YEREMIA 30 - Allah Wene Fano Wene Hupla Inane

Tuhan nen againafuri inoba abok wene warisasikhe wene

¹ Tuhan Allah Israel mene ineisena a'nogo nen,

^2-3 an noba ikhi logolik, ”Linggene ekhe wesigin meneba re An nen nagainafuri Israel mene inom Yehuda mene inom it inebe werek aple faget hal fisagain enggere, An nen yagaheti mene andoma mondogat he buku misik mene ekheba palogo fein o. An nen it nekhengge woginabimbik o kweang it inombalak wogisasigiba andoma fisa wesigin. Ma re kweang andi it nekhengge eise asimbik logogun. Iluk An Tuhan nen nane mondogat igi o,” ikhe.

⁴ Tuhan nen againafuri Israel mene inom Yehuda mene inom inoba ikhi logolik,

⁵ ”An he ap inoak leigeti logolik heinet wari'lagwi mene andoma inane arat holhi o, ap inendawinggenma hambukhogo welagi'lek, inailorogo nek hilingiti logolik inane ngai waiyengge liabi'lagwi mene andoma arat holhi.

⁶ Yago, wenggel hambik menenei fanorogo ebe'ni o! Ap en inomalik taginabumo re elok anggegep? Elo'lego. Ariginik halok he nenahalok ap andoma inelokhe heiselogo inalabut inenggi nen senegeisogo, hemi inomalik taginabuogeluk hilingitarek hak hilingiri'lagwi nogo?

⁷ Yago, linggene fulu polan mene a'nogo arat asi waga, linggene andi inom ekhe higirabesu elo'lek mene. It An nagainafuri nen he linggene andi re inendawinggen fit lasigin mene, oba nen it inebere An nen inagap telinabigin o,” ikhe.

⁸ Tuhan Omame Mondok Hokho mene a'nogo nen At againafuri inoba ekhe yagaisikhi logolik, ”Linggene andi mondogat asi wagu halok he e pia inomoloba helangsek mene andi re An nen sombolisagain o, nen hele homago mene re An nen lolisagain. Hit he ap pok mene inamingmingengge a'luk logogun lego.

⁹ Hit he An hineisena Tuhan Allah nobaget hilingiti logolik logogun, nen ap misik ekhe Daud ambisangmangge mene re An nen raja menfagain.

¹⁰ An nagainafuri Israel mene re hinailosu fugo! An namingmingengge Yakub he hoak leigesu fugat! Hat inom hat hambisangma mene nen tagomangge mene inom he o kweang mondok yatma hit hinenggi hele warogo hinobagasukwama andoma nen hinagap telogo hinobagagin. Hit hinambotkwe hinaiba wesimbik hinailo legengge logogun. Hiren hinailoratu mene ekhe logogin lek, hinabolok legengge fano liokhogo logogun.

¹¹ An wesimbik hit hinagap telogo hinobagagin. Ap inunggulenu An nen hit telfol hisasigikwe mene andoma re An nen mondogat leget fisagain, oba nen hit he a'nogo hilinghinabigin lek. Eberogo nen hit he unggum andiba nen ekhe fulelugun lego, oba nen he An nen hit hinoba unggum wokhisagain mene andi re higithogo nek werek higithogo hinoba fagain. Iluk An Tuhan nen nane mondogat igi o,” ikhe.

¹² Tuhan nen againafuri inoba yagaisikhi logolik, ”Hit hinoba ou mene re enggin hokho mene hilinglaga, nen hinoumo faget he obat ekhe werek lek.

¹³ Ap misigen ogo hit fano hilinghinabugun mene ekhe werek legat, hit hinoba hinoumo pot andoma faget he obat mondok lek, ma re fano asugun iluk eberek logou lek hago.

¹⁴ Hit hinendawi hundik mene omanogo nen hit hinoba inonggorasugun, iren he hit hinoba ekhe ebet hisogoin lek. Hit he eberogo nenat hinaweak mondok hokho pokhorogo logolik, hiren kwanirogo hilingiti lagagip mene re oba li'loukhogo hilingi'mo re, afuni selei mene inoba hilingfisagarek hak An nen hinoasi wagagisik unggum enggin hogo wokhisasigi o.

¹⁵ Hit he hinoba ou welagep oba nen fano asugun mene ekhe werek lek enggere, ou welagep mene faget hinane sagalhik, kwetik ikhi logou fuk. Hit hinaweak hilingiti lagep mene inom, kwanirogo hilingiti lagep mene inom mondok hokho pokhorogo hilingik andiba re An nen unggum a'nogo wokhisasigi andi.

¹⁶ Oba nen hit pilhisikhi lagaikha mene andoma yogondak he it ogo mondogat pilisagain. Nen hit hinaselei mene re hele warogo huginabi lagaikharek oba andoma fisa lagain. Nen ap hit sebel hinobagakhi lagaikha mene andi re An nen ogo sebelogo fisagain, nen it inenggi abisak wanharek mene nen weaget hinafi lagaikha mene andi re An nen ogo weagerinabigin aro.

¹⁷ Hit hinaselei mene nen ikhi logolik, ”Sion he hugusagama re afuni nen ekhe eberisogoin lego. Oba nen hit he An nen hinebe fanot hinobagagin, hit hinoumo andoma An nen obat oba fano hilinghinobagagin o,” ikhe.

¹⁸ Tuhan ane ekhe inom ikhi logolik, ”Hit An nagainafuri re nendawi hundik hilinghinabigin, nen hit hinanggweang hinonggwaregen mene omaba re An nen halogo hinobagagin. O Yerusalem nekhengge wutik, nen ap raja were'ma re nekhengge pugunetik, igin.

¹⁹ Afuni andoma logogun mene nen he, wuniba An foget nafik, inagaiyegen inanggilugetik hilingiti logogun. An nen it inalong anggaluk legeisogo fisikhi logouwageluk hilingfisamo re, iren ekhe li'norinafi logogun lek, it inebe re ekhe inom oba louk ikhi logogun.

²⁰ Hit hinunggulenu mene re attak hilingik welagaikhe hakhogo mondok-mondok logogun, nen An nagainafuri tagomangge mene mendek logogun. Hit mondogat sebelogo hinobagali'lagwi mene andoma re An nen unggum wogisagain.

^21-22 Raja hit fethinarek logogin mene re hit hinunggulenu mene logogin. An nen at ebe nambit wesuageluk woletunem he selekhogo An noba horokhogo waga logogin. Ap sa nen ekhe amu endawinggen wenggel fuluk ambong serogo An nelokhoma asi wesu hak anggegep? Hit he An nagainafuri mene asugun. Nen An he hit hineisena Allah asigin, iluk An Tuhan nen nane mondogat igi o,” ikhe.

^23-24 Tuhan a'mage lagaikherek mene re i fu wagunem inom, sogoi sielu wagunem inom hak hilingi'mo re, ap inaniniba hilingitarek mene re inoaterek. Ma re Aren hilingisigin iluk endawimo wenggelherek mene a'nogo oan hilinglagi'lek werek kwelek he palfikherek mondok lego. Ma re hobugen enek he Aren hilingiterek mene andoma hiren elok fut fogoin o,” iluk ikhe.