YEREMIA 36 - Allah Wene Fano Wene Hupla Inane

Hun Barukh en buku yinggilik mene Tuhan Awiba nen pilingitikhe wene

¹ Yoyakim hun Yosia amlogo a'nogo raja menlagaikhesik Yehuda mene melalinafi logolik tahun enggaminogonek meneba were'ma, Tuhan nen an noba ikhi logolik,

² ”Buku yinggilik mene misik ekhe wanimbik he An nen hat hoba afuni Israel mene inom Yehuda mene inom, yi afuni ti afuni inunggulenu lombok faget inom, yagaheti mene andoma lisu palogo fein o. An nen attak at Yosia ebe raja logolik ferinarek welagaikheba attak-attak yagatigi mene a'nogoba nen erorasimbik he yogondak ya huli yagaheti lagi mene andoma mondogat palogo fein.

³ An nen enggin mene it Yehuda mene inoba lakfei wesigin mene andoma faget inesanggo holhambik he it inobabut hebelugun logou hago. Andiba re it inaweak hilingiri'lagwi mene inom, ina'mageba hilingiri'lagwi mene inom andoma re An nen sagalogo leget fisagain o,” ikhe.

⁴ A'nogo ikhe andiba re an nen hun Barukh ap Neria amlogo a'nogo woletigisik he Tuhan nen an noba ikhe mene omanogo naneba a'nogo yagatimo re at Barukh en he buku yinggilik mene a'nogoba palfikhe.

⁵ A'nogo palogo fikhemo an nen wene yi'nogo wareti, ”An he Tuhan nen At Awi wuri'mo kwigin lek ikhe o.

⁶ Enggere, linggene afuni sumburu ninggi'lek werek oba a'nogo asi wagu halok hat hebe andoma lambik he hane hokhoba an nen naneba yagaheti mene andoma pilingisumo re Tuhan nen an yaganete mene andoma inesanggo holugun. Hat hebere ap Tuhan Awi wuri'mo werek mene andoma inom, nen o kota amukwe nen weri'lagwi mene andoma inomen hane ugunem fanorogo holuba halok menla'luk yagaisano.

⁷ Haren a'nogo igin andiba re iren Tuhan oba samban igik, it ina'mageba hilingiri'lagwi mene omanogoba nen inendawinggen hebelhik, ugun logou hagaro. Tuhan nen he it inoba a'mage lagaikhesik he it unggum inoba fagain iluk inanggomo kagalhe o,” iluk yagati.

⁸ A'nogo yagatimo re an nen yagati higithogo re at Barukh en wene a'nogo o Tuhan Awi wuri'mo elonggoma omanogo nen pilingisogo enu salhe.

⁹ At Yoyakim raja Yehuda ba menlagaikhesik ferinarek were'ma nen enek he tahun fuabengge tugi sogo meneba werek kwelek, afuni omanogo Tuhan nen endawi hundik hilinginabuageluk he sumburu ninggi'lek welagaukwa. Afuni Yehuda mene inom, afuni o kota-kota amukwe mene wagaukwa mene omanogo inom inebe mondogat he inambe heang fesukwasik welagaukwa.

¹⁰ A'nogo were'ma re at Barukh en buku yinggilik meneba yi wene ti wene faget palek mene omanogo abirengge pilingisogo yagaisugunem he afuni mondogaren holek welagaukwa. Wene andi pilingitikhe re o Tuhan Awi hun Gemarya ap Safan amlogo eabu negara faget sekretaris welagaikhe mene a'nogo nen yabu hilingiti lagaikheba andoma nen pilingitikhe. O yabu hilingiti lagaikheba andi senggelek ambe hokho meneba nen abel ambol fikhit, ebekhe o Tuhan Awi wuri'mo kwagarek mene kwe enu Pintu Gerbang Baru a'nogo horokhogo andem were'ma o andi nen pilingite.

Buku yinggilik mene a'nogo ap pemerintah mene inoba enu salhikhe wene

¹¹ Mikhaya hun Gemarya amlogo Safan omba andi nen holhunemen he at Barukh en he Tuhan ane ikhe mene buku yinggilik meneba pilingite mene a'nogo holhikhe.

¹² A'nogo holhikhesik he at ebe ap raja awi silimo kantor sekretaris negara faget lisu palharek oba omanogo lagaikhe. Lagunem he andoma re ap yabu legoma hilingitarek inap he wene palhi lagaukwa. Delaya hun Semaya amlogo inom, Elnatan hun Akhbor amlogo inom, Gemarya hun Safan amlogo inom, Zedekia hun Hananya amlogo inom, Elisama ap lisu palhu elu mene welagaikhe agun andi inom, ap ineabu legoma welagaikharek inap fenakwe inomen wene palhi lagaukwa.

¹³ A'nogo were'ma re at Mikhaya nen he hun Barukh en o Tuhan Awi wuri'mo nen pilingite mene omanogo mondogat tindelogo yagaisikhe.

¹⁴ A'nogo yagaisikhemo re it ap yabu legoma hilingitarek inap omanogo nen he ap enu Yehudi hun (Netanya amlogo, Selem omba, hun Kusyi) ambu andi re Barukh en buku yinggiligengge aren pilingite mene andi waluk wesuageluk yonggo lakfesukwa. Ma re Barukh en he buku a'nogo waluk it inambit lagaikhe.

¹⁵ Lagaikhemo re iren ikhi logolik, ”Hu'lame o, hu'lasimbik he buku yinggilik mene ari nit ninoba ogo pilingisogo yaganisan,” iluk yagatukwa.

¹⁶ A'nogo yagatikwama at Barukh en he mondogat pilingisogo yagaisasikhemo re it omanogo inendawi fitukwasik he iren Barukh oba ikhi logolik, ”Niren wene yi faget raja were'ma eluet fei logoin o,” iluk isukwa.

¹⁷ Andi nen iren at heinok wokhikhi logolik, ”Haren wene andoma re ninggi'nogo palhen, fanorogo yaganisan o. At Yeremia aneba yagahetemo a?” iluk heinok wanhukwa.

¹⁸ A'nogo heinok wanhukwama at Barukh en onggo yagaisikhi logolik, ”Eberogo, ane misik higik yoma palek mene oma re Yeremia nen aneba yaganete o, nen an nen he lisu amusuba buku yinggilik mene ari palhi yi o,” iluk yagaisasikhe.

¹⁹ Andi isikhemo re iren ikhi logolik, ”Hat inom Yeremia inom he hina'lasi lano. Nen, hit hina'lasugun oba andoma re aben ogo ekhe hisanogo,” iluk yagatukwa.

Raja Yoyakim en buku yinggiligengge a'nogo endu nolhikhe wene

²⁰ A'nogo hilingitasik he ap yabu legoma hilingitarek inap omanogo nen he buku yinggilik meneba palegengge a'nogo re senggelek hun sekretaris Elisama nen a'nogoba fesukwasik he it inebe raja ambit lagaukwasik wene a'nogo faget eluabesi lagaukwa.

²¹ A'nogo hilingitama re raja nen buku andi wani loageluk at Yehudi ba mimingitikhemo wani lagaikhe. At Yehudi nen he Elisama awi senggele'ma a'nogo nen wani lagaikhesik he raja eilhanem inom, ap yabu legoma hilingitarek inap era'lukwe maserogo mendek welagaukwa mene omanogo inom inelokhoma nen pilingitikhe.

²² Andem sambul he tugi sogo meneba were'ma o salim oba re raja ebe endu nonggwalogo sogoi sakhagarek oba omanogo hurek were'ma pilingitikhe.

²³ A'nogo at Yehudi nen he henagan ugan hakhogo pilingitemo nen he raja nen weim endep mene ekheba re asiok aremnogo tiliphogo wanhikhesik he endumo hugisa kwisikhe. Aren ariginhu werek kwelek enek he, buku yinggilik mene a'nogo mondogat tiliphogo endu nolhikhe.

^24-25 A'nogo hilingitunem at Elnatan inom, Delaya inom, Gemarya inom he, ineisenaba a'nogo hilingitu lek iluk kini wani agama nen he at raja nen it inane holhi'legat hilingite. At raja ebe inom nen it yabu legoma hilingitarek inaben inomen he buku a'nogoba palek mene inesanggo holha mene omanogo faget inailoratik, nen inendawimo warigik, hilingitarek mene omanogo a'nogo ekhe hilingita lek.

²⁶ A'nogo hilingiti'legengge nen he raja nen at amlogo Yerahmeel a'nogo inom, Seraya hun Azriel amlogo a'nogo inom, Selemya hun Abdeel amlogo a'nogo inomen he an inom Barukh an faget lisu pali'lago mene a'nogo inom fa'ninobagauwageluk miminginafe. Oba nen he Tuhan nen nit ninebe hinakninobagaikhe.

²⁷ At raja Yoyakim en buku yinggiligengge an nen Barukh oba nane nen yagatu kwelek palhe mene a'nogo endu nolhikhemo re, Tuhan nen an noba re,

²⁸ buku yinggilik amu mene ekhe wanimbik he, buku attak meneba palek welaga aremnogo higithogo paluageluk yaganete.

²⁹ Tuhan nen an noba ikhi logolik, an nen raja ba yi'nogo yagasuageluk ikhe, ”Haren he buku yinggilik mene andi mondogat endu nolhen, nen haren Yeremia ba heinok wanhi logolik, ap raja Babel mene we'luk o kweang yi weagerogo figik, afuni inebe inom, inanggo yi mene ti mene mondogat tamukhogo leget figik igin o, iluk he nenahalok palhen nogo? Iluk heinok wanhi.

³⁰ Andiba re hat Yoyakim yi, An Tuhan nen hat hoba nane yagaheti lagi. Hat hambisangma mene nen tagomangge nen he at raja Daud ambisangma mene iluk misikhogoluk ekhe raja logogun lego. Hat hebe warek he hukhea wilibumo re linggene re mo aik hoba fikhi logogin, nen hubanggo re aigengge nen hambuk hiikhi logogin.

³¹ Hat inom, it hat hambisangma mene inom, ap hat ha'ma yabu hilingiri'lagwi mene inom he hiren hinaweak hilingitep mene andomaba An nen unggum hinoba fagain o. Hat hebe inom, nen afuni Yehuda mene inom, Yerusalem mene inomen he An nen hinoba fei wesigin iluk fouget figirik welagi mene a'nogo faget futfikhi lagep le'ma re, An nen he hit mondogat hinoba enggin mene andoma fei wesigin o,” ikhe.

³² A'nogo ikhemo re an nen buku yinggilik ket mene ekhe wanhirik he, an nobaget lisu palherek mene hun Barukh a'nogo wogetimo aren he an nen naneba ugu mene omanogo mondogat palogo fikhe, andi aren buku attak meneba palek welaga mene inom nen wene hobuk ane omame mene ekhe inomat palogo fikhe.