YESAYA 34 - Allah Wene Fano Wene Hupla Inane

Afuni Allah inom seleirogo werek menere unggum inoba fagain isikhe wene

¹ Yago, hit yi afuni ti afuni hinunggulenu lombok welagep mene omanogo andogosi we'luk he hinesanggo holi we'ni o. O kweangma welagaikharek mene felelenghogo wesimbik holuak.

² Tuhan nen ap inunggulenu mondogat omanogo inom, ap esa-esangge omanogo inom, wenagisili'logo. Aren it unggum inoba fembik leget fisagain.

³ Inebe warek andoma re salinabugun lek, we hesangge warogo harakfisamo fili aga logolik amben sang ikhi logogin. It inamep he i fu hak laga logolik tom-tom andoma mondogat mep eil enek hilinglasigin.

⁴ Mo, tugi, hesagalenggen, mondogat he wolelenggenhogo legasigin. Pogot he suesingga yinggilharek hakhogo yinggil isagain, hesagalenggen he e engga sawet a'luk lolhigik pikherek hak pi wesigin.

⁵ Tuhan he pogoroba karok foukhogo fikhesik werek, enggere yogondak karok andiba re inunggulenu Edom mene inoba unggum wogisambik inebe legaphogo fisa wesigin.

⁶ Tuhan enggarok andi bene re wam warogo senggelhunem higit inameben labulogo hilingi'mo re, inasei ebene tendelhigik laboksek logogin. Andi re Tuhan nen o Bozra ba andoma warogo fot fisigik, nen Edom kweang oba andoma ap inebe hokhorogo agum houwakhogo warogo liakfisamo hilingik logogin.

⁷ Afuni hobuk inoasigin mene re no lembu eil polok mene inom, sapi ket kotorek mene inom hak hilingik. It inawi silikwe andoma re inamep inom inasei inomen hopo igin.

⁸ O andi sambul Tuhan nen Sion ili wanhi logolik, aselei mene inoba a'mage werek mene a'nogo onggo inoasigin mene re a'nogo andi.

⁹ I o Edom oba lagarek agai omanogo re elokhe munenogo aspal higit hilinglasigin, kweang he pelerang eil hangge mep mondok hilinglasumo re, ambisangma nen o andomaba mondogat he aspal weratunem amulok lagaikherek hak endu amulok he a'nogo lagakhi logogin.

¹⁰ Endu andi nagul agi'lek amulok hup hundik lingge hundik lagagu mondok logogin. Endu andiba nen so'le mone'luk lagagu mondok logogin. Kweang andiba yi'nogo ti'nogo iluk ekhe hilingiti'lek herakfisamo re, ekhe ta'lagik ekhe ta'lagik hilingirik waga logogun huli andoma mondogat lei pirimse'ma re, afuni andoma kwe endephogo ekhe waga logogun mondok lek.

¹¹ Sue siomayo inom, tabi hangge mene enu landak inom, sue sumu-sumu inom, sue gagak inom, o andoma logogin. Tuhan nen kweang andiba attak pogot kweang walhigi'lema hilingik welagaikhe hakhogo we hesangge-pesangge afe hale'legengge hilingfoumo logogin.

¹² Raja nen o andiba ekhe melalinafi logogun mondok lek, nen ap melalinafu mene re inebe mondogat leget fisagain.

¹³ O kota mondok pugun pagansekwe omanogo inom kota leget pak omamerogo waganekwe omanogo inom he alok-alogengge moliep engga mondogat kurogo yauwak igin. Nen omirik engga mondogat yauwak umore mene olomene inom sue hugubi hangge unta inom enek logogun.

¹⁴ Mene olomene anini mene omanogo andoma ebe hesangge nikhi logogun. Sue sumu-sumu inane nek wurep wok-wok ikhi logogun.

¹⁵ O andoma kisu aigen palinaferek mene a'nogo inawi wurogo sagaumsek logolik enggen figik, fulelhik, eak halogo figik ikhi logogin. Sue ebe lombok andoma agun agwe wuret higik logogin.

¹⁶ Buku Tuhan nen mene heragaisogo pilingi'ni: Yi mene ti mene mondogat andoma we misik iluk ogo ekhe longgo igin lek, nen wutsek mene andoma ekhe taganet lasigin legat. A'nogo logogin iluk Tuhan nen awene melalogo fikhemo re At amu nenat it inebe andogorogo fisagain.

¹⁷ Tuhan nen o kweang andi inebe lombok sumburisamo re it andoma inebe lombok it mene helaluk, it inebe andoma ninhup nanhup were'ma, kweang andi re mo lagagik-pigik ugu kwelek andoma it eise asimbik logogun.