Ombo'ne yi re kweang o Kanaan oba i Yordan ima nen mo ubuk ikherek fikhit a'nogo it afuni Israel mene inanggele'ma nen ninggi'nogo sumbuthukwa iluk pilingisogo palek werek yi. Kweang andi sumburogo afuni Israel mene inoba wogisasikhe mene re imam Eleazar inom, Yosua hun Nun amlogo a'nogo inom, it inunggulenu Israel mene oba nen ineisok erokwe mene faget inogogwi kaindek welagaukwa mene omanogo inomen sumburisasukwa.

² Tuhan nen Musa oba wene melalogo yagatikhe mene higithogo re, kweang i Yordan ima nen mo ubuk ikherek fikhit andi re it inunggulenu Israel mene 9 nen aremnogo inom, nen ekhe minggilogo aremnogo mene inom, sumburisikhi logolik inenggi helebenggen walhogo nen sumburisasukwa.

^3-4 Kweang i Yordan ima nen mo liabi wagarek fikhit omanogo at Musa nen it inunggulenu pire Manasye mene fena minggilogo inom Efraim mene inom wogisasikhe. (Hinelurogo iluk at Yusuf en taginafikhe mene inunggulenu pire Manasye inom Efraim inom werek andi.) Nen it inunggulenu Lewi mene faget he at Musa nen it inanggweang ekhe sumburisasikhe lek. Athe we inebe were'ma faget kota-kota inom, engga leikwe inanggo sapi, domba inom faget enek wogisasikhe.

⁵ Kweang andi it afuni Israel mene nen he Tuhan nen wene melalogo Musa yagatikhe higithogo a'nogo sumbut-sumbut agaukwa.

O Hebron hun Kaleb wogetikhe wene

⁶ Linggene misik sambul he it inunggulenu Yehuda mene at Yosua o Gilgal were'ma ambit wagaukwa. It wagaukwa mene andem ap misik ekhe enu re Kaleb hun Yefune amlogo ap Kenas mene a'nogo nen ikhi logolik he, ”Yosua ao! Nit inom hat inom faget o Kades-Barnea nen Tuhan at Musa Allah amingmingengge a'nogoba yagatikhe mene aremnogo re harogo helu o.

⁷ Tuhan amingmingengge Musa a'nogo nen he an neluk werek kwelek enek he, umur 40 tahun were, ma o kweang yi neil penesi loak iluk o Kades-Barnea nen laknobagai wagaikhe. Laknobagai wagaikhemo wagagisik, hobuk nambotkwe lagagisik he, an nen wene higithogo nek yagasi lagagi.

⁸ Ap an ninom wagagu mene omanogo nen he afuni Israel mene inendawimo inailo asuageluk hilingfisasukwa. Oba nen he, an enek he neisena Tuhan Allah a'nogoba nendawinggen tibet fesigisik higithogo nek hilingitigi.

⁹ A'nogo hilingitigi andi nen Musa nen wene wa'neti logolik he, kweang an nen neil penerik wagagi kwe andoma re ibi-eberogo an inom an nagainafuri inom mondok-mondok inanggweang mene asuageluk wokhisagaino, isikhe.

¹⁰ Wene andi Tuhan nen Musaba yagatikhe huli nen werek kwelek enek yogondak 45 tahun aga yi. Nen andi hilinglagaikhe aplere it afuni inunggulenu Israel mene o leikwe leil warik wagaukwa huli aremnogo agaikhe. Nen, At Tuhan nen wene isikhe mene higithogo re Tuhan nen fetnarek werek kwelek yogondak inomat neluk welagi ari. Kwela'nean, yogondak he an nebe umur 85 tahun hilinglagi yi.

¹¹ Oba nen he, an nebe nomame attak at Musa nen laknobagai wagaikhe huli andem welagagi aremnogo inom higirat hilingik welagi. An he weim yafu aple ogo nen amu aple hilingitu mene faget ogo re nomamerek welagi.

¹² Ariginik enggere, an ninom ap an ninom welagaukwa mene inomen wene hilinglagaikhe mene waluk lagagumo, Tuhan nen abok yaganetikhe mene o tomkwe omanogo an wo'nom o. A'nogo sambul he, hat ogo hesanggo tomok holhigin anggigi, o andoma re ap inoagese uan mene inunggulenu Enak inap werek ugunem holhiginat a'nogo. Athe inawi kota re leget haningisogo kwelabek ugunem hesanggo holhiginat a'nogo. Tuhan nen ikhe hakhogo an nen ap andoma mugusogo wulaginabuageluk lebetneagain logou hago.” iluk yagaikhe.

¹³ A'nogo isikhemo re, at Yosua nen he Kaleb hun Yefune amlogo nen yagatikhe mene andi fano anggasikhesik, aren o Hebron Kaleb anggweang mene asuageluk wogetikhe.

¹⁴ Andi nen he. at Kaleb eisena Tuhan afuni Israel mene ineisena Allah a'nogoba tiphogo hilingiti logolik higithogo nek hilingiti lagaikhemo re, yogondak huli nen ogo o kota andi re at Kaleb hun Yefune amlogo ap Kenas mene andi ambisangma mene nen kweang andi eiserogo sebelek welagaikharek.

¹⁵ Attak o Hebron andi enu Arba ikhi lagaukwa. (Arba andi re it inunggulenu Enak inap inanggele'ma nen ap inobakhe hokhondek mene nek welagaukwa.) A'nogo hilingitukwa andiba re o kweang andiba weim youk legengge mondok fano liokhogo welagaikharek.