YEREMIA 39 - Allah Wene Fano Wene Hupla Inane

Yerusalem ap amu mene inenggiba agaukwa wene

¹ Ap Zedekia afuni Yehuda mene faget raja menlagaikhesik melalinafunem en enek he tahun sogo mene tugi nomolo meneba werek kwelek, ap Nebukadnezar raja Babel mene a'nogo agoromi weim yafarek mene esa logalhaluk o Yerusalem pin kwi wagaukwa.

² Nen, at Zedekia ebe raja werek kwelek enek tanggal sembilan tugi enggaminogonek mene tahun nesanggo meneba werek kwelek he o kota leget pa'leget waganek mene a'nogo selei mene nen langgukhogo lakfisagasik,

³ o Yerusalem sebeli kwisukwa. Ma re ap Babel inaben raja obaget yabu legoma hilingitarek inap omanogo re wagaikhasik kwe ambe palek mene enu Pintu Gerbang Tenggah agarek oba andoma lagaikhasik hurek welagaikha. A'nogo hurek were'ma nen he it inanggele'ma andoma re ap Nergal Sarezer inom, Samgar Nebo inom, Sarsekim o raja aiba faget kepala welagaikhe agun andi inom, Nergal Sarezer Rabmag inom, nen ap sikhe fisogo mene inogogwi fena inom andoma welagaukwa.

⁴ A'nogo were'ma raja Zedekia inom, agoromi tentara mondogat inomen agaikhe mene omanogo ineilenggen hagasik he iren heise wilibimbik hup a'nogo sambul enek o Yordan fanggong fena logoin iluk leil wati lagaukwa. Iren kwe ap raja werek awi yabu yagokwe andi nen he kwe ekhe ambe palek mene leget pa'leget waganek pire andem elugun hundik kwe andi nen wulibugun iluk hilingiti lagaukwa.

⁵ Oba nen he tentara Babel mene nen it muginarek lagakhasik he Zedekia a'nogo o Yerikho tonggoma nen fakfesukwa. Andi nen iren he waluk raja Nebukadnezar ambit o Ribla nen daerah Hamat oba andoma were'ma wagaukwasik he at oba unggum enggin mene fesukwa.

⁶ Nen o kota andiba nenat he at amlogomi ogo at onggwarek ebe eilenggen werek kwelek inoatukwaat, andi nen ap Yehuda mene yabu legoma hilingitarek inap omanogo ogore mondogat inoatukwa.

⁷ Andi nen he Zedekia a'nogo eilenggen tagulisasukwasik he hele warogo waluk o Babel lagaukwa.

⁸ A'nogo hilingitu kwelek aremnogo re ap Babel inaben he at raja awi sili a'nogo endu fatik, afuni inawilokwe mondogat endu nolhik, o Yerusalem leget pa'leget waganek welagaikhe mene omanogo meisak langgukhogo lakfisigik, hilingitukwa.

⁹ A'nogo hilingfuluk enek he ap o kota werek mene inom, nen it fena inonggwaregen it Babel mene inenggimo agaukwa mene inom he, Nebuzaradan tentara Babel mene faget inoe welagaikhe mene nen felelenghogo woginarek lagaikhe.

¹⁰ Afuni holhu mene fena inenggi mondok lek inelagaik mene omanogore, o Yehuda ba omanogo herakfisasukwama anggur yabu inom, yabu amu mene inom hilingiti logouwageluk wogisasukwa.

Yeremia hele fikhalogo wulakfesukwa wene

¹¹ Raja Nebukadnezar en he it ap tentara Babel mene inoe Nebuzaradan a'nogo wene yi'nogo melalogo wulabuageluk yagate.

¹² ”Yeremia andi herasi laluk he at ebe fanorogo halhi logoino. Hiren at oba yi'nogo ti'nogo ekhe hilingisu fuk, aren kinori'lagongge andoma higithogo nek hilingi'no,” iluk wene wulabuak ikhe.

¹³ Ma re at Nebuzaradan inom agoromi at a'ma mene inebe pire inenure Nebusyazban inom he Nergal-Sarezer inom, o Babel oba ap tentara ineabu legoma hilingitarek inap aremnogo nen he,

¹⁴ an nebe o raja awi istana ba ambe senggelek hokho meneba omanogo nen wo'narek he at Gedalya hun Ahikam amlogo, hun Safan omba andi nen nagap telogo naiba nobagai loageluk laknobagaga. Ma re an nebe afuni inanggele'ma andoma welagi.

Ebed-Melekh oba wene waretikhe wene

¹⁵ An nebe hele warogo o raja awi senggelek ambe hokho meneba omanogo werek kwelek andoma re Tuhan nen an mimingnafi logolik,

¹⁶ ap Ebed-Melekh awi Sudan mene andiba ikhi logolik he, Tuhan Omame Mondok Hokho mene, Allah afuni Israel mene ineisena nen yi'nogo ikhe ino, ”Attak an nane isigi hak he, An nen o kota yiba enggin mene fei wesigin o, sikhogo welagaikharek mene re lego. Nen, haren he andoma agunem heilenggen hagain aro.

¹⁷ Oba nen he hat hebe re An heisena Tuhan nen nawe a'ma fetharek logogin. Hat hebere ap haren hailorinafi lagen mene andoma inoba wogisogoin lego.

¹⁸ An nen hat hagap telogo hobagaumo re aben hat hebe hoasugun lek. Haren hendawinggen An noba himbirik were'ma re, hat heluk andi agap telek logogin. Iluk An Tuhan nen nane mondogat igi,” iluk yaga'no ikhe.