YEREMIA 40 - Allah Wene Fano Wene Hupla Inane

Yeremia hun Gedalya inom welagaukwa wene

¹ At Nebuzaradan it Babel mene tentara faget inoe welagaikhe agun a'nogo nen an o Rama nen lologo nobagaikhemo were'ma Tuhan ane an noba yaganete. An he afuni Yerusalem mene inom Yehuda mene inom hele warogo woginarek o Babel lagunem aremnogo nenggi hele warogo wo'narek lagaukwama andoma welagi.

² Ap tentara Babel mene inoe kain a'nogo nen an namu nek wolnafesik ane ikhi logolik, ”Tuhan Allah hat heisena andi nen he o kweang yi mondogat weagerogo fagain iluk anggomo palhe o.

³ A'nogo isikhe mene a'nogo re Aren he hat hunggulenu mene weak hilingiti logolik At ane hologo hilingiti lagaukwa le'ma re yogondak hilingite ari o.

⁴ Yogondak he an nen hat henggiba kombi kelek welagen mene ari lologo hobagakhi lagi. Ma re hat hendawi halok he o Babel ninom logoin o, nen andoma an nen hat hebe fetharek logogin. Oba nen hat lagain habit halok he andi ogore enggin werek fuk. O kweang yiba nen he hat he yi kwe ti kwe loageluk hanggwe selek enek hilingi'mo re hat hendawimo anggikhi lagen higithogoat laga logogino o,” iluk yaganete.

⁵ A'nogo yaganetemo oan lagi'lek werek kwelek, Nebuzaradan nen ikhi logolik, ”Hat hendawi halok he ap Gidelya hun Ahikam amlogo hun Safan omba raja Babel mene nen he at ebe o kota Yehuda ba andoma faget gubernur logouwageluk menfikhe mene andi ambit sugulogo lan o. Lambik he hat hebe inom it afuni we mene inom hun andi hinom andoma logogun halok he fano aro, at he hat hendaimo anggikhi lagen mene higithogo yi kwe ti kwe laga logogin halok ogo we haren aro,” iluk yaganete. A'nogo ikhesik he aren sumburu kwemangge inom, nendawi fanorogo iluk inom, wo'netesik he an loageluk laknobagaikhe.

⁶ Laknobagaikhemo an a'nogo hun Gedalya ambit o Mizpa lagarik afuni o Yehuda kweang oba herakfuluk lagaikha mene inanggele'ma andomaat ninom welagi.

Gedalya o Yehuda ba gubernur welagaikhe wene

⁷ Raja Babel mene nen he at Gedalya o Yehuda ba gubernur logolik, afuni Yehuda mene inenggi mondok lek mene andoma werek mene omanogo ferinarek logouwageluk menfikhe. A'nogo menfikhemo nen he it ap tentara a'ma mene inom, lego mene inom raja Babel a'ma sebe isukwa lek mene omanogo nen Gedalya menfesikhe mene a'nogo faget inesanggo holhasik he,

⁸ it hun Netanya amlogo Ismael inom, Kareah amlogo Yohanan inom, hun Tanhumet amlogo Seraya inom, hun Efai againafuri o Netofa mene inom, hun Yezanya aiba Maakha mene inom he, ap it mene inom seberogo at Gedalya ambit o Mizpa lagaukwa.

⁹ Lagaukwama Gedalya nen it inoba yagaisikhi logolik, ”Hit he raja Babel mene enggiba asugunmo re hinailo asu fugo. Hit he nit ninonggwarek ninanggweang oba yoma logobagaigen he raja Babel mene amingmingengge a'ni o. Hit hinagap telek logogun iluk andi re an nenat yagahisikhi lagi.

¹⁰ Hit he o kota hinendawimo anggikhi lagep lombok andoma logolik he anggur kabokhogo fakhigik, e enggen inom, zaitun inom, kabokhogo fakhigik, hilingiti logogun. An he o Mizpa logolik ap Babel mene wagu halok he an nen afuni inenuba wene ikhi logogin o,” iluk yagahisigi.

¹¹ A'nogo agu kwelek omanogo re afuni Israel mene mondogat o Moab, Amon, Edom, kweang oba omanogo nen holhunemen he, raja Babel mene nen he it afuni Israel mene fena re Yehuda ba logouwageluk yagaisikhesik he hun Gedalya it faget gubernur logouwageluk menfikhe o, ugunem holhukwa.

¹² Andiba re it omanogo o it nalek-falek hilinglagaukwa kwe omanogo herakfuluk he nekhengge o Yehuda ba wagaukwa. Nen hun Gedalya ebere o Mizpa were'ma oba sebesi wagaukwasik, anggur enggen inom enggen ekhe amu mene inom hokho pokhorogo kabogeti lagaukwa.

Gedalya wasugun iluk abok palhukwa wene

¹³ A'nogo hilingitukwasi'mo nen he hun Yohanan inom ap sikhe fisogo mene inogogwi inom it inaselei mene inenggimo agaukwa lek mene omanogo Gedalya ambit o Mizpa wagaukwasik

¹⁴ iren ikhi logolik, ”Hun Baalis raja Amon mene a'nogo nen he hat hebe pinggi hoasuageluk hun Ismael mimingite mene andi re hat he helu welagen a?” iluk yagatukwa. Oba nen at Gedalya nen he iren ili'lagwi mene andi eberogo ili'lagwi iluk anggasikhe lek.

¹⁵ Andi nen at Yohanan nen linglong Gedalya ba yagati logolik, ”An nen hun Ismael andi wasi lagain fano, andi faget he sa nen hilingite iluk afuni nen ekhe inelu asugun lego. Nen aren hat hoasuageluk andoma re nenahalok herakfegendik welagen nogo? A'nogo asigin andiba re afuni Yehuda mene yoma kabogeta mene inom hat inom nekhengge nalek-falek asugun o, nen afuni Yehuda mene fena ineluk werek mene oma weaget inabigin mene faget hilingiri'lagwi o,” iluk yagatikhe.

¹⁶ Oba nen Gedalya nen ikhi logolik, ”A'nogo hilingisu fuk! Haren Ismael faget egen mene andi re heranhogo wene egen o!” iluk yagatikhe.