YESAYA 32 - Allah Wene Fano Wene Hupla Inane

Raja heirogo hilingitu mene logogin isikhe wene

¹ Hani, inenggi ekhe wesigin meneba re ap raja misik ekhe wene higithogo inoba figik kotik ikhi logogin mene wesimbik melalinafunem, ap inogogwi kaindek ferinarek logogun mene omanogo nen ogore wene higithogo nek hilingiti logogun.

² It inebe lombok he sogoi en inom, sielu nen inom funhugunem hina'laguba hangge agik, athe i liarekwe lagarek agai hakhogo agik, athe o kweang esi le'ma helep hokho mene werekwe andoma nen hinaklagaikharek hak agik, ugun.

³ Afuni ineilenggen hogoin mene re, ineil humun fisagain lek, nen inesanggo holugun mene re fanorogo futfikhi logogun.

⁴ Ap attak inendawinggen ninggerek meneba weak-weak hilingiti lagaukwa mene omanogo hobuk hambuget haluk inendawinggen wenggelek oba hilingiti logogun. Ap ane hebul warek mene a'nogo hobuk ane selekhogo ikhi logogin.

⁵ Ap kembu mene re ekhe inom lego werek anggikhi logogun lek, eranen wene ikherek mene andi re eberogo wene ili'logo anggogoin legat.

⁶ Ap morue mene re ane kembu-kembu aple omanogo nek ikhi logolik, kwanirek mene omanogo nek melalogo fugu werek. Yi'nogo ti'nogo ikhi logolik inom, hilingiti logolik inom he Allah weagerogo fikhi logolik hak enek ikhi logogin a'naga. Aren he ap sumburu nele were'ma wogisigik nen i nele were'ma wogisigik, ikhi logogin lek.

⁷ Nen, ap eranen wene ikherek mene andi re wenggelherek mene inom, hilingiterek mene inom he kwanirek mene nek hilingiterek. Aren he afuni inenggi lek mene omanogo eranen weneba lalogo it inangge mene omanogo helanogoluk lalinaferek.

⁸ Oba nen he fano mene nek wenggelharek mene re hilingisugun mene iluk wenggelogo fikhi logolik inom, nen hilingiti logolik inom he, fanorogo nek hilingitarek.

Katokhogo hilingfisigik agaukhogo hilinginafik igin iluk isikhe wene

⁹ Hit hemi enggin-fenggin legengge welagep mene andoma inom nen yi aik ti aik higi'lek welagep mene andoma inom he hinesanggo fanorogo holini o!

¹⁰ Yogondak hiren anggikhi logolik nit he fano welago anggikhi lagep oba nen, tahun misik oba hea, andem he anggur enggen taganu elo'lekhogo hilinglagik, nen kweang oba nen enggen ugu mondogat lek agik, hilinglagunem he hit he hinendawi fiti logogun.

¹¹ Huli yiba re hit hineluk fanorogo welagik, enggin mene mondogat le'ma hit we selekhogo welagik ikhi lagep. Oba nen yogondak yare hinailo nen hinoak legeti logoni! Hinasu nonggologo herakfuluk, kain karung mene pelagi su laberogo inobakheba pukhogo logoni.

¹² Hineabu yagoma mondok fano heiselekwe omanogo inom, hineabu anggur faget enggen si'nogo kwani iterek mene omanogo inom he kweang an nunggulenu mene inanggweang omanogo mondogat he engga inom alok-alogengge inom wilife andi nen he, le yakhikhi logoni o.

¹³ Hit hinawi wuri'mo afuni inagaiyegeti logolik were'ma inom, nen hinawi kota afuni inanggilugetu welagaikharek awi a'nogo faget inom le yakhikhi logoni!

¹⁴ O istana raja awi sili a'nogo herakfisamo re, o kota eroma anggiluk hilingi'mo omanogo re mondogat tiring-tereng igin. Afuni mondogat inareng legasugun. Punukwe inom afuni ineil welagaikharekwe legoma omanogo inom he sebelogo inenggi mondok-mondok faget kweang inom misik higiret fagain. Keledai maro mene omanogo inom domba inom he kwe andoma nikhi logolik engga ninggi logogun.

¹⁵ A'nogo meneat he, hobuk nineisena Allah omamerogo wesigin o, ma re, o leikwe andoma re yabu kweang heiselek mene hilingisogo figik, nen yabu yagokwe andoma re o engga ogoikwe hilingisogo figik, igin.

¹⁶ O kweang mondogat he katokhogo hilingitu awene inom, higithogo hilingitu awene inom hilingiti logogun.

¹⁷ Afuni inebe lombogen he, eberogo mene nek hilingirik lagunem he, inenggi mondok-mondok andomaba fano liokhogo mondok welagik, inagaiyekhogo nek welagik, ikhi logogun.

¹⁸ Allah againafuri re enggin-fenggin meneba omanogo nen fikhalogo wilibimbik he liok layokhogo logolik inabolok lek mondok logogun.

^19-20 Arigini'mo re, hit faget i yabu yagokwe sakhoratu mene hokhorogo logogin. Hit hinanggo engga nunggu mene re ekhema-ekhema andoma hesangge lombukhogo ninggi logogun. Oba nen he, hit hinaselei mene re hobuk meiso sogenggen es mene nen inoasigin, nen it inawi kota re weagerogo leget fisagain.