YESAYA 47 - Allah Wene Fano Wene Hupla Inane

Babel mene oak leninabigin isikhe wene

¹ Tuhan nen ikhi logolik, ”Hat Babel yi re, hat hebe re attak hilingik welagagin hakhogo heilalili fano pugunsek welagen lek andi nen he, takhta hebe hurek welagen oba nen menla'luk pi wesimbik he wul oba yoma hurek logoin o.

² Tepung he heleboba sagalogo helambik hunggulmo sebelek mene andi wokhaluk he, hasu pisarek laberek welagen mene andi legeisogo, hagosolit weinam-weinam i palogo wulibi lan o.

³ A'nogo wilibilambik, hasu fanorogo halhigi'lek hagap henggalimongge weinam-weinam nugunem afuni nen ineilenggen healuk he, inali'norogo henggali warogo hilinghobagakhi logogun o. An nen hat hoba na'mage fikhi lagi mene a'nogore a'nogo hilingisigin andi, ap misik iluk ogo ekhe An nen agap teligin lego,” ikhe isikhe.

⁴ Allah Israel mene ineisena, Horek mondok werek mene a'nogo amu nenat nit fikhalogo ninobagagain o, enu re Tuhan, Omame Mondok hokho mene.

⁵ Tuhan nen Babel oba ikhi logolik, ”Hele tugum Kasdim mene yi, hat faget o kerajaan andomaba ekhe ninagaisa ratu werek iluk ugun mondok lek enggere, hat he o mumse'ma andoma kwilambik habolo'lek hurek logoin o.

⁶ Attak he An nen nagainafuri wenagisikhi lagagi, it faget An nagainafuri wenaginafi mene werek anggikhi lagagi lek. A'nogo anggikhi logolik it a'nogo An nen hat henggiba horogo fesigiba nen, haren it faget inelagaik anggikhi lagagin lek, nen we it inaluendek meneba nen ogore haren haniniba enggin-fenggin inoba fikhi lagagin.

⁷ Haren ebeti logolik he, an nebe ratu mondok-mondok logogin anggikhi lagagin, nen haren hobakhe palegat logolik hobuk hilinglasigin mene faget wenggelhikhi lagagin lek.

⁸ Andi faget he, hat hagaiyek anggikhi lagen mene faget enek murok lagendek mene yi sa! An nane hesanggo holin o, Haren anggikhi logolik, neluk yi fano liokhogo logogin anggikhi lagen, hat higit mene ekhe werek anggikhi lagen lek. Haren anggikhi logolik, an he hobuk sogwe asigin iluk mel anggikhi lagen legat, nen haren tagomangge mene re hobuk alomat lasugun iluk mel ebeti lagen legat.

⁹ Oba nen he, we eil misigam, lingge misik obaat, wene ero pire andem ambineat hilinglasigin, haren hareise aweneba inom, nen wesagun nen hilingitarek awene andomaba inom hilingisigin oba nen ogore, hat hagun inom hagainafuri inom legasugun aro.

¹⁰ Haren kwanirek mene hilingiti logolik andoma a'ma fano welagi iluk anggikhi lagen, Hat hobabut hilingiti lagen mene andoma re fut fili'lagwi lek anggikhi lagen. Hebelek welagen andiba inom helu mondok welagen andiba inom nonghonget hobagali'lagwi, haren anggikhi logolik he ap amu mene re an higit mene ekhe werek lek anggikhi lagen.

¹¹ Oba nen he, hat hobuk enggin mene hoba fogoin o, hareise hat ero fisogo welagen mene andi nen ekhe oak loligin lek. Hat hoba enggin-fenggin asi wesumo re, haren onggo lagalu elo'lek asigin. Weaget habigin mene weak-weak wesigin, oanma haren wenggelhegen lek mene ferekhogo hoba asi wesigin.

¹² Haren haraneba inom wesa weneba inom hebe yenggere'ma nen engge habusakwe sagalhu kwelek hilingiti lagen mene andoba himbirik logolik hilingirikhi logoin. A'nogo hilingirikhi logogin andiba ambisangma enegat hagain logouhak, it haselei mene nen inailo asuageluk andi re sa elu?

¹³ Eige hat he enggin hokho mene hoba welagen andi re komo wene hokhorogo yagaheri'lagwi andi nen o. It andoma re pogot unggut-unggut ineil kogolik lagaikharek inaben inom, hesagal enggen obabut palharek inap andoma nen inom, tugi ket meneba hat hoba yi'nogo hilinglasigin iluk husumbi yagaheti lagaukwa inap andoma nen inom, hat hoba wesimbik he hagap telogo hobagauwageluk yagaisano.

¹⁴ Kwelakhan, it he engga puk mene endu nen lei libunghogo ninggerek hak, it inamu nen ekhe inagap telasugun lego! Endu amulok andi re it faget aganhan hokho mene werek, it inoba aganhan hogo sogoi sakhamo re mondok elo'lek.

¹⁵ Andi re it ap hat hoba hobuk hilinglasigin mene iluk yagahetu mene hat hebe yenggere'ma nen engge habusakwe sagalharek mene andoma inobaget, inamu-inamu hat herakhobagaluk logoin o, hat lebethabuogeluk ekhe wesugun mondok lego,” iluk ikhe isikhe.