YESAYA 60 - Allah Wene Fano Wene Hupla Inane

Hobuk o Yerusalem legeisogo fogoin isikhe wene

¹ Hat Yerusalem yi re, selek hat hebe telhabigin mene a'nogo mondogat waga andi nen he hebe menla'luk selegabesin o, Allah ombak-bak he hat hoba fisari'lago.

² Kweangma re mum mene oba sagalirek werek, yi afuni ti afuni inunggulenu lombok he, mum en sebelinarek werek, oba nen he Tuhan aselek a'nogo re hit hinoba weinam aga, nen At we'luk seleget hinafu mene a'nogo hit hinoba weinam aga.

³ Yi afuni ti afuni inunggulenu lombok uluk-uluk hat haselek oba waga logogun, hat hoba nen hombak-bak weinam asigin mene andi faget he ap raja-raja inendawinggen wanigin.

⁴ Hat hunggul legeisogo heilenggen habel fena-fena a'lima yerisan, it inebe mondogat seberogo hat hambit sugulogo wesuogeluk weri'lagwi a'li o. Hat hagainafuri ap mene re yatma nen wesugun, nen helime yenggerugwi re hamboginarek wesugun.

⁵ A'nogo wesumo haren heilenggen isambik he fogerinabimbik helokhe heanerogo woginabigin, nen hendawimo hagaiyegen habunuk eti logolik le asu hak hilinghabigin o. Yi afuni ti afuni inunggulenu lombok inangge omanogo re hat were'ma waluk wesugun, i laut fena fikhiren hokhorogo werek engge omanogo re hat haiba puleli wesugun.

⁶ No unta o Median inom Efa inom omanogo mene nen he o haren ferinarek welagen kwe andoma huli'lipsek logogun. O Syeba nen he afuni nen no emas inom, kemenyan inom waluk waga logolik, Tuhan nen hilingiri'lago mene omanogo faget fogerasi wesugun.

⁷ O Kedar en he kambing inom, domba inom andoma hat hoba waluk wesugun, nen domba ai mene o Nebayot en waluk wesugun mene andoma re haren Tuhan obaget hilingitu mene faget logogin. Warogo wogoti logogun mene andi nen he Tuhan endawimo agaiyegabeti logogin. At Tuhan nen he At Awi wurik a'nogo hokhorogo fogerasuageluk hilingisigin.

⁸ Ohena hakhogo tari'logongge andi re nena mene nogo, sue abiang hak mene aiba tarogo lageluk hangge andi re nena mene nogo?

⁹ Andoma re kapal Allah againafuri o yatma andoma nen woginarek wagasik yasi waga mene o. Emas, perak inom ogore iren nineisena Tuhan Allah a'nogo fogeratu mene faget waluk wagaikha aro. Andi re Israel mene ineisena Allah, Horek Mondok welagarek mene, Aren againafuri inoba agaugwerinabigiluk hilinginaferek mene a'nogo.

¹⁰ Tuhan nen Yerusalem oba ikhi logolik, ”Ap pok mene nen he haren mene leget fak waganek omanogo nekhengge wanugun o, nen it raja-raja nen he hat hobaget hilingiti logogun. Attak he An na'mageba hat unggum wokhetigi, Oba nen yogondak he An nen hat hoba nendawi hundik hilinghafu mene faget nagaiyek welagi.

¹¹ Linggene inom hubanggo inom he hanggwe ambe palek hokho mene andi re hurik mondok logogin, it inunggulenu mene werekwe omanogo nen inangge yi mene ti mene omanogo hat hoba waluk waga logogun, it inogogwi raja-raja omanogo re hele warek hakhogo woginarek waga logogun.

¹² Inunggulenu mene inom o kerajaan oba andoma inom hat hobaget hilingisu inabit mene andoma re, inebe weagerinabumo re mondogat longgo ugun.

¹³ O Libanon ogoi engga enu fano welagarek mene e sin inom, ibin inom, laik inom, omanogore hat hoba ha'luk waga logogun. Andi re o An nawi a'nogo mondok hokho mene wutfembik, fanorogo pugunet foumo re obalik andoma An neisok sebelhuba logogin

¹⁴ Afuni hat sebelogo hobagaikhi lagaukwa mene inagainafuri re ineindep awi yagaisogo sagam esi wesugun, it inane weak hat hoba fikhi lagaikha mene omanogore sebe i wesimbik iren ikhi logolik, ”Hat he kota Tuhan mene o, igik, athe Sion, Israel mene ineisena Allah, Mondok Horek mene a'nogo aiba o, igik,” ikhi logogun.

¹⁵ Hat he inabiret hobagakhi logouwageluk herakhobagagik, hafe winghonghogo logouwageluk hilinghobagagik, ikhi logogin lek. Oba nen he hat he hundik-handik inagaiyek hoba fugu mene inom, henu legeisogo fikhi logouwageluk inom, hilingisogo hobagagin.

¹⁶ Hat hebe re, afuni inunggulenu mene nen inom, it raja-raja mene nen inom, hemi nen ineagwi halinafarek hak, halhafi logogun. Andiba re, haren An heisena Tuhan, hebe telhafirek mene, Israel mene ineisena Allah nomame hokho mene andi re, hat telogo hobagaikherek mene o, iluk helu asigin o.

¹⁷ An nen no perunggu obali'mo re emas waluk wesigin, posiemanggen obali'mo re perak waluk wesigin. E obali'mo re perunggu wokhesigin, nen helep obali'mo re posiemanggen wokhesigin. Nen o kweang hat haiba andi re, An nen hambukhogo logolik lombukhogo logouwageluk hilingisogo fagain. A'nogo hilingfoumo re o andiba wene katokhogo oak palhi logogun mene omanogoba nen elokhe fanorati logogin.

¹⁸ Nen o kweang hat haiba andi re, ap ina'mage nen hilingita iluk ugunem ekhe holhi logogun lek, wilayah hiren meneba andoma nen o meisalhigik lakfisugu mene inom, weagerogo fugu mene inom, ariginha ugunem ekhe holhi logogun legat. An nebe re, leget pa'leget hakhogo fetharek were'ma re, hiren An hineisena nen telninabi'lago o, iluk fogetnafi logogun o.

¹⁹ Hat faget An heisena Tuhan seleget hafu mondok logogin mene asigin. An nombak-bak mondok hokho logolik selegerinafirek mene a'nogoba seleget hafu logogin. Arigini'mo re, haren o linggene mo sakhabuageluk inom, nen hubanggo tugi nen seleget habuageluk inom andomaba ekhe ebeti logogin lego.

²⁰ Hat faget An heisena Tuhan seleget hafu mondok logogin mene asigin, nen fong watu logogun mene a'nogo arat kobok igin. Andi re hit hinobaget he, mo ubuk ikherek lek mene ekhe logogin, nen tugi eil mum agi'lek logogin mene ekhe logoginat.

²¹ Afuni andoma logogun mene re eberogo mene nek hilingiti logogun, iren he o kweang andi mondok-mondok faget eise a'luk logogun. Ithe e awi kigilogo An nonggwarek nalong welagi mene a'nogo weinamet fagain iluk yakfesigi mene hangge hilingik logogun.

²² Nen we it afuni ineisok erokwe inebe endebengge hilingik were'ma wenagisikhi logogun oba nen, hobuk inunggulenu hokho mene asimbik inomame mene logogun, Nen inenggi ekhe higit asi wesigin oba re, An Tuhan nen weak-weak hilingisigin o,” iluk ikhe isikhe.