YESAYA 2 - Allah Wene Fano Wene Hupla Inane

Hobuk fano lioksek mondok logogun isikhe wene

¹ Allah nen afuni Yehuda mene inom Yerusalem mene inom faget hun Amos amlogo Yesaya a'nogo nen yagaisoageluk isikhe mene re yi:

² Hinenggi hobuk logogun andem oba re, punu o Tuhan Awi wuri'mo andi re ekhe sebelek kwelek andi nek he mondok lego mene wolonghogo liabe'ma re, yi afuni ti afuni inunggulenu lombok andoma uluk-uluk waga logogun.

³ A'nogo waga logolik iren he mel ikhi logogun, ”Nit he afuni Israel mene nineisena Tuhan Allah awi wuri'mo, louwogen we'ni o. At Tuhan ebe Andom Sion oba awi kota Yerusalem logolik, ane ili'logo andi nen he Aren nit komotninafunem he niren At ane furogo hologo hilingitu mene faget yanggul ninabuakhogo re louwogen we'ni o,” iluk ikhi logogun.

⁴ Aren a'nogo yanggulinafi logolik afuni inunggulenu lombok inawene lombok ayo wurogo pilingisigik, nen afuni andi mene inawene inoba were'ma pilingisogo leget fisigik, ikhi logogin. A'nogo hilingitunem he karok weim yafarek mene andi re yabu kiam oba tagalharek mene hangge hilinglagik, nen sige posiemanggen mene andi re pisok engga palhu mene hangge hilinglagik igin o. A'nogo hilinglasumo re afuni inunggulenu lombogen he weim yabuogeluk sali laluk sinelogo inoasi kwigik, weim yi'nogo yafarek iluk milil-melalhogo yanggulinafik, ekhe ikhi logogun mondok lek.

⁵ Yago, hit afuni Yakub en tagomangge mene yi sani, nineisena Tuhan aselek oba louwogen he we'ni o!

Afuni winik wonok agarek mene re legetfisagain isikhe wene

⁶ Nineisena Allah o kweang yiba re, afuni it timur fikhit werek mene nen inom o Filistin mene nen inomen he ap hareise inaben wesa aweneba hilingitarek mene omanogo hilingitik, nen it afuni nen he ap pok mene nen attak inetokhogo alik wokhigik hilingiti lagaukwa omanogo hakhogo eberek logolik hilingiri'lagwi andiba re, haren it hamlogomi at Yakub ambisangma nen tagomangge mene omanogo obokhogo herakfisegen.

⁷ It inaiba andoma re perak inom emas inom sagare'ma re inangge yi mene ti mene wenasu elo'lekhogo hilingik. Inangge kuda ogore mondok hokho pokhorogo hilingi'mo inangge kereta re mondok wenasu elo'lekhogo hilingik.

⁸ Ekhema-ekhema mondogat he tugwi kembu nek sagare'ma re, iren alik wokfuluk apne wili'lagwi.

⁹ Afuni mondogat he, inalapsiri watfisaluk he sebelfisogoin mene nek hilingiri'lagwi. Ariginik andi nen he Tuhan neisena, Haren it inaweak sagalogo leget fisagun o!

¹⁰ Iren he Tuhan a'mageba nen inom nen At omame mondok hokho meneba nen inom hina'lasugun iluk he, oumokwe helep hokhondek mene a'makwe kwigik, kweang habulogo pogolema kwigik, ugun o.

¹¹ Ap winik-wonok agarek mene andi re sebelfisigik, nen ap inonggaregen leget fakhagarek mene re pelakfisigik ugun. We Tuhan hamu nek legeisogo fikhi logogun.

¹² Linggene andi sambul he, Tuhan Mondok Omame werek mene a'nogo nen he, ap inonggwaregen leget fagarek mene andi sebelfisigik, afuni winik wonok agarek mene inom, legeisogo fakhagarek mene inom he, unggum wogisigik, igin.

¹³ O Libanon oba e laik uandek mene omanogo inom o Basan oba e hokhondek mene omanogo inom hobuk mondogat legasigin.

¹⁴ Punu-punu mondogat inom, tom uandek wolonghigik liabek mene mondogat inom tamukhogo lobaget filik lagain.

¹⁵ Ap kagalek were'ma helep wurogo liabek mene inom o himbirengge helep huguloak wurik mene inom molulukhogo lak fisigik iginat.

¹⁶ Kapal mondok hokho mene fano pigin pugunhogo wurik mene re hobuk ima ubukhogo pelak fisagainat.

¹⁷ Ap inonggwaregen foget fakhagarek mene re sebelfisigik, wonoget fakhagarek mene re pelakfisigik, igin. We, At Tuhan amunek legeisogo fikhi logogin.

¹⁸ Tugwi kembu ekhe mene ekhe mene andoma re mondok felelenghogo legasigin.

^19-21 O Tuhan ebe menlasimbik kweang yelandi kwelandirisagain sambul andi re Tuhan Aniniba nen inom At Omame mondok hokho mene a'nogoba nen inom inoba feinogoluk afuni andoma re oumokwe helep hokhondek mene a'makwe inom, kweang pogolema andoma inom hina'lasi kwimbik logogun. O andi asi wesigin sambul andi re kembu perak mene inom, emas mene inom iren hilingiraluk apne wanharek mene andoma re hesanggema linisamo paik inom, kundik inom, nogo i kwikhi logogun.

²² Enggere, afuni inebe lek asugun mene andoma re iren yi'nogo ti'nogo ekhe hilingisu elo'lek hilingi'mo re it inoba hinendawinggen tibetfuluk logou fuk.