YESAYA 61 - Allah Wene Fano Wene Hupla Inane

Hele warek were'ma telhinabigin andi nen hinagaiyekhogo logoino isikhe wene

¹ Tuhan Lego Mondok welagarek mene a'nogo omame re an noba werek. Aren an wenagaisogo nobagaikhesik la'nobagai waga andi re afuni inelagaik mene inoba wene fano wene yagaisigik, afuni inendawimo warugu welagaikharek mene andi fanorinafik, afuni hele warek welagaikharek mene inoba re weak-weagat hele fikhalogo telhinabigin o, iluk yagaisigik, nen afuni ekhe o hele warek fisagare'ma andoma welagaikharek mene inoba re, hobuk fikhalogo hinobagagin o, iluk yagaisigik, uagaluk laknobagai waga o.

² An nen he afuni yagaisikhi logolik, ”Nineisena Tuhan nen fanothinabigin oba tahun arat asi waga o,” iluk yagaisigik, ”Hinaselei mene nen hinoatukwa mene inunggulmo fagain oba arat asi waga,” iluk yagaisigik, nen afuni le ari'lagwi mene inendawimo koninafik,

³ it afuni o Sion werek mene inendawimo heiselhu welagik, fong watu welagik agarek mene omanogo inoba, hobuk inendawimo inagaiyek hikhi logouwagaluk fanorinafik, ”Ninggi'nogo hilingisugun he,” iluk inobakheindok palagarek mene andi, inendawimo fanorinafunem Allah awuniba fogerati logogun wene yagaisigik, uagaluk laknobai waga aro. It a'nogo yagaisamo, inebe re e Tuhan onggwarek enggi nen awi yate mene hangge logogun. A'nogo logolik, fano hilingitik, higithogo hilingitik, ugunem, Tuhan mondok legeisogo fikhi logogun.

⁴ Iren he, o kota-kata endamat meisalhukwa mene andi hobuk wutik, o attagaren inombalak ta'larik wagaukwa huli afuni inebe lek welagaukwaba andoma, o sili hokhorogo wurogo kwigik, ugun.

⁵ Nagainafuri hit An nunggulenu mene yoma sani, afuni inunggulenu hunogo mene nen hit lebethisikhi logolik he, hinanggo kambing inom, domba inom, yonggo palek nugu kwelek konhik, hit hineabu wanhik, anggur yabu waganogo hinobagagik, ikhi logogun o.

⁶ Hit hinenu re, ”Allah amingmingengge igik,” imam nit nineisena Tuhan a'nogo nen mene igik, ikhi logogun. Hit he, afuni inunggulenu lombok inangge yi mene ti mene omanogo helaluk nunggu welagik, nen it mene inangge andoma faget hiren legeisogo fakhigik ugun o.

⁷ It afuni ekhe nen hinenggi pireba hobugalep hinenggali watik, hinenu weak hilingisogo hinobagagik, inendawimo seramet hinobagagik, isukwama nong agagip mene andi obali'mo re, hinaiba yi mene ti mene eise asugun mene andi, hinenggi altap pireba eise aga logolik, hinendawimo hinagaiyegetu mondok logogun o.

⁸ Tuhan nen he, mel ikhe: ”An he, afuni inobabut weak logolik, yi enggin ti enggin hilinginafarek andi re mondok nabit logolik, higithogo hilingiti logogun andiat namolo welagirego. An he, nebe hit hinoba lomborogo logolik, onggo fano mene wokhisigik, wene mondok logogin mene warogo wokhinafik, ninom hundik welagik, igin o.

⁹ Nen, afuni o yi awi ti awi inunggulenu lombok werek mene nen hiren tagomangge mene hinombalak inabok fano ugunem hinenu mondok laga logogin. A'nogo lagunem afuni mondogaren ineilenggen isaluk mel ikhi logogun: ”Afuni inunggulenu yi mene yi re, inebe Allah nen fanorinabi'lago o,” iluk inambeba nen fakhogo ikhi logogun o, iluk ikhe.

¹⁰ A'nogo ikhemo, it afuni Yerusalem mene nen mel aga: ”Nineisena Tuhan Allah fano hilingninabi'lago andi nen ninendawimo fano agik, ninagaiyegetik, ikhi lago. Ap inagagwi inom lomborinafi logolik, inalilingge fanorogo helagarek andi hak, Tuhan nen su labetarek hak ninagap telninabigin mene wo'nisigik, ninomame aga logouwagaluk hilingninafik, ikhe andi.

¹¹ Enggen feik lakfugunem inenggi nen yago mene hangge fulelherek andi hak, nineisena Tuhan Allah nen nit ninebe telninabigin mene a'nogo ninomamet ninafunem, afuni inunggulenu lombok inebe mondogaren Allah fogerasugun o,” iluk ikhe o, isikhe.