YESAYA 1 - Allah Wene Fano Wene Hupla Inane

¹ Wene yi re afuni Yehuda mene inogogwi raja-raja Uzia inom Yotam inom, Ahas inom, Hizkia inom, hobugalep ferinarek logolik welagaukwa andem oba, Allah nen it Yehuda mene inom Yerusalem mene inomen hilingisugun mene faget, Yesaya hun Amos amlogo a'nogo bene nen yagaisoageluk Allah nen weinamhogo yagatikhe.

Allah nen againafuri inenggali warogo wenagisasikhe wene

² Hit pogot inom kweang inom yi sani, Tuhan ane igin enggere furogo holini. Aren ikhi logolik, ”An nagainafuri kulinafik, yanggulinafik, isigi mene omanogo nen An nawe a'ma logou inabiren nane oaksagalhu werek.

³ Wam sapi re eisena halharek agun a'nogo elu welagarek. Nen, keledai re eisena nen amburu wogeterek oba obalik aremnogo elu welagaregat, oba nen he An nagainafuri Israel mene re a'nogo hilingitu aple inonggot. Nen iren futfili'lagwi legat,” iluk ikhe.

⁴ Hit he weak mondok hokhorogo hilingitu welagep andiba re weak anggele'ma kwegepsik welagep andi, hinobabut he nonghongsek logolik hinobaharo mondogat weak. Hiren hineisena Allah Horek Mondok werek mene a'nogo oba fogeratu logou mene a'nogo re hinambot woge'luk hineisena Tuhan a'nogo ninabit iluk herakfisasigip andiba re alomat lakhouwogeluk welagebo.

⁵ Hiren Allah ebe ninabit iluk ugu mondok logogun andi re ninggi'nogoluk nogo? Weak hilingiti lagep andiba Allah nen wene ninoba fili'lago mene andem he, we endep hak anggikhi logolik hobuk enggin mene ninoba fouwageluk hilingiti lageba? Hinunggulkwe re hinoumo purak mene mondogat sagaikhemo welagep, nen hinendawinggenma wenggelhi lagep mene mondogat he ou agunem welagep.

⁶ Hinunggul oba nen pikhit hineisok agut huli andoma re fano selek oba ekhe werek lek. Hit hinebene mondogat he hinoumo inom, tuk-tugengge inom hokhorogo logoligat he, legasuageluk sobalogo amusu figik obat figik igi'lek welagep andi.

⁷ Nen hit hinawi yi awi ti awi omanogo mondogat leget fisaluk, hinawi kota-kota omanogo mondogat he endu fisagaisogo felelenghogo ningge andi. Hit hinelokhoma nenat ap pok mene nen hinanggweang sebeligik, hinangge yi mene ti mene mondogat wolelenggenhogo leget fisigik aga.

⁸ A'nogo hilingiti logolik he, we hit Yerusalem mene nek herak hinobagagama welagep oba nen he o sabu anggur yabu hea, kulu yabu hea, we elama faget wurik welagarek andi hak, hinawi kota aben maserogo kwelabe'ma afe ingang igi'lek werek andi.

⁹ Nineisena Tuhan Omame Mondok Hokho werek mene a'nogo nen endephogo ekhe telninabilep le'ma nen he nit ninebe re afuni o Sodom, Gomora mene Allah nen felelenghogo leget fisasikhe a'nogo higit leget ninobagailep mene welago.

¹⁰ Hit Yerusalem mene hinogogwi fethinarek mene hinom he afuni o Sodom Gomora mene inobabut wanhigipsik welagebo. Nineisena Tuhan en wene yagahisikherek mene andi furogo holfuluk he nit nineisena Allah nen wene yaga hisikherek mene andi fanorogo wanhi logoni o.

¹¹ Tuhan nen ikhi logolik, ”Hiren wam yi mene ti mene kabokhogo fuluk wo'neti lagep mene andoma re nagaiyek hambik wanigin iluga? Hiren domba warogo nolneti lagep mene inom, sapi eak asei nobagakhi lagep mene inom, sapi ai mene inom domba inom, kambing inom amep nobagakhi lagep mene andoma re An he nabiro.

¹² Hiren An nobaget hilingisugun iluk watfuluk An nonggwarek nawi wuri'mo andoma hineisok sebeli kuluk hesangge lak wak ikhi lagep andoma re, sa nen yagahisikhemo hilingiti lagep nogo?

^13-14 Hiren hinangge yi mene ti mene An nobaget fogoin iluk waluk waga lagep mene andoma re we alomarogo waluk waga lagebo. An nen amben sang haluk he hebak nafe ari'logo, hiren tugi ket mene lagai wagunem kabogetik, linggene esin meneba kabogetik, linggene An nobaget enegenggerogo fuluk kabogetik hilingiti lagep mene andoma re nabiren he kwelakhinarek logou re nabit nabi'lago. Andoma mondogat he hiren weak hilingiti logolik hilingiti lagepma re, An noba enggin fengginhogo hilingnobagakhi lagep mene andire nabiro. An nen hilingisu re mondogat nabit ari'lago.

¹⁵ Hiren samban ikhi logolik hinenggi liakfuluk yaganeti lagep mene andoma re An nen fut hinobagagu aple re nabit aro. Hiren afuni hokhorogo inoati lagep mene andoma inamep hinenggiba werek andi nen he samban hiren hokhorogo ikhi lagep meneat he An nen nesanggo holhu re nabit mondok welagirek andi.

¹⁶ Weak mene hinoba werek halok he fanorogo sobalikhi logoino. Hit hinobabut An neilhanem weak hilingiti lagep mene andi herakfisaluk hobuk weak hilingiti logou fuk.

¹⁷ Hinobabut fano hilingitarek mene yanggulikhi logoino. Yanggulaluk he, higithogo hilingitu mene omanogo omamerogo elokhomat fikhi logoino. It ekhe afuni fena nen eagerinafagarek mene andoma leberinafik, yenggerugwi suarek mene inawene fanorogo hal fisigik, hemi sogwe mene inawene faget inebikhit agik, ikhi logoino,” iluk ikhe.

¹⁸ Tuhan en ikhi logolik he, ”Hit weak hilingitu mene hinenggiba mep yuguli'mo unggum hinoba werek oba nen ogore An nen sue yanggwi esi eil kut andi higit pugunet hinobagagin o, nen hiren weak hokhorogo hilingitik, enggin mene hinoba welagik, hilingik welagep oba nen ogore, An nen mondogat sagalogo legetfisagain aro. Ma re, wene hinoba werek mene andi An nen korogo wokhagain enggere noba we'ni o.

¹⁹ Hiren An nane hologo hilingiti logogun halok he, kweang An nen wokhisasigiba yoma logolik, yi mene ti mene yakfakhaluk fanorogo ninggi logogun.

²⁰ Oba nen he, hiren ambi An nane sagalogo fuluk hilingiti logogun halok he hinebe weim elema nen hinoasugun o, iluk An Hineisena Tuhan en nane arat igi o,” iluk ikhe.

Allah nen afuni Yerusalem mene wene inoba fesikhe wene

²¹ Hit afuni o Yerusalem welagep mene yoma sani! Hit hinobabut attak he hinebe Allah ba katokhogo welagik, higithogo hilingitik, hilingiti lagagip oba nen, yogondak he hemi uang helouwogeluk yanani hilingirik nikharek mene hak a'luk hilingiti lagepkwe omanogo re, ap ware mene nen sebelfakhilik lagaikha andi.

²² Hit afuni Yerusalem mene o attak he perak fano mene hangge welagagip oba nen, yogondak he, yi mene ti mene eneti logolik weak mene herakfisagarek andi higit hilinglagepsik welagep. Nen, o attak he anggur agai enduk fano mene hangge welagagip oba nen yogondak he i seram mene hangge hilinglagepsik welagep.

²³ Hit hinogogwi kaindek fethinarek welagaikharek mene omanogo re wene oak sagalogo hilingiti logolik he, afuni yogot wanharek mene inom sebe'luk weak hilingiri'lagwi andi. A'nogo hilingiti logolik he yi mene ti mene weat wogisugunem heligik, inenggi a'makwe nen heligik hilingiri'lagwi. A'nogo hilingiti logolik he, yenggerugwi suarek mene afuni unggum pilingitarek oba omanogo nen unggum inoba fisugunem it inebikhit agi'lek, hemi sogwe mene inane agarek mene omanogo inane holhi'lek, hilingitarek andi.

²⁴ Iren a'nogo hilingiri'lagwi andiba re, nit Israel mene nineisena Tuhan Allah Omame Mondok Hokho mene a'nogo nen ikhi logolik he, ”Hiren An ninom seleirogo logolik na'mage lagauwageluk hilingitunem nendawimo sebelhikhi logolik welagi mene andi re An nen ogo onggo weaget hinobagaginmo re, hobuk hiren An noba enggin mene kwelaknobagakhi logogun mondok lego.

²⁵ Afuni nen perak weak mene inom were'ma endumo weragaisogo fanot fagarek andi hak, hiren yi weak ti weak hilingiti lagep mene andomaba nen An nen pugunhogo hinobagagin o.

²⁶ O attak hit hinogogwi unggum pilingitarek inap hakim inom, komorinafarek inap inom welagaukwa andi hak, hobuk ap inobabut ariginik mene wenagaisogo fisambik wokhisagain o. A'nogo wokhisamo re, hit afuni Yerusalem mene re tiphogo hilingitik, higithogo hilingitik agarek aiba iluk yagahisikhi logogun o,” iluk ikhe.

²⁷ Tuhan he katokhogo hilingiterek mene hilingi'mo re Arenat hit Yerusalem mene nit weak hilingitoma o, iluk hinendawinggen warugunem hinagap telhinabigin o. Oba nen he,

²⁸ it afuni ekhe weak hilingiri'lagwi mene nen At Allah oba lombokhogo logou inabiren herakfuluk wilifa mene re Aren mondogat legetfisagain o.

²⁹ Iren e meneba apne wanhik, yabu kembu dewa inobaget wesa figik, hilingiti logogun mene andi re hobuk inenggali asugun.

³⁰ It hobuk inebe re e pai engga sawet agarek andi hak agik, yabu i kalok waganogo kwelabek le'ma kweang iringik weak welagarek andi higit hilinglagik, ugun o.

³¹ It ekhe inomame welagaikha mene andi re inebe engga puk mene hak welagik, yabu hilingitarek mene andi re endu engganggan hak agik, hilinglasumo re, emberegat endu nen nunggunem it afuni nen telinabu elo'lek asigin o,” iluk ikhe.