YEREMIA 31 - Allah Wene Fano Wene Hupla Inane

Afuni Israel mene sugulogo inonggwarek inanggweang oba wagaukwa wene

¹ Tuhan ane ikhi logolik, ”Inenggi ekhe wesigin meneba re An he afuni Israel mene inunggulenu mondogat faget ineisena asigin, nen it he An nagainafuri asugun.

² Ilingage leimo andoma nen he it wa'lagaikharek mene oba nen wulibi wagaukwa mene andoma inoba An nen nendawi hundik hilinginafirek mene ekhe inugisasigi. Afuni Israel mene set walogo koma logou he iluk heratu were'ma,

³ An nebe yatma nen it inoba weinam asi wagagi. Hit afuni Israel mene yi sani, An he o endamen engge hit hinoba nendawi hundik hilinghinafi lagimo re, hobuk mondok-mondok faget nendawi hundik hilinghinafi logolik logogin mene a'nogo inuk hisikhi logogin o.

⁴ Hit hinunggulenu mene re attak hilingik welagagip hakhogo An nen enu lego logouwageluk hilingisogo fagain o. Hiren he nekhengge pinggong rebana waluk he hinagaiyek oba wuni wati logogun.

⁵ Nen hit hineabu anggur yabu o Samaria tom ebene waganogo yakfakhaluk enggen palikhi logogun.

⁶ Eberogo nenat, hinenggi ekhe wesigin meneba re ap o kota kagalek werek mene nen Efraim tom oba nen humeti logolik, ”Nit he o Sion nineisena Tuhan Allah ambit lagauwogen we'ni o, iluk ikhi logogun,” ikhe.

⁷ Tuhan nen ikhi logolik, ”An nagainafuri Israel mene andoma re hinagaiyekhogo wuni wati logoni o, afuni inunggulenu ekhe re abelma hangge meneat he hit hinunggulenu Israel mene andi nek he esin mondok andi nen he, nineisena Tuhan nen it Israel mene abu'nengge ineluk werek mene omanogo inagap telinafe iluk wuni warogo fageti logoino o.

⁸ An nen it inebe nekhengge utara fikhiren woginarek wesigin, it inebe kweang wurep-wurep andoma nen waganogo andogerinabi wesigin. Afuni ineilenggen humunik mene inom, ap ineisok hambelek mene inom he it inom seberogo wesugun, andi nen hemi ineagwi ket takhogoin mene inom, inomalik inalabutmo mondogat wurik asigin mene inom ogore, inom wesugunat. It inebe re esa hokhorogo o kweang yiba wesugun.

⁹ A'nogo waga logolik le arik-arik wagunem he, An nen koninafik, inendawimo fanorogo hondogoisogo fisa wagik, igin o. An nen he i hokhorogo werekwe nen hondoginarek wagik, kweang tonggorekwe nen it ineisok unggut tunghogo wara lekwe hondoginarek wagik, igin. Ariginigin andi re An he it Israel mene ineisena welagi nen Efraim he An namlogo manggusa mene werek andi nen hilingisigin o,” ikhe.

¹⁰ Tuhan nen ikhi logolik, ”Yago, hit yi afuni ti afuni hinunggulenu lombok andoma nen holini o! I laut fena fikhit andoma An nane ikhi lagi mene andi yagaisa lani. An nagainafuri An nen telfol isasigi mene omanogo re, An nen andogorogo fisa wesimbik afuni nen domba halharek hak, An nen halinafi logogin.

¹¹ An nagainafuri Israel mene re ap inunggulenu ekhe inomame hokho mene nen ferinarek were'ma, inagap telinafigisik fikhalogo fisasigi.

¹² It he punu Sion oba waga logolik, An nen gandum inom, amusu inom, anggur inom, sapi inom domba inom, wogisagain mene andoma faget inelokhe heanerogo waga logolik inagaiyek oba wuni warik wesugun. It inebere yabu i amusu werekwe hilingik welagarek hakhogo hilingik logolik, iren yi mene ti mene inelokhoma werekhogo nek logogun.

¹³ Linggene andi sambul helime silerik he inendawimo inagaiyek oba inawuni warikhi logogun. Nen ap yaman mene inom souge mene inom he, An nen inendawimo konogo hilingfisamo re inagaiyekhogo nek logogun. Fong watu mene andoma agamhogo re inagaiyegetu mene hilingfisagain, nen inendawinggen heiselhi logolik werek mene andoma inendawimo heanerogo werek mene hilingfisagain.

¹⁴ It imam he An nen sik-pikhogo hilingfisugu meneba inoba homot fisikhi logogin, nen it An nagainafuri re An nen fanorogo halinafuba inomamerogo logogun. Iluk An Tuhan nen igi o,” ikhe.

Afuni Israel mene inoba Tuhan nen endawirinafikhe wene

¹⁵ Tuhan nen ikhi logolik, ”O Rama nen lenggu lengga ugunem inesanggo holhik, inendawinggen heiselhi logolik ngai wai liafunem holhik, ili'lagwi. He Rahel eagwi inebe mondogat longgogama re, konu re elo'lek logolik li le agu mondok werek.

¹⁶ Hat le aga lagen mene andoma palfigik, heilamusu tetik in o! Haren againafuri faget a'nogo hilingiti lagen mene andoma re we alomarogo fuk. Hat hobaget ambisangma onggo logogin, hat hagainafuri re o it inaselei mene inanggweang oba andoma nen nekhengge wesugun.

¹⁷ Hat hagainafuri inawi eroma wesugun hilingi'mo re, hat he hobuk faget hendawimo eberek logoin o,” iluk yagati laga.

¹⁸ Hobuk an nesanggo holhunemen he afuni Israel mene re inendawimo heiselogo, inane ikhi logolik he, ”Tuhan nineisena, nit he wam maro eil oan wati'lek mene hangge hilingik welagagu o, oba nen he niren futfuluk hilingisuageluk he Haren yaganisasigin, nen yogondak he nit sugulogo Hat hoba wesuogeluk hilingiti lago, nineisena. Ma re, Tuhan Allah nineisena, Haren nit nekhengge wo'ninabin o.

¹⁹ Niren Hat herakhobagaluk mondogat wilifugu meneba nen Haren komotninafi lagen andiba re, niren hilingito mene andi faget ninendawimo warikhi lago. Haren nit unggum wo'nisegenma re nit ninendawinggen heiselhu nen ninunggul wamborogo welago. Nit ninebe alageba nenat weak hilingiti lagoma re, nit ninenggali nen sebel fakhogosik welago o, nineisena,” ugunem holhi.

²⁰ Israel ao, hat hebe re An nomalik nendawinggen hundik mene o, nendawi hundik hilingik welagi mene, nendawinggen tulem mene welagen. An nen hat wenakhe'luk hagut palhealugen he, nendawi ou agunem hat hobaget ebet hiugu welagi. Hat he An nen mondogat nendawit habimbik fanorogo hilinghobagagin.

²¹ Ebekhe kwe enegenggerogo hilingfilik laluk he kwebene eilmo fanorogo alilingge wokhigik menerik lano. Nen o attak hat kwe laga-lagagin kwe a'nogo hera'no. Yago hat Israel he haiba eme o. Hawi kota eroma attak welagagin oba a'nogo eme o.

²² Yago, hit hinunggulenu An noba tiphogo hilingiti lagep lek mene yi re, hit hinendawinggen pire pare ikhi logolik werek kwelek enek he ki huli logogun nogo? Hemi nen ap ineyaga welagaikharek hak, An nen o kweangma yoma ekhe hilinglagarek lek mene mondok ket mene hilingisogo figi o,” iluk ikhe.

Allah againafuri mene hobuk inangge sikhogo logogun isikhe wene

²³ Tuhan Omame Mondok Hokho mene, Allah Israel mene ineisena a'nogo nen ikhi logolik, ”An nen nagainafuri andoma attak welagaukwa hakhogo inenu legeisogo fisigi halok he, o Yehuda ba inom nen desa-desa haningisogo kwelabek mene andoma nen inom afuni nen ikhi logolik, ”Tuhan andom punu horek mene o Yerusalem oba At ebe werek oba nen mondok fano horek oba andi fanot fikhi logouwak,” ugunem holugun o.

²⁴ Afuni inebe re o Yehuda ba inom desa-desa andoma bene inom logogun. Andoma re afuni yabu wanharek mene inom, nen wam domba, sapi tatarek mene inom logogun.

²⁵ It inoba lebelekhogo werek mene re An nen inoba fisokhogo hilingfisikhi logogin, nen sumburu nele nen inomame lega'luk werek mene re An nen inoba homot fisikhi logogin.

²⁶ Andem sambul afuni nen ikhi logolik, ”An nogo homokhogo igirik he noba mondok fisok ikhe o,” iluk ikhi logogun.

²⁷ An Tuhan nen ikhi lagi hilingi'mo re, lingge ekhe asi wesigin meneba re Israel mene inom Yehuda mene inom inanggweang oba andoma re An nen afuni sik-pikhogo hilingfisigik, nen inanggo yinik-hunik mene hokhorogo wogisigik, igin o.

²⁸ An nen attak it halogo fisikhi lagarik, hobugen it henogo fisigik, meisalogo fisigik, wolelenggenhogo fisigik, isigi hakhogo, An nen it inomame mene hilingfisigik, wurogo fisigik, hilingisigiluk he serinarek mondok logogin.

²⁹ Andem sambul he afuni nen ikhi logolik, ”Ap ineisugwi nen enggen arikweak mene nunggunem inagainafuri inaikliraterek andi hak hilingiti logogun lego.

³⁰ Athe ap sa nen enggen arikweak mene nunggu halok he at onggwarek amuat aikliti logogin. Afuni inebe lombok he inonggwarek inaweak hilingisugun obaat inebe wa'laga logogun o,” ikhe.

³¹ Tuhan nen ikhi logolik, ”Linggene ekhe asi wesigin oba re An nen afuni Israel mene inom Yehuda mene inom, ninom wene ket mene wasugun.

³² Oba nen wene An nen inombawi inoba o Mesir en woginarek wulibi waga logolik warisasigi mene andi higit he fuk. Iren An faget he hemi inaguni hakhogo hilingik welagagi, oba nen he An ninom wene watugu mene a'nogo iren taganhogo hilingiti lagaukwa.

³³ An nen nagainafuri Israel mene ninom wene ket mene wasugun mene andi ebere yi: An Nawene melalek a'nogo it inendawinggenma figik, inendawimo lisu palfisigik, igin o. An nebe re it ineisena Allah asigin, nen it he An nagainafuri asugun.

³⁴ It inebe mondogaren inalue mene inom, yenggerugwi mene inom An nebe mondogat inelu andi nen he, afuni ekhe nen it ekhe inoba An ineisena Tuhan nebe inelu asuageluk yagaisikhi logogun mondok lego. Iren mondok kwanirogo hilingiti lagaukwa mene andoma An nen sagalogo legetfisambik he, it inaweak andoma oba ekhe ebesigin mondok lego. Iluk An Tuhan nen nane mondogat igi o,” ikhe.

³⁵ Ma re o linggene selegerati logouwageluk he Tuhan nen mo hilingisogo figik, nen hubanggo selegerati logouwageluk he tugi inom, hesagalenggen inom hilingisogo figik, isikhe. I laut yenggele'ma abologethugunem ha'labu founalhi logolik eindep ane hokho mene ikhi logouwageluk hilingisogo fesikheat. At enu re Tuhan, Omame Mondok Hokho mene andi o.

³⁶ Tuhan nen wene wati logolik, ”Pogot oba inom kweangma inom hilinglaga logouwageluk fesigimo werek mene oma agameti'lek werek kwelek he, inunggulenu Israel mene ogore lek agi'lek logogun o.

³⁷ Linggene ekhe sambul pogot pori ilirengge walhigik, nen kweang tik warek mene ari ero pilingitik hilingisumo nen he, o andi sambulat An nen afuni Israel mene inanini mondok weak hilingiri'lagwi mene iluk tamakhogo lakhinobagaile o,” Iluk Tuhan nen nane mondogat igi o, ikhe.

³⁸ Tuhan nen ikhi logolik, ”Inenggi ekhe asi wesigin oba re o Yerusalem elonggo mondogat helep oba wurogo liabek mene menara enu Hananeel oba nen he pikhit kwe ambe enu Pintu Gerbang Sudut ikhi lagaukwa huli andoma mondogat An nonggwarek nawi kota a'nogo ambotkwe wusugun.

³⁹ Andem en huli-huli re punu Garep fikhit lagasik andoma nen he nunggulik he o Goa ba andoma.

⁴⁰ O tonggo andi mondogat afuni salinafukwe iluk welagarekwe andoma inom, weak-weak engge hugesi lagukwe andoma inom he, i Kidron ima nen yabu waganekwe andoma kwe nen he kwe ambe palek enu Pintu Gerbang Kuda abel timur fikhit andoma re An nobaget enogo fogoin. Kota Yerusalem andi re afuni nen hobuk molulukhogo figik, wolelenggenhogo lakfigik ugun mondok lego,” ikhe.