YEREMIA 47 - Allah Wene Fano Wene Hupla Inane

Tuhan nen afuni Filistin mene faget isikhe wene

¹ Raja Mesir mene nen o Gaza pin kwigi'lek werek kwelek Tuhan nen an noba it Filistin mene faget wene yi'nogo ikhe.

² Tuhan nen ikhi logolik, ”Futfeni o, it he o abel utara fikhiren i fu wagarek hak waga logolik o kota inom afuni werek mene inom, kweang abirengge inom, inoasi wesigin o. Afuni nen lebetninabuageluk hum ngai etik, afuni mondogaren lenggu figik, ugun o.

³ Iren he wam kuda eisok abolok ugu mene inom, kereta kilit samok erik lagu mene inom, roda abolok folongum-folongum lagu mene inom holugun. Afuni inaluendek mene re inomame legasimbik he inagainafuri inoba ekhe eberisogoin lek.

⁴ Afuni Filistin mene mondogat leget fisogoin huli arat asi waga, ma re Tirus inom Sidon inomen ekhe leberisogoin lek. An Tuhan nen he ap Filistin mene fena o Kreta ba andoma ineluk logogun mene re legetfisagain.

⁵ Afuni Gaza mene re esi le'ma hilingisogo fisagain. Afuni Askelon mene re inane igi'lek logogun. Nen, ap Filistin mene fena ineluk werek mene andoma re ki huli nen fong watu logogun nogo?

⁶ Hiren humeti logolik, ”Tuhan, Haren henggarok oba ninoasigiluk hilingitu mondok welagen mene andi re ki huliba palfagain nogo? Hat he hawulagap elema andoma sugulogo kwilaluk habolo'lek logoin o!” ikhi logogun.

⁷ Oba nen, An nen afuni Askelon i esanggokwe werek mene andoma inoasi lani iluk umo nen he, aren abolok igi'lek logou lek hago?” iluk ikhe.