YEREMIA 32 - Allah Wene Fano Wene Hupla Inane

Yeremia nen kweang onggo palhikhe wene

¹ Hun Zedekia re afuni Yehuda mene faget inoe raja menlagaikhesik ferinarek logolik 10 tahun were'ma, nen hun Nebukadnezar he afuni Babel mene faget inoe raja menlagaikhesik ferinarek logolik 18 tahun werek kwelek andem he, Tuhan ane an noba yaganete.

^2-3 Andem sambul he tentara Babel mene re o Yerusalem pin kwi wagu kwelek. An nebe re raja Zedekia nen he an noba hikhip hikhi logolik, haren Tuhan nen yi'nogo ikhe, ”Raja Babel he An nen obokhogo lakfisamo re o kota yiba sebeli wesimbik logogin.

⁴ Nen raja Zedekia re longgo igin lek. At ebere raja Babel mene enggimo asimbik raja andi at ebe inambit lambik at amunek emberek wene ane ikhi logogin.

⁵ Andi nen Zedekia re o Babel waluk lamo andoma werek kwelek enek he An nen unggum wogosigin. Nen, aren ap Babel mene andoma inom weim yabigin iluk hilingisigin oba nen he aren ambisangma higithogo hilingisigin lek, iluk An Tuhan nen nane mondogat igi ikhe o, iluk hane menfikhi lagen. Iluk aren an nebe hele warogo re at raja awi istana solombonma senggele'ma omanogo kwelaknobagaikhemo andoma were'ma nen wene andi ikhe.

⁶ Tuhan ane an noba ikhi logolik,

⁷ ”Hat heisena agot Salum Hanameel a'nogo re an nambit kweang o Anadot wilayah Benyamin nen meneba andoma onggo palin iluk yaganesigiluk weri'logo ikhe. Andi re an he it nagaila'lak andoma ninom horoksek hilingi'mo re, kweang andem faget an nen onggo palu higit obaat onggo paloageluk ikhe.

⁸ Andiba re Tuhan nen ane ikhe mene higithogo re, Hanameel a'nogo nen an nebe raja awi istana solombonma omanogo were'ma nen wagasik he aren an noba kweang andi onggo palin iluk mimingnafe. Andiba re nendawimo nen he Tuhan nen ane eberogoat an noba ikhe anggigi.

^9-10 Ma re an nen kweang a'nogo hun Hanameel oba uang perak mene ebe tujuh belas nen oba onggo palhi. A'nogo palhirik he an nen ap ineilenggen werek kwelek onggo palhu mene iluk wolinafirik he sertifikat kweang onggo palhi mene a'nogo meterai oba to'morogo nenggi amusu figirik cap enegengge figirik he, uang aremnogo enggin ilirenggethigi.

¹¹ Andi nen an nen sertifikat kweang onggo palhi mene enegengge meterai oba to'morek engge, kweang andi awene yi'nogo ti'nogo asigin iluk mel ero yigit-yigit aga iluk mel palek werek mene a'nogo wanhi. Nen an nen surat ekhe ale'mene foto copy hilingisogo enegengge lek mene omanogo ogore wanhiat.

¹² Waluk he surat pire aremnogo an nen he Barukh hun Neria amlogo, hun Mahseya omba a'nogoba wogoti. An nen he at Hanameel inom it ap ineil werek kwelek onggo palhi mene omanogo inom, nen ap o solombonma hurek welagaikha mene aremnogo ineilhanem inom wogeti.

¹³ It ineil werek kwelek aremnogo re an nen hun Barukh a'nogoba ikhi logolik,

¹⁴ ”Tuhan Omame Mondok Hokho mene, Allah Israel mene ineisena a'nogo nen ikhi logolik he haren sertifikat pire mene arem, surat ebe inom, foto copy hilingik mene arem inom, wanimbik he tahun uanhogo logouwakhogo re waganogo warung kweang meneba hilingik mene misik ekhe wanimbik elema kwelagaisogo fein o.

¹⁵ Tuhan Omame Mondok Hokho mene, Allah Israel mene ineisena nen ikhi logolik he, hobuk he o kweang yiba o wurik inom, kweang inom, anggur yabu inom onggo palhik, hunitik ikhi logogun ikhe o,” iluk yagaisigi.

Yeremia nen samban isikhe wene

¹⁶ Sertifikat kweang onggo palhi mene omanogo mondogat Barukh wogetirik, an nen samban ikhi logolik,

¹⁷ ”Tuhan henupogot mene neisena, Hat Homame Hokho mene a'nogoba pogot inom kweang inom elalhigin. Haren yi'nogo ti'nogo hilingisu lek mene ekhe werek fuk.

¹⁸ Haren he ap inebe hokho pokhorogo inoba hendawi hundik hilinginafi lagen mene inugisikhi lagen, oba nen Harenat ogore afuni ineisugwi inagaisawi nen weak hilingituba unggum wogisikhi lagenat. Hat he Allah Mondok lego mene logolik esin mene welagen. Henu re Tuhan Homame Mondok Hokho mene andi, neisena.

¹⁹ Haren hilingisigin iluk wenggelogo fikhi lagen mene andoma re elok mondogat, nen Haren hilingiti lagen mene andoma re mondok elalin mene hilingiti lagen. Afuni nen hilingiri'lagwi mene Hat heilenggen mondogat isaluk it hilingiri'lagwi mene higithogo Haren unggum wogisikhi lagen.

²⁰ O attak andoma Haren mondok elalin mene o Mesir en hilingiti lagagindik yogondak afuni Israel mene were'ma ogo nen inunggulenu amu mene were'ma ogore, Haren hilingitu mondok welagenat. Andiba re yogondak he o ekhema-ekhema Hat henu nek sagarek werek.

²¹ Hat Homame hokho mene a'nogoba hagainafuri o Mesir en woginarek wulibi wagagin. Hat henggi pisat haluk homame hokho meneba, hilingisu elo'lek mene, elalin mene wesa polanhogo hilingitunem he afuni haselei mene re inoak leiget fisikhi lagagin.

²² Kweang mondok fano heisele'ma yi re Haren it ninombawi inoba wene warisasigin higithogo wogisasigin.

²³ Oba nen he it o kweang yiba sebeli kwi wagaukwasik logolik, iren Hat hane ugu mene omanogo hologo hilingiti lagaukwa lek. Haren yagaisugu mene andoma mondogat he iren we misikhogo iluk ekhe hilingiti lagaukwa legat. Andiba re yogondak he Haren yi enggin ti enggin inoba lakfei waga lagen yi o.

²⁴ Ap Babel inaben he o kota sebeli kugun iluk leget pa'leget maserogo wanhasik he yogondak it pin kwili'lagwi. Weim en inom, sumburu ouwagen inom, ou amben weak meneba nen inom inoba foumo inomame legasumo re o kota yi it inenggiba asigiluk werek. Haren hane egen mene omanogo mondogat tiphogo nek hilinglarik lagunem yogondak Hat heilenggen enegat hikhi lagen andi o, neisena.

²⁵ A'nogo ari'lagoba nen he, Tuhan Lego Mondok welagen mene neisena, o kota yi ebe yogondak ya re ap Babel mene nen telouwogeluk hilingitu kwelek kweang yi ap ineilenggen oba nen, an nen onggo paluageluk Harenat mimingnafen o neisena,” iluk samban igi.

²⁶ A'nogo igimo nen Tuhan nen an noba ikhi logolik,

²⁷ ”An he Tuhan Allah afuni mondogat faget ineisena welagi o. An nen hilingisu lek mene ekhe werek fuk.

²⁸ Kota yi re ap raja Babel mene Nebukadnezar andi inom, agoromi sikhe fisogo mene inom, telogo heloageluk An nen herakfisagain. Herakfisamo re iren kota yi labesi wesimbik he,

²⁹ endu fasugun. Andi re afuni nen An na'mage kwelafi logolik o andoma tum oba nen he iren Baal faget amben fano mene dupa nolhik, nen tugwi kembu obaget anggur agai hilingitik, hilingiri'lagwi aiba andoma mondogat alkan kurogo leget fagain o.

³⁰ It Israel mene andi inero agaikhe huli andoma nen enggere Israel inap inom Yehuda inap inomen he An nendawimo nabit anggikhi lagi mene omanogo nek hilingitu werek. It inobabut mondok weak mene omanogo nek hilingiri'lagwi andiba re, An na'mage kwelabi'lagwi.

³¹ O kota yi wusuogeluk eroratukwa huli nen enggere afuni o ma werek mene nen he An na'mage kwelabi'lagwi. Andi nen he An nen it mondogat leget fisagain iluk, igi andi.

³² Afuni Yehuda mene inom Yerusalem mene inomen weak hilingitu mene inom, raja inom, ap pemerintah inobaget yabu legoma hilingitarek mene inom, it imam en inom, nabi inomen he weak mondok hilingiri'lagwi andi nen.

³³ An nen hundik-hundik yagaisugu welagiba nen, iren An nane yagaisikhi lagi mene omanogo inabiren holhi'legengge fut figi'lek logolik, An nebe hera'nobagaluk werek andi.

³⁴ A'nogo hilingitu logolik he o An nobaget hilingituba iluk wuta mene a'nogo re iren tugwi kembu mondok hebak inafe mene omanogo fei kagarek andiba re mondogat emerogo fili'lagwi.

³⁵ Iren he Baal faget mezbah o Hinom fanggongma wutasik he it inagainafuri re dewa Molok oba warogo wogeri'lagwi. A'nogo hilingiri'lagwi mene andoma re An nen inom yagaisasigi lek oba nen, nen An nendawimo nen wenggelhikhi logolik iren mondok hebak inafe mene andoma hilingisugun iluk afuni Yehuda mene weak mondok hilingiri'lagwi mene andi mel he wenggel hasigi lek oba nen hilingiri'lagwi,” iluk ikhe.

Inendawimo eberek logouwageluk abok wene warisasikhe mene

³⁶ Tuhan Allah Israel mene ineisena a'nogo nen an noba ikhi logolik, ”Yeremia, inunggulenu Israel mene nen ikhi logolik, weim oba nen inom, sumburu ouwagen inom, ou amben weak mene nen inom o kota yiba raja Babel mene enggiba asigin o, iluk ili'lagwi. Oba nen he yogondak An nen nane igin mene yi hesanggo holin.

³⁷ It inunggulenu yi re An nen it inoba na'mage lagaluk nanini inoba fikhi lagi mene andi re, it inebe telfol isasigikwe andoma nen andogorogo inambotkwe fisa wesigin. An nen o kweang yiba woginarek wesimbik he it inendawinggen yamukhogo logouwageluk hilingisogo fisagain.

³⁸ It he An nagainafuri mene asumo, An he it ineisena Allah asigin.

³⁹ Iren An foge'nabuogeluk inebe misik inobabut misigat a'luk hilingiti logouwageluk wogisagain mene andi re, inenggi mondok-mondok andoma faget An noba inailorogo hilingiti logouwageluk hilingfisagain. Andiba re it inebe inom iren tagomangge mene inom fanorogo nek logogun.

⁴⁰ An nen wene mondok-mondok wasigin mene andi re it ninom wasugun. An nen it inoba fanorogo hilingfisugu mene andi re palfagain lek. Iren An oboget nealuk lanogoluk he inendawinggen abirengge nen An noba inailorogo welagik, esinet nobagaluk legeisogo nobagagik, hilingiti logouwageluk hilinginabigin.

⁴¹ An nen it inoba fanorogo hilingfisugu mene faget nagaiyek welagi hilingi'mo re, it o kweang yiba mondok-mondok logouwageluk An nendawinggen eberogo meneba inom, Nobabut higit oba inom, Nagaiyek welagi meneba inom o yi fanorogo hilingisogo fisagain.

⁴² An nen it inunggulenu yi inoba enggin mene hilingfisigi andi hakhogo re, An nen fano mene wogisagain iluk abok yagaisasigi mene higithogo wogisikhi logogin.

⁴³ Afuni nen ikhi logolik kweang yi re o leimo afuni le'ma nen eluk elugengge inom werek lek aiba iluk agarek, nen kweang yi re it Babel mene inenggimo agama o agarek. Oba nen he o yoma kweang oma re onggo wanhik, hunitik ikhi logogun o, iluk An nen igi.

⁴⁴ Kweang onggo wanhu mene faget sertifikat fouget fuluk he meterai to'morogo inenggiba lisu palfigik, amusu figik, hilingfuluk omamerogo iluk he afuni ineilhanem en hilingiti logogun. Andoma re o wilayah Benyamin oba inom, o Yerusalem haningisogo desa-desa andoma bene inom, kota tomkwe werek mene andoma bene inom, tom erokwe werek mene andoma bene inom, Yehuda ba o sili selatan fikhit andoma bene inom, a'nogo nek hilingiti logogun. Unggulenu yi re An nen it inanggweang yiba nen inebe halfisagain o. Iluk An hineisena Tuhan nen nane mondogat igi,” ikhe.