YESAYA 52 - Allah Wene Fano Wene Hupla Inane

Allah nen Yerusalem mene fikhalogo fisagain isikhe wene

¹ Hat Yerusalem yi, heluk asimbik he menlame o! Hendawinggen hambuget fakhan! Hasu re halong werek mene laberan! Yerusalem kota tegelek mondok welagen mene yi re, hat hanggwe ambe palekwe andi nen afuni emerek mene ekhe kwi waga logogun mondok lego.

² Hat Yerusalem yi re, helokhoma wengik welagen oba andoma nen menlame o, wul age hagap oba yugul aga mene andoma horisan. Afuni Sion mene hele warek logolik, inalonggopma posiemanggen hele kelik mene andoma re lolisani o!

³ Tuhan nen againafuri yagaisikhi logolik, ”Hit onggo legengge weat wokhinafama re, yogondak lologo fakhouwogeluk ogore, we onggo legat lologo fakhani o.

⁴ Attak hit o Mesir lagagipsik andoma ap pok mene higit welagagip. A'nogo were'ma Asyur mene nen ebe erolek kwelek oba nen weak-peakhogo hilinghinobagakhi lagaukwa.

⁵ Yogondak An nen yoma ninggi'nogo mene hilingisigin he? Afuni Babel mene nen ogo hele warogo hinobagasukwasik hinoba wiik weakhogo hilinghinobagakhi lagaukwa. Iren hit sebelogo hinobagaluk wonoget fakhikhi logolik hundik-handik An nenu mondok weak peakhogo hilingfikhi lagaukwa.

⁶ Andi faget he hiren An hineisena Allah welagi mene a'nogo eberogo anggambik, andi sambulat futnobagagun, An hineisena Allah nane hinoba igin mene andi hinelu asugun o,” iluk yagaisasikhe.

⁷ Ap yonggo lakfisugu mene wagunem ineilenggen eberogo nenat hambik he inagaiyek asugun, at wesigin he tom unggulkwe andoma yaning-haning wesigin. Aren he wene fano lioksek awene waluk wesigin, wene o Sion agap teligin mene faget waluk wesimbik yi'nogo igin, ”Hit hineisena Allah andi re Raja werego!” iluk yagaisagain.

⁸ At Tuhan ebe o Sion oba ambotkwe sugulogo wagunem it ineilenggen tomok furogo houwogeluk, ap o kota kagalek werek mene omanogo nen amit-mit lagali'lagwingge a'li holini, it inebe mondogaren inagaiyek eri'lagwingge andi!

⁹ Tuhan nen againafuri inendawinggen kon fisikhi logolik Yesusalem mene fikhalogo hinobagagin andi nen he, Hit afuni Yerusalem mene o meisalekwe welagep mene omanogo nen hinagaiyegen hinanggiluge'ni o,” igin.

¹⁰ Tuhan omame werek mene a'nogo it inunggulenu mondogat inoba inugisamo re, afuni o kweangma yi awi ti awi unggut-unggut welagaikharek mene mondogaren he, Allah nit nineisena telninaferek mene a'nogo ineilenggen hogoin o.

¹¹ Yago, hit Allah awi elonggoma hilingitu mene waluk logoin mene re, o kota Babel andi herakfuluk wulibi lani o! Yi mene ti mene emerek mene andoma re hinenggi fakhagubo, hit lagi'lek logolik hinebe tak tegelogo fakhani.

¹² Tuhan nen hit logoin kwe wokhinarek lagik, Allah Israel mene ineisena a'nogo nen hinelokhekwe, hinambotkwe hinabel fena-fena hinalong palogo fethinarek mondok werek andi nen he, afuni nen heise louwogeluk hale'legengge lagaikharek andi hak hiren weak-weak logogin iluk hilingisu fugo.

Amingmingengge enggin-fenggin hagain mene iluk isikhe wene

¹³ Tuhan nen ikhi logolik, ”Eberogo nen he An namingmingengge nen ambisangma fanot fagain o, at legeisogo fikhi logolik agaukhogo fogerati logogun.

¹⁴ Attak he afuni hokhorogo nen At ebe ineilenggen hasukwasik youk lagaukwa, oba nen he elokhe mondok weaget fagama re, afuni inelokhe hangge hilingik logogin lek.

¹⁵ Meneba nen aren hilingitunem afuni inunggulenu mondogaren foktiati logogun, raja-raja omanogore inoba fogimbik he inambe sop-sophogo logogun. Attak inonggothogo welagaukwa mene omanogore, iren ineilenggen hambik he futfogoin o.” isikhe.