YESAYA 56 - Allah Wene Fano Wene Hupla Inane

Inunggulenu mondogat he Allah againafuri mene inom sebesugun isikhe wene

¹ Tuhan nen againafuri inoba ikhi logolik, ”Eil misik wela'luk An waga logolik hinagap telhinabi wagik, nen katokhogo hilingitirek mene a'nogo weinamet figik igin enggere, An nawene melalek werek higithogo katokhogo nek hilingiti logoni o.

² Ap linggene Sabat sambul higithogo hilingitarek mene inom, linggene andi emetfili'lagwi lek mene inom he An nen fanot fisikhi logogin. Ap weak hilingiri'lagwi lek mene re An nen at oba fanorogo hilingfikhi logogin o,” iluk ikhe.

³ Ap pok mene Tuhan againafuri inom sebesugun mene nen ikhi logolik, ”Tuhan nen an At againafuri inom seberogo fogerati logouwageluk ikhe lego,” iluk ugun hanogo. Ap ekhe ouwali waganek mene nen halok endawimo uanhogo wenggel hikhi logolik, ”An he nagainafuri ekhe taginabigin lek andi nen he At Tuhan againafuri mene ninom seberogo kabogetu aplere abit anggili'lago hea,” iluk ikhi logoinogo o.

⁴ Tuhan nen it yagaisikhi logolik, ”Hiren linggene Sabat sambul andi re fanot fikhi logoni o, hiren ogo An nen wene wathisasigi mene a'nogo tiphogo hilingitik, An nendawimo nagaiyek anggigirek mene hilingitik,

⁵ hilingiti logogun halok, hit hinenu re, An nawi wuri'mo elonggoma andoma nen inom, An nunggulenu mene inanggele'ma andoma nen inom ebethisikhi logogin o. Hinagainafuri ap mene inom helime mene inom hokhorogo werek mene re, we harek oba nen, ebethisikhi logogin mene andi re mondok esin o. An nen hit hinenu fano mene hobuk nonggorasigin lek mene wokhisagain o,” iluk ikhe.

⁶ Tuhan nen ap pok mene Tuhan againafuri inom seberogo wena'lagaikha mene andoma inom, Tuhan inendawi hundik hilingiti logolik At oba nek kabogeri'lagwi mene andoma inom, linggene Sabat sambul esinet fuluk hilingiri'lagwi mene andoma inom, nen Aren wene warisasikhe mene higithogo hilingiri'lagwi mene andoma inom inoba ikhi logolik,

⁷ ”Hit hinebe An nen wokhinarek o Sion An nandom horek mene a'nogoba wesigin o, An nawi wuri'mo kabogetuba andoma nen An nagaiyek hinoba fikhi logogin. Hiren fugu mene warogo mezbah oba nen nolnetungge andoma re An nen wanhi logogin, An nawi wuri'mo andi yi afuni ti afuni inunggulenu lombogen samban agarek aiba o, iluk ikhi logogun.” iluk ikhe.

⁸ Tuhan Lego Mondok logolik, Israel mene huginabi lagaukwama nen sugulogo woginarek wagaikhe mene a'nogo nen ikhi logolik, ”An nen afuni amu mene woginarek wesimbik, it mondogat andogorek werek mene ninom seberogo kabogeti logogun nen fisa wesigin o,” iluk ikhe.

Israel mene inogogwi kaindek ferinarek mene unggum wogisagain wene

⁹ Tuhan nen At againafuri hokhorogo pilisoageluk it inunggulenu pok mene miminginabumore, olomene aik anini weak mene higit wesugun.

¹⁰ Tuhan nen ikhi logolik, ”An nunggulenu mene inogogwi kaindek ferinarek mene andoma re, ap ineilenggen humunik mene werek! It he, yi'nogo ti'nogo mondogat inonggot. Iren he mene ane hobul warek mene nen helaik eti'legengge nogoba nek hilingiti logolik abi wokhugu welagarek a'nogo hangge werek. It he nogo nek ikhi logolik werek mene andi nek inagaiyek mondok werek.

¹¹ It inebe re, mene hugurue mene nen inoba homot fisikherek lek a'nogo hak werek. Ap inogogwi ferinarek welagaikharek mene andoma re fut fili'lagwi lek. It inebe lombogen he inendawimo anggili'lagwi mene omanogo faget enek hilingiti logolik, ambisangma helogoin mene faget heratu welagaikharek.

¹² Lugu-lugwi palik inap andoma nen ikhi logolik, ”Nit anggur hokhorogo nambik ninoba homorogo logouwogen we'ni o! Yogondak fano welagoba nen hobit enek he mondok fanorogo logogun o, iluk agarek,” isikhe.