YEREMIA 52 - Allah Wene Fano Wene Hupla Inane

Yerusalem ap amu mene inenggiba agaikhe wene

¹ At Zedekia raja Yehuda mene inobaget menlagaikhe oba andem he ebe umur 21 tahun hilingik kwelek menlagaikhe. Aren he o Yerusalem oba andoma tahun nalonggoben ferinarek welagaikhe. At agaisa re he Hamutal hun Yeremia awi kota Libna mene andi a'logo.

² At raja Yoyakim en hilingiti lagaikhe hakhogo re raja Zedekia nen ogo Tuhan elokhoma weak hilingiti lagaikheat.

³ Tuhan nen afuni Yehuda mene inom Yerusalem werek mene inom anini inoba fesikhesik he Aren awe a'ma fisalek ferinarek welagi'lek mugusogo wulak fisasikhe. At Zedekia nen he raja Nebukadnezar Babel mene a'nogo ane oak sagalogo hilingitikhe,

⁴ ma re Nebukadnezar inom ap sikhe fisogo inap inebe mondogat inom he, at Zedekia raja logolik ferinarek werek kwelek, tahun sogo meneba were'ma tanggal 10 tugi ogo 10 meneba werek kwelek he o Yerusalem pin kwi wagaukwa. Iren he o kota a'nogo abel endakwe fikhit he o it inebe himbit fuluk werek oba wutukwasik he, ap maserogo kwelaginafi logolik leget pa'leget wanhukwa,

⁵ A'nogo hilingitukwasik kota andi hukhogo kwelaginarek logolik kagalinarek mondok werek kwelek enek he at Zedekia ebe melalinafi lagaikhe mene a'nogo tahun nalonggop meneba hilinglagaikhe.

⁶ Tanggal sembilan bulan enggaminogonek mene tahun andiba re sumburu ouwak mondok hokho mene lagasikhemo re afuni inangge nenggarek mene mondogat lek agaikhe,

⁷ nen o kota pa'leget waganek mene a'nogo re ap selei inaben langgukhogo lakfisaluk kwisukwa. Hup a'nogo sambul ap Babel mene re it huget fisugu kwelek oba nen he, tentara Yehuda mene mondogat he heise o Yordan tonggoma andoma lagaukwa. It he, ebekhe hun raja awi silikwe a'nogo nen he, pa'leget ambe palek a'nogo ambisang pire agundip sekwe a'nogo nen wulibi lagukwa.

⁸ Oba nen tentara Babel mene nen he, raja Zedekia murok lagaukwasik he, o Yerikho tonggoma andoma nen senfei lagaukwa. At agoromi omanogo mondogat he, at a'nogo herakfisaluk heise lagaukwa.

⁹ Lagaukwama re at raja Zedekia a'nogo nek he hele warogo waluk raja Babel mene Nebukadnezar ambit o kota Ripla daerah Hamat oba andoma wagaukwasik he ebe pinggi wasugun iluk unggum wogetukwa.

¹⁰ O kota andiba nen ogore at onggwarek againafuri omanogo eilenggen werek kwelek enek he iren pinggi inoatukwa, nen, it Yehuda ba yabu legoma hilingitarek mene ogore, mondogat inoatukwaat.

¹¹ A'nogo inoatukwasik, at Zedekia a'nogo eilenggen hulel isasukwasik he, enggi hele warogo, o Babel waluk lagaukwa. Andoma nen he, at ebe hele warogo fisagarek oba fesukwama re, wulifi'lek were'ma nen enek he andoma nen wa'lagaikhe.

Tuhan awi wurik a'nogo wolelenggenhogo fesukwa wene

¹² Tanggal sepuluh tugi fuap meneba werek kwelek nen at raja Babel mene Nebukadnezar a'nogo nen melalinafi logolik were'ma nen enek tahun sembilan belas meneba were'ma, hun Nebuzaradan a'nogo re o Yerusalem wagaikhe. At andi eabu re hun Nebukadnezar wene komorogo yagatik, nen it ap raja kagalek werek mene omanogo faget kepala welagik, hilingiti lagaikhe agun.

¹³ At Nebuzaradan nen he Tuhan awi a'nogo inom, raja awi sili inom, o Yerusalem oba nen ap yi kaindek ti kaindek inaiba inom he mondogat endu nolhikhe.

¹⁴ A'nogo hilingitikhesik, at agoromi mondogaren he o kota leget pa'leget a'nogo langgukhogo lakfesukwa.

¹⁵ Andi nen he, afuni o kota andiba werek mene inom ap yabu hilingitu inelu mene fena werek mene inom, ap inenggi lek mene inom, nen it fena Babel mene inebikhit asi lagaukwa mene omanogo inom inebe mondogat he, hun Nebuzaradan nen felelenghogo woginarek o Babel lagaikhe.

¹⁶ Oba nen he afuni fena inenggi mondok lek mene inom inangge mondogat lek mene inom o Yehuda ba andoma herakfisasukwama re, anggur yabu inom yabu amu mene inom, hilingiti logouwageluk yagaisasukwa.

¹⁷ O Tuhan aiba nen no perunggu meneba timuk warogo liabek mene omanogo inom kereta inom iwak perunggu mene omanogo inom he, ap Babel mene nen eraphogo hilingfesukwasik he, perunggu ebe nek he iren salmakhaluk it inanggweang oba andoma lagaukwa.

¹⁸ Andi waluk laga logolik, iren ekhe inomat waluk lagaukwa mene re: kuali-kuali inom, panci-panci inom, wul mezbah oba nen fuguba obalik inom, pelita obalik inom, wam warogo nolhi logolik amep keralogo fugu mene inom, dupa nolhungge mangkok inom nen iren wene kabogeti logolik hilingitarek mene fena omanogo inom mondogat felelenghogo waluk lagaukwa.

¹⁹ Andi nen emas, perak mene inom, mangkok endep-endebengge mene inom, elemesak inom, wam warogo nolhi logolik amep keralogo fugu mene inom, wul andogorogo fugu mene inom, pelita oak eisok inom, ambenengge dupa faget mangkok inom, mangkok anggur Tuhan faget fuluk kweisalogo kwelakfikhi lagaukwa mene inom, mondogat andoma re, at Nebuzaradan nen at onggwarek faget helasikhe.

²⁰ Yi mene ti mene raja Salomo nen Tuhan Awi wuri'mo faget iluk hilingitikhe mene, kereta inom, waruk bejana inom nen bejana andi legeisogo werek engge sapi nesanggo nen inom, mondok enggin hokho mene hilingi'mo re, enggin walesu mondok elo'lek welagaikhe.

^21-22 No perunggu eisok pire andem he emberek higitsek welagaikhe: ambol he, 8 meter, maserek mene re 5,3 meter, obakhe tulem he seleksek welagaikhe. Sap palek he 75 milimeter en. Eisok liabek mene ebe lombok meneba re ambol kwe menere eisok unggut ekhe 2,2 meter en welagaikhe. Unggul andi maserogo andoma re no delima enggen seralogo mindago welagaikheba nen mondogat he, no perunggu meneba nek hilingik welagaikhe.

²³ E delima enggen e wurep ebene andoma ebe lombok he seratus nen mindago welaikheba nen he, sembilan puluh enam en enek a'ma fikhiren weinam sek welagaikhe.

Ap Yehuda mene Babel felelenghogo woginarek lagaukwa wene

²⁴ Andi nen, fena at Nebuzaradan nen hun Iman Agung Seraya inom, hun Zefanya a'ma welagaikhe mene a'nogo inom, ap henagan o Tuhan awi a'nogo kwe kugu kwe kagalek welagaukwa mene inom,

²⁵ raja onggwarek faget komotu mene inebe 7 nen o kota andiba welagaukwa mene inom, inogogwi panglima inom, at a'ma logolik it tentara inobaget lisu palhi lagaikhe mene inom, ap yi kain ti kain o kota andi anggelekwe welagaukwa mene inebe 60 nen mene inom senfisasukwa.

²⁶ A'nogo senfisasukwasik, aren it inebe mondogat omanogo at raja Nebukadnezar ambit o Ripla,

²⁷ wilayah Hamat oba andoma woginarek lagaukwa. Oba nen he, it yei weakhogo inoatik inebe pinggi inoatik hilinginafukwa. A'nogo nek afuni Yehuda mene it inanggweangma nen he hele warogo hugisa lagunem omanogo fisa lagaukwa mene andoma

^28-30 inebe seberogo re 4.600 nen. Nebukadnezar en he ap andoma hele warinapluk laga logolik he, yi'nogo woginarek lagaikhe. At ebe raja logolik melalinafi lagaikhe mene a'nogo tahun sabit meneba re ap inebe 3.023 nen woginarek lagaikhe, ap o Yerusalem mene re 832 nen engge at ebe raja werek mene a'nogo tahun delapan belas meneba werek kwelek woginarek lagaikhe. Nen, ap inebe 745 nen he at Nebuzaradan nen raja Nebukadnezar he ferinarek logolik were'ma nen enek he tahun 23 mene were'ma woginarek lagaikhe.

³¹ Tanggal 25 tugi nesanggo mene werek kwelek, nen tahun 37 meneba at Yoyakhin a'nogo hele warogo huginabi lagaikharek oba omanogo hugisa lagaukwama andoma werek kwelek he, at Ewil-Merodakh a'nogo o Babel oba raja menlagaikhe. A'nogo menlagaikhesik he, tahun a'nogoba re aren hun Yoyakhin oba elagaik anggasikhesik he ebe hele warogo were'ma omanogo nen lologo wulakfei wagik,

³² at oba fanorogo hilingfigik, isikhe. At Yoyakhin he it raja fena hele warogo huginabi lagaukwa mene omanogo sebelek kwelek arenek he yabu lego mene wogetikhe.

^33-34 At he, hele warogo logolik, asu laberek welagaikhe mene omanogo nonggologo herakfisaluk he, amu mene elok labesu hak welagaikhe, at ebe logolik andoma re, hun raja aiba omanogo sumburu ninggik, uang at ebe eluk logolik oba yi mene ti mene at endawimo amolo anggugu mene huniroageluk hundik-hundik wogetu mondok welagaikhe.