YEREMIA 8 - Allah Wene Fano Wene Hupla Inane

¹ O andem sambul he ap raja-raja inoak lolo inom, ap kaindek o Yehuda ba pemerintah inobaget yabu legoma hilingiti lagaukwa inap inoak lolo inom, imam inom, nabi inom, afuni Yerusalem mene fenakwe inoak lolo inom he, it salinabugun oba andoma nen feisalogo wulak fisa wesugun,

² andi re kaboget fuluk nekhengge salugun mene faget he fuk, athe alalengge weak mene hakhogo kweangma herakfisamo logouwageluk hilingisugun. Ap inoak lolo andoma re herakfisamo iren inanggembu dewa ap-ap hilingfuluk inendawi hundik hilingitik, obaget hilingitik, apne wanhik, yaganisoageluk kinotik, hilingitungge mo inom, tugi inom hesagalenggen inom andoma inelokhoma logogin.

³ Andiba re it ap inunggulenu inanini mondok weak mene ari ineluk werek mene re An nen yikwe tikwe telfol isasigimo welagaikharek mene andoma nen he ineluk werek mene faget inabitsek logolik, wa'lagaikharek mene faget enek he inendawirogo logogun. Iluk An Tuhan Nomame Mondok Hokho mene a'nogo nen nane mondogat igi o,” ikhe isikhe.

Weak hilingitukwa mene inom unggum inoba fagain mene inom faget isikhe wene

⁴ Tuhan nen an noba At againafuri yi'nogo yagaisoageluk yaganete, ”Ap warogo kweangma hulambet foumo nen he nekhengge menlasu hak, nen ap ebekhalem inendawinggen nonghong longgo umo nen he inambotkwe wesu hak aro.

⁵ Oba nen he, hit An nagainafuri nen hundik-handik An oboget nealuk hinunggul kwani-kwani lagalagep andi re nenahalok nogo? Hiren he hinanggembu a'nogo hinenggi pukhogo fetaluk logolik An nambit sugulogo wesu re mondogat hinabit welagep andi!

⁶ An nen hinane fanorogo holhi lagiba nen he, hiren weinamhogo ikhi lagep lek. Hit mene ap misigen iluk ogore hinaniniba hilingiti lagep mene andoma faget ninambigen iluk mel hinendawinggen warikhi lagep legat. Athe An nen hilingiti lagi mene yi re ningginik mene hilingiti lagi nogo, iluk aga mene ekhe werek legat. Hit he wam kuda nen weim yafuba kwikhi logolik monhaluk kwikherek hak, hiren ogo ebekwe hinamu nen yakhikhi lagep andi.

⁷ Sue walu mene ogore mo taba re nogoikherek oba lagain iluk elu welagarek, nen sue muluk inom, sue helalimbo inom, sue murai inomen ogore eagwi inebe werek oba faget higilogo ale'ma logoin mene faget he inelu welagaregat. Oba nen he hit An nagainafuri re An nawene melalek higithogo hilingiti logouwageluk melalogo wokhisasigi mene a'nogo futfikhi lagep lek andi.

⁸ Hiren hinambong siserogo hinane ikhi logolik, nit he ninendawinggen wenggelek mene logolik Tuhan awene melalek andoma re ninelu welago o iluk ikhi lagep andi ambi! An nawene yi'nogo hilingiti logoino ti'nogo hilingiti logoino iluk yagahisasigi mene a'nogo it Allah againafuri nen hiligitarek mene ninelurek iluk ili'lagwi inap andi nen henarogo agam eri'lagwingge andi hani!

⁹ Ap inawenggelek inap inom, inelu mondok welagaikharek inap inom hit hinanggelekwe welagaikharek inap andoma re inenggali asugun o. It he wenggelharek mene andi longgo umore inenggali asimbik niknang ugun. An nen komorinafirek mene omanogo wanhi'lek logolik inabit mondok werek andoma re yogondak iren ninggi'nogo mene hilingisuogeluk werek he?

¹⁰ A'nogo hilingiri'lagwi andiba re An nen it ineabu andoma re ap weagerinafarek mene inoba wogisigik, it inagagwi re ap amu mene inoba wogisigik, igin o. It inebe mondogat yenggerugwi inom inaluendek inom inonggwarek inenggi werek agu mene faget ineranhogo weneba lalhigik saburili'lagwi andi. Nen, it imam inom nabi inom oba nen ogore afuni ineranhogo wene yagaisili'lagwiat.

¹¹ An nagainafuri inebene inoumo werek mene omanogo iren he endebengge anggili'lagwi. Iren ikhi logolik he, ”Ah, andi re herakfisani o! At oba yi'nogo ti'nogo lek, mondogat he fano nek welago,” iluk ili'lagwi. Oba nen he a'nogo hilingik lek kwelegat ili'lagwi andi.

¹² Yago, hit An nagainafuri mene yi re, hiren mondok hinali'no mene omanogo nek hilingiti lagepma re hinenggali hikhi logou mene o! Oba nen he hiren nit weak hilingiti lago lek iluk hinenggali legat welagep andi. A'nogo welagep andiba re ap amu mene warogo hulamberi'lagwi andi hak hirogo a'nogoat warogo hulambesuogeluk welagebo, nen An nen unggum wokhisamo re hit hineluk welagep mene andi mondogat legasi lagainat.

¹³ Aben kweang oba nen enggen palogo kabogetarek higit An nen nagainafuri ogo a'nogo kaboget fisele iluk nendawimo anggikhi lagi. Oba nen he An nagainafuri re e anggur inom ara inom enggen iterek lek mene hak hilingik, engga mene ogo mondogat sawet aga. Andiba re An nen ap pok mene we'luk it inanggweang sebelek logouwageluk yagaisasigi andi o. Iluk An Tuhan nen nane mondogat igi, isikhe.

¹⁴ Allah againafuri nen ikhi logolik, ”Nenahalok niren o yoma hurek-hurek mondok logogun nogo? Nit he o kota leget omamerogo waganek oba a'lima nogo lambik logouwogen we'ni o. Nineisena Tuhan Allah nen he nit ninebe lek akhoak iluk wene mondogat tekhogo ikhe. Niren At oba weak hilingitugu andiba ninebe wa'lasuageluk Aren arik weak mene noageluk wo'nisikhe.

¹⁵ Ma re yogondak niren fanorogo hilingninobagailep iluk welagoba nen fano mene a'nogo weinam asi wagi'legat. Nen ki sambul ninoba higit ninobagagin iluk nenangotu welagoba nen ninailo asu hak mene nek ninoba asi weri'lago.

¹⁶ Nit ninaselei mene re o kota Dan oba were'ma re, it inaggo kuda ane nguk eri'lago mene holhaluk he o kweang yoma mondogat oba inailo nek ari'lago. Ap ninaselei mene andi re nit ninanggweang inom, ninawi kota abirengge inom, afuni ninebe inom, mondogat weagerogo fouwogeluk weri'lagwi a'li o,” iluk ikhi lagaukwa.

¹⁷ A'nogo ikhi lagaukwama Tuhan nen ikhi logolik, ”Fut feni o! Yogondak he An nen kisu hit hinanggelekwe lakfei wesigin, kisu andoma nen aik palinafunem he haroba higirinabure mondok elo'lego,” iluk isikhe.

Yeremia nen afuni at unggulenu mene inobaget endawinggen heiselhikhe wene

¹⁸ Nendawinggen mondok heiselhi logolik weimen kurinafunem hangge hilingnabi'logo, Nendawimo heiseli'lago mene andoma re fano hilingnabu lek hak ari'lago.

¹⁹ Holini o! Afuni an nunggulenu mene o kweangma yi awi ti awi mondogat lenggu-lengga ikhi logolik yi'nogo ili'lagwi, ”At eisena Tuhan a'nogo re o Sion oba re ebe legen a? Nen yogondak he at eisena raja a'nogore koma werek?” iluk heinok wili'lagwi. A'nogo ugunem it ineisena Tuhan Raja a'nogo nen ikhi logolik, ”Nenahalok hiren kembu dewa mondogat weak mene andiba hineindep awi yagaisogo fogerati lagep nogo? Nenahalok hiren tugwi kembu wurogo hilingiti lagep oba An nendawimo ou pourogo hilingnobagakhi lagep nogo?” ikherek.

²⁰ Afuni Israel mene nen inane humeti logolik, ”Enggen palhu sambul inom, hibi lagagu sambul inom mondogat kobokhogo laga, oba nen nit he nenahalok ninagap teli'logo lek nogo?” iluk agarek.

²¹ An nunggulenu mene ou mondok engginhogo hilingigen he an nendawimo mondogat sebe igirik welagi o, an he fong wati logolik nendawinggen fitu welagi.

²² Wene ningginik mene hilinglagaba yogondak huli nen an nunggulenu mene inoba ou andoma fano ari'lagwi lek nogo? O Gilead oba mondogat oma re, Dokter ou fano hilinginaferek mene inom, obat inom legen hilingiri'lagwi he a?, iluk heinok wanhi lagi.