YEREMIA 38 - Allah Wene Fano Wene Hupla Inane

Yeremia pogole habuli'mo pelafukwa wene

^1-3 Tuhan nen he wene yi an nen afuni inoba yagaisoageluk yaganete, ”Kota yi re An nen tentara Babel mene inoba wogisamo re iren omame leget fogoin. Nen afuni iluk ekhe o kota elonggoma andoma logogun mene re weim oba nen hea, athe sumburu nele nen hea, ou amben weak mene nen hea wa'lasugun. Oba nen ap sa nen wulibi laluk ebe o Babel mene inenggimo wogisugu halok he, at ebe wati'lek herakfoumo re agap telek logogin o,” ikhe iluk yagaisigi. An nen a'nogo yagaisugunem a'nogo re Sefaca hun Matan amlogo a'nogo inom, Gedalya hun Pasyhur amlogo a'nogo inom Yukhal hun Selemya amlogo a'nogo inom Pasyur hun Malkia amlogo a'nogo inomen holek welagaikha.

⁴ Andiba re ap yabu legoma hilingitarek inap aremnogo nen raja were'ma lagaikhasik yagati logolik he, ”Eberogo nen he ap yi nen wene ili'lago mene andoma re ap tentara inom nen ap amu mene inom o kota yiba inaberali kwelabi'lago hilingi'mo re at ebe pinggi wasugun o. Aren afuni leberisili'lagore fuk, oba nen he alomat fisili'lago o,” iluk yagata.

⁵ A'nogo yagatama re at raja Zedekia nen onggo ikhi logolik, ”Fano! An nen he hit hinanggwe paligin lego, hit hinendawimo anggegep andi hakhogo hilingi'no o,” iluk yagaisasikhe.

⁶ A'nogo ikhemo re iren an wo'narek he hele warogo i mogo ekhe at raja amlogo Malkia nen mene raja awi istana o ambe senggelek hokho meneba welaga mene a'nogo elema pela'nafa. Pogole andi i yenggelek le'ma fesinek hilingi'mo an nebe fesi omanogoba ubuk igi.

⁷ Andem oba re ap o Sudan mene ekhe re at raja aiba andoma yabu hilingiti laga. Enu re Ebed-Melekh ouwali waganek welagaikhe, at esanggo holhunemen he an nebe pogole andiba pelakfagama werek ugunem holhe. A'nogo holhikhesik he at raja ebe re kwe enu Pintu Gerbang Benyamin agarek oba andem wene palhuba yagaisugunem he,

⁸ at Ebed-Melekh a'nogo andoma lagasik raja ba ikhi logolik he,

⁹ ”Neisena hebe kain mene, ap andoma nen hilingita mene andoma re mondok weakhogo hilingita o. Iren he nabi Yeremia a'nogo i mogo yenggelhuba iluk habulik meneba pelafa. Enggere nunggu mene ogo kota yiba mondogat lek agama re at ebe eberogo nen he wa'lasigin logou hago,” iluk yagate.

¹⁰ A'nogo yagatikhemo raja nen at Ebed-Melekh oba yagati logolik, ”Ap inebe henagan mene hondoginapluk he at Yeremia ebe oan wa'lagi'le'ma lisogo wulakfei lani o,” iluk yagatikhe.

¹¹ Ma re at Ebed-Melekh en ap inebe henagan mene inayonggo fikhesik inom he o yi mene ti mene fagarek oba omanogo lagaikhasik kain mining mene ekhe wanhasik he iren heleba eiselogo an pogolema were'ma pelakneta.

¹² A'nogo pela'netasik at Ebed-Melekh en ane pelafi logolik su tilipsek mene nomak fena-fena fuluk kain a'nogoba puget fouwageluk yaganetemo, an nen aren yaganete mene a'nogo higithogo hilingiti.

¹³ A'nogo hilingitimo re iren an nebe imogoluk habulhaba a'nogo nen lisogo liak nobagai wagaikha. A'nogo hilingitosik he an nebe wo'narek o raja awi istana o senggelek ambe hokho meneba omanogo hele warogo nobagagama re andoma welagi.

Zedekia nen he Yeremia nen komotnabuageluk kino yagatikhe wene

¹⁴ A'nogo were'ma linggene ekhe sambul he at raja Zedekia nen ap miminginafi logolik an nebe wo'narek at were'ma Tuhan aiba nen kwe ambe henaganek meneba loageluk ikhemo lagimo nen he, aren an noba yaganeti logolik, ”An nen hat hoba wene ekhe heinok wokheagain enggere haren ekhe sebelhi'lek weinamhogo nek yagane'no o,” iluk yaganete.

¹⁵ A'nogo ikhemo re an nen onggo ikhi logolik, ”An nen eberogo mene yagahesigin oba nen haren an nebe pinggi noasu hago, nen an nen komo wene yagahesigin oba nen neisena haren higithogo hilingisigin lek logou hago,” iluk yagati.

¹⁶ A'nogo igimo nen he at raja Zedekia nen ane linglong an noba ikhi logolik, ”Allah mondogat eluk werek, Allah nen ineluk hilingfisikherek mene andi enuba an nen hombuk palhi laginggere an nen hat hebe hoatik, nen aben hoasuageluk ap inenggimo hobagagik, igin lego,” iluk yaganete.

¹⁷ A'nogo ikhemo an nen Zedekia ba ikhi logolik, Tuhan Omame Mondok Hokho mene, Allah afuni Israel mene nen apne wanharek mene a'nogo nen he yi'nogo ikhe, ”Haren ambi ap Babel inap andi inoba sebesigin halok he hat hebe hoasugun lego, nen kota yi ogore endu fasugun legaro. Nen, hat inom, it heisok erokwe mene inom he hinagap telek logogun.

¹⁸ Oba nen he haren it inenggiba asigin habit halok he o kota yi re ap Babel mene inenggimo asigin o. Iren he endu farik wesumo re mondogat alkan kurogo ninggi logolik neisena hat hebe ogo heise wilibu elo'legat asigin o,” iluk yagati.

¹⁹ A'nogo igimo re at raja nen onggo ikhi logolik, ”An he ap nit meneba nen ap Babel mene inebikhit asi lagaikha mene andoma inoba nailo nen hilingiti lagi o. Andi re an nebe it wogisili'lagunem iren an nebe weaget nabinogoluk hilingiti lagi o,” iluk ikhe.

²⁰ Andi ikhemo an nen onggo ikhi logolik, ”Lego, neisena hat he it inenggimo hobagagun lek. Neisena haren he Tuhan nen hilingi'no ikhe mene andoma hilingi'nogen kino yagaheti lagi o. Nen hat a'nogo hilingisigin halok he wene ekhe mene ekhe mene andoma mondogat hilinglarik lagunem he neisena hat hebe hoasugun lego.

²¹ Oba nen neisena haren hebe it inenggimo wogisagain lek halok he hobuk asigin mene faget he Tuhan nen an noba inuk niikhe.

²² Inabi wokhagarek andi hakhogo higi mene andi re hemi neisena hawi silimo welagaikharek mene omare felelenghogo woginarek he raja Babel mene were'ma lagunem higi. A'nogo lagunem it kwe laga logolik yi'nogo ikhi lagaikha, ”Raja re agaila'lak mene nen endawinggen nonghonget faga, a'nogo hilingitasik iren sebelogo fisogo werek. Yogondak he at eisok taganhogo fesimo wula'lakhogo fikhemo re it omanogo higil agaikha o, ilik lagunem neilenggen higi o,” iluk yagati.

²³ An nen ekhe inom ikhi logolik, ”Neisena hat hagwe, hagainafuri inom mondogat he raja Babel mene nen woginarek logoin o. Neisena hat hebe ogo re it inoba nen longgo igin lek. Neisena hat hebe re raja Babel mene nen senhobagambik, o kota yi re mondogat endu nolugun o,” iluk yagati.

²⁴ A'nogo igimo nen, at Zedekia nen ikhi logolik, ”Hat hebe hoasinogo re nit ninane ogo mene ari faget he afuni yagaisa fugo.

²⁵ Nen, ap yabu legoma hilingitarek mene omanogo nen holhunem en he, an hat ninom ninane mata iluk ugunem holimbik he, it hat hambit wesimbik niren ogo mene andoma heinok wokhabugun. Iren he hat hebe hoasugun lek iluk hombuk palhunem haren it inoba mondogat andoma tindelisagain halok he,

²⁶ haren ikhi logolik, an he hele warogo fisagarek oba andoma nekhengge kwelaknabi logoin andi re nabiren yagahisigi o, iluk yagaisano,” iluk yaganete.

²⁷ A'nogo ikhemo were'ma nen he ap yabu legoma hilingitarek inap omanogo wagaikhasik he, an heinok wo'nabi wagaikha. Ma re, an nen he at raja nen ino iluk ikhe mene aremnogo higithogoat yagaisigi. Andiba re, ap misigen ogo ekhe nit raja ninom ninane mato mene omanogo holha le'ma re, iren yi'nogo ti'nogo iluk ekhe hilingita lek.

²⁸ An a'nogo o ap raja awi istana senggelek ambe hokho meneba omanogo hele warogo nobagai lagaikhama were'ma nen enek he o Yerusalem a'nogo ap selei mene nen telasukwa.