YEREMIA 49 - Allah Wene Fano Wene Hupla Inane

Amon oba unggum fesikhe wene

¹ Amon faget Tuhan nen ikhe mene re yi, ”Nenahalok kweang it inunggulenu Gad mene andoma re ap kembu Dewa Milkom fogeratarek mene nen telagasik werek nogo? Afuni Israel mene nen o andoma faget ili u mene re ekhe werek legen a?

² Oba nen he inenggi ekhe asi wesigin meneba re An nen afuni o Moab mene inawi kota Raba andi nen weim abolok firirip fararap ugunem holuageluk hilingisigin o. O kota andiba wolelenggenhogo pelafi logolik o andi esanggokwe desa-desa welagaikharek mene omanogo re endu nen felelenghogo nagain. A'nogo hilingfoumo re it Israel mene nen kweang andi attak aben telogo helasukwa mene a'nogo it inenggimo nen nekhengge telogo wanugun.

³ Yago hit afuni Hesybon mene yoma re, hinawi kota Ai a'nogo re mondogat wolelenggen etemo re le aga logoni o! Yago hit hemi o Raba hemi yoma re le hinane kwi kwerogo yakhikhi logoni o! Fong warogo logolik he hinasu karung su ikfahaluk logoni. Hit hinanggembu Dewa Milkom a'nogo inom ap imam-imam omanogo inom, nen it pemerintah ineabu legoma hilingiri'lagwi mene omanogo inom he hele warogo huginabi lagaikharek oba omanogo huginabi lagaikhanggere hit he hinebene hinagambut palogo hinendawi ou hilik laga logoni!

⁴ Hit afuni tiphogo hilingiti lagep lek mene yoma sani! Nenahalok hiren hineabu tonggo heiselekwe andoma faget wonoget fakhikhi lagep? Ninggi'nogo nen hiren hinenggi werek agalagep mene andomaba hinendawinggen himbirik welagep nogo? Hiren ikhi logolik ap misigen iluk ogo ekhe hoasugun iluk hobet hea wesu lek hak ikhi lagep andi re ninggi'nogoluk nogo?

⁵ Hit he An nen ap inobabut mondok weak mene yikwe tikwe mondogaren hinoba youk kwelabi wesuageluk hilinghinabigin. Hit hinebe lombogen longgo ugun iluk pugulik pagalik ugun mene re afuni nen ekhe hit andogorogo hinobagai wesugun lek.

⁶ Oba nen hobugen enek he afuni Amon mene inebe werek aple faget An nen halogo fisagain o. Iluk An Tuhan nen nane mondogat igi,” ikhe.

Edom oba unggum wogetikhe wene

⁷ Tuhan Omame Mondok Hokho mene a'nogo nen Edom faget ikhe mene re yi, ”Afuni Edom mene re inendawinggen fi furogo wenggelu mene re elo'legen a? Nen, ap komorinafarek mene nen he it inoba komo wene yagaisili'lagwi lega? Iren inobabut hebelogo hilingiri'lagwi mene omanogo re mondogat lek agama hea?

⁸ Yago, hit afuni Dedan welagep mene re sugulogo hinambotkwe heise lani o! Laluk he hinago logoino. An nen he at Esau ambisangma mene unggum wogisagain oba arat horogasi wagama re mondogat alperelogo fisagain.

⁹ Aben anggur enggen taganhi logolik he erembul kwe herakfisagarek lek, nen ap hinatarek mene nen o hubanggo hinasi we'luk halok he at endawimo anggikherek mene higithogoat hinakhikherek.

¹⁰ Oba nen An nen he at Esau ambisangma mene re mondogat alfulukwa kogouk hilingisogo figimo re, it inebe hinagokwe andoma mondogat he weinam enek agama re, it inebe ekhe hina'lasu re mondok elo'lek enek aga. Ap Edom mene inom, at agaila'lak erugwi inom, at inom horoksek mene mondogat he leget fisigimo re ap misigiluk ekhe linet lagi'lek.

¹¹ Hat Edom yi! Hat hagainafuri suarek mene andoma re An noba foumo re An nen halinafi logogin o. It hemi sogwe hat hunggulenu mene andoma nen he An noba inendawinggen tibet fouwak.

¹² Ap unggum inoba asu lek hak mene ogore unggum helagarek enego, hit he helogoin lek iluga? Eberogo nenat hit he unggum helogoin o!

¹³ An nen An nonggwarek nenuba hombuk palhi laginggere o kota Bozra andi re afuni nen herakfisaluk wulifarek oba mondok namelmel se'ma logogin. Afuni nen he endo yakfikhi logolik at enu igisogo homan fisikhi logogun. Nen, o sili horok horokwe andoma werek mene re mondok-mondok faget molulukhogo pigin o, iluk An Tuhan nen nane mondogat igi,” ikhe.

¹⁴ An Yeremia nen ikhi logolik, ”Yago, hit afuni Edom mene yoma re, an nesanggo holek were'ma nen he Tuhan nen wene ekhe yi'nogo ugunem holhi. Aren he ap misik ekhe ayonggo fikhesik yi afuni ti afuni inunggulenu lombok inoba lakfikhemo aren ikhi logolik: Weim yabi lobagaigen he weak-weak andogosi we'ni o! ap tentara esa logalfisaluk it inoba sineli kwini, iluk ikhi laga.

¹⁵ Tuhan nen hat hebere yi afuni ti afuni inanggele'ma nen homame lek mene hilingisogo hobagagik, nen afuni nen li'not hafu mene hilinghobagagik, igin o.

¹⁶ Haren legeisogo fakhikhi lagen andiba re honggwarek hebeat lalfakhikhi lagen o. Haren anggikhi lagen andem hakhogo hat hoba hinailot habi'lagwi mene ekhe werek lego. Hat hebe tom unggul uan meneba logoumo mene ogore, nen hawilun mondok yat patma po'lima sue rajawali awi wuterek hakhogo wurik logoilenma mene ogo re An Tuhan nen andoma nen pelak habi wesu hagaro. Iluk mondogat andoma Tuhan nen ugunem holhi o,” iluk yagaisigi.

¹⁷ Tuhan ane ikhi logolik, ”Enggin fenggin Edom oba asi wesigin mene andi re, mondok hunikhogo hilinglasiginmo re, afuni kwe andoma lagaikharek mene nen, ineil haluk he youk laluk, inailoti logogun.

¹⁸ O Sodom, Gomora inom o sili endep-endep kwe maserogo werek mene inom mondogat endu nen nasikhe hak Edom ogo a'nogo hilinglasigin. Ap misik ogo ekhe andoma logogin lek. Iluk An Tuhan nen nane mondogat igi ikhe.

¹⁹ Mene singa i Yordan esanggoma engga hi'mo omanogo nen siakhogo wulibi wagaresik domba engga o leikwe nilik nunggunem wagarek hak, An nen afuni Edom mene inoba kwi wesimbik ap Edom inap inonggwarek inanggweang oba nen pugulogo heise hela wulibuageluk hilinginabigin. A'nogo hilinginabimbik he, An nen ap misik ekhe it melalinafi logouwageluk menfoumo aren unggulenu andi mene melalinafi logogin. Ap sa nen An ninom higiretnabu hak nogo? Ap sa nen ambong serogo An ninom wene palu hak nogo? Ap kain mene re sa nen An nane oak lagalu hak nogo?.

²⁰ Arigini'mo re An nen afuni Edom mene faget inom, afuni o kota Teman mene faget inom inoba hilingfagain mene iluk wenggelogo figirik welagi mene andoma holini. It inagainafuri ogore, lirinapluk lamo re, afuni mondogat inailo asugun.

²¹ Edom ap amu mene inenggiba asigin mene andi faget afuni inane hokho-pokhorogo sagal-fagal hikhi logogun mene re, o kweangma mondogat abolok igin, afuni o andoma werek mene nen inane ngai-wai engge hilingiti logogun mene re i Laut Gelagah huli andomaba holugun.

²² Sue rajawali nen ogolabi langhogo sebeli wagarek hak selei menere a'nogo wesimbik o Bozra sebeli wesugun. Linggene andi sambul he tentara Edom mene re hemi omalik taginabuogeluk hilingitarek hak inailo nek asimbik inoak leigeti logogun,” ikhe.

O Damsyik oba unggum fagain isikhe wene

²³ Tuhan nen Damsyik faget ikhe mene re yi, ”Afuni o kota Hamat inom Arpad inom he wene weak mene holhasik inendawi fiti logolik inoak leigeri'lagwi. It inendawinggen suk sak ikhi logolik i laut founak lenggak hikherek hak nonghong ili'lagwi.

²⁴ Afuni Damsyik mene re inoak elekwe hololonghogo re, inailo nen heise lili'lagwi. It he, hemi omalik takhouwogeluk set hoporogo heinet weakhogo watarek hak hilingitu werek.

²⁵ Kota enu lego were'ma anggiluk werek awi a'nogo re yogondak he terenghogo afuni inareng le'ma hilinglaga.

²⁶ Linggene andi sambul he, aren ap souge re inawi kota ebekhe kwe andoma wa'lasugun, Nen, at agoromi tentara mene re, mondogat wolelenggen isagain.

²⁷ O Damasyik leget pa'leget waganek mene andoma re An nen endu noligin, raja Benhadad awi istana re endu oba mondok alkan kurogo hilingfagain. Iluk An Tuhan Nomame Mondok Hokho mene a'nogo nen nane mondogat igi,” ikhe.

Unggulenu Kedar inom, kota Hazor inom unggum helogoin isikhe wene

²⁸ Tuhan nen unggulenu Kedar inom o sili Hazor a'ma werek mene inom hun Nebukadnezar raja Babel mene a'nogo nen telhikhe mene omanogo faget ikhe mene re yi, ”Hat Nebukadnezar yi, haren he o Kedar pin kwi lambik he afuni timur fikhit werek mene andoma mondogat legerinabin o!

²⁹ It inanggo domba, unta inom, it inawi kemah ebe inom elonggoma weregengge inom hugul hela kwikhi logolik he, it inoba hane yi'nogo kwe'no, ’Ap sikhe fanghogo hinoba kwi wagaikha ari a!’ iluk hane hume'no,” ikhe.

³⁰ Hit afuni Hazor mene yoma re! An Tuhan nen ikhi logolik: ”Hit he weak-weak pugulogo la'luk hina'lasi lani o. Nebukadnezar raja Babel mene a'nogo nen he, hit hinoba pin kwi wesigiluk wene arat tekhogo ikhesik werego. Aren ikhi logolik,

³¹ ’Louwogen we'ni o! Niren he, ap iren anggikhi logolik nit he fano liokhogo logolik ninailo legengge welago, iluk anggili'lagwi mene andi inoba pin talogo inoasi louwogen we'ni o. It inawi kota re kwe ambe palek hokho mene ogo, kwe kelok ogo werek legenggere andi faget along werek fuk,’ iluk ili'lagwi,” yagaisigi.

³² Tuhan nen Nebukadnezar oba ane ekhe inom ikhi logolik, ”Haren he, it inangge unta inom, inanggo takhili'lagwi mene mondogat inom, hugul hela kwino! Ap inesi horokhogo palek mene re An nen yikwe tikwe telfol isagain. An nen he, it inoba enggin elo'lek mene yikwe tikwe mondogat lakfei wesigin.

³³ Hazor he, mondok-mondok faget nong asimbik were'ma re, obalik andoma re olomene hina'lasi laguba logogin. Ap misik ogo ekhe andoma logogin lek. Iluk An Tuhan nen nane mondogat igi,” ikhe.

Elam mene unggum inoba fisagain isikhe wene

³⁴ Hun Zedekia afuni Yehuda mene faget raja menlagaikhesik hilingitu kwelek horok aremnogo re Tuhan Omame Hokho mene a'nogo nen aneba o Elam kweang andi faget mel ikhe.

³⁵ Tuhan nen ikhi logolik, ”Ap Elam inap sikhe inenggi pagat weak logolik inomamerek welagaikharek inap ari re An nen inoasigin o.

³⁶ An nen o Elam oba andoma sogoi pogot unggut polikwe malikwe elikwe yikwe mondogaren funhogo lakfei wesigin, Lakfei wesumo afuni inebe re An nen unggut andem higithogo lakfisamo re, o andoma bene ap Elam mene sumburogo lakfisagain lek oba ekhe logogin lek.

³⁷ An nen he, afuni Elam mene nen it inaselei nen inoasuogeluk hilingiri'lagwi mene omanogo inoba inailo asuageluk hilingfisagain. An nen it inoba mondogat na'mage figimo re, it inebe abirengge wolelenggenhogo fisagain. It inoasuageluk An nen tentara lakfisa wesumo it inebe mondok felelenghogo legasugun.

³⁸ It inogogwi raja inom ap yabu legoma hilingiri'lagwi mene inom he, An nen wolelenggenhogo fisagain, nen, inanggweang oba andoma re takhta An nonggwarek hurek logogin oba wurogo fagain.

³⁹ Oba nen hobugen enek he it Elam mene andi re An nen halogo fisagain o. Iluk An Tuhan nen nane mondogat igi,” ikhe.