YEREMIA 27 - Allah Wene Fano Wene Hupla Inane

Babel oba enggin welagaikhe mene Yeremia hasuageluk mimingitikhe wene

¹ Hun Yosia amlogo Zedekia a'nogo o Yehuda ba raja menlagaikhesik ferinarek werek kwelek aremnogo, Tuhan nen an mimingnafi logolik,

² hele e agap meneba hilingitik, e pia re e meneba hilingitik, uluk he an noroa'ma helemit fouwageluk ikhe.

³ Aren ekhe re wene it ap raja-raja Edom, Moab, Amon, Tirus, Sidon inap omanogo inoba yagaisoageluk ikhemo re ap it inayonggo o Yerusalem hun Zedekia ambit wagaukwa mene andoma bene nen yagaisoageluk ikhe.

⁴ An nen it yagaisikhi logolik, Tuhan Omame Mondok Hokho mene, Allah afuni Israel mene ineisena a'nogo nen mel ikhe:

⁵ ”An Nomame Hokho meneba inom, nen Nalong welagi mameba inom pogot kweang inom, afuni inom, ineluk werek engge andoma mondogat elalhigi mene andoma re ap ekhe An nelokhoma fano hilingiri'lago halok he at andiat wogosigin o.

⁶ An nenat yi afuni ti afuni inunggulenu lombok andoma An namingmingengge Nebukadnezar raja Babel mene andiba wogoti. Nen, wam yi mene ti mene ogore at a'ma logouwageluk wogotiat.

⁷ Yi afuni ti afuni inunggulenu lombogen he at obaget hilingitik, at amlogo obaget hilingitik, at omba obaget hilingitik, ugu werek kwelek enek he, o kweang andi sebelasigin huli andoma logogin. Andem sambul he it inunggulenu Babel mene re inunggulenu inomame werek mene andoma inoba inom, raja hokho mene inoba inom inobaget hilingiti logogun.

⁸ It inunggulenu ekhe, athe kerajaan ekhe at Nebukadnezar a'ma sebe ugu aple inabit mene halok he An nen weim oba nen inom, sumburu ouwak oba nen inom, ou amben weak meneba nen inom, unggum inoba fugu werek kwelek enek he, it inunggulenu andi mene nen raja Babel mene a'ma sebe ugun huliba asigin.

⁹ Iren ikhi logolik, nit he ninabi ba nen inom, eluk heimengge nen inom, athe elalinhogo hilingiterek meneba nen inom yaganisikhemo o, iluk ugun oba nen mene ogore, it andi nabi nen halok ogo it amu mene nen halok ogo raja Babel mene a'ma sebe ili'lagwi lek iluk ili wanharek mene andoma inane holu fugo.

¹⁰ Iren hit lalhinafi logolik he o kweang yatma wokhinarek logoin o. An nen he hit hinonggwarek hinanggweang oba oma nen mugusogo wulak hinobagaumo re hit hinebe mondogat hineiloak legasugun.

¹¹ Oba nen he it inunggulenu ekhe raja Babel mene a'ma sebe uluk at obaget hilingiti logogun mene re An nen it inanggweangma andoma logouwageluk herakfisamo re, iren ineabu helaluk yakhikhi logogun. Iluk An Tuhan nen nane mondogat igi o,” ikhe.

¹² Hun Zedekia raja Yehuda ba welagaikhe mene a'nogoba ogore an Yeremia nen wene nekhe mene andiat yagatigi. An nen ikhi logolik, ”Hat he raja Babel mene a'ma sebe in o. Hat hebe inom heisena inom hinagap telasuakhogo re at andi ane hologo hilingitik, it inunggulenu andoma mene inoba hilingitik, ikhi logoin o.

¹³ Tuhan nen ikhi logolik, it inunggulenu ekhe raja Babel mene a'ma sebe ugun lek mene re weim oba nen inom, sumburu ouwak oba nen inom, ou amben weak meneba nen inom, wa'lasugun o, ikhe. Andi nen he neisena hat inom, afuni andoma inom a'nogo wa'lasugun andi re nenahalok nogo?

¹⁴ Ap nabi andoma nen hat neisena lalhafi logolik, raja Babel mene a'ma sebe u fugo iluk elele wokhafi logolik ili'lagwi mene andoma re inane holhu lego.

¹⁵ Iren ikhi logolik nit he Tuhan enuba ikhi lago ili'lagwiba nen he iren ineranhogo wene ili'lagwi. Tuhan ebe nen ikhi logolik he Aren it lakfisigi lego ikhe. Andiba re Arenat neisena hat inom ap nabi neisena hat lalhabi'lagwi mene andoma inom yugunat tel-fol hisambik leget hinobagagin o,” iluk yagatigi.

¹⁶ Andi nen an nen it imam-imam inoba inom nen afuni holhu mene inoba inom Tuhan nen yi'nogo ikhe iluk yagaisigi, ”Nabi andoma nen ikhi logolik yi mene ti mene o Tuhan ailoba were'ma hilingitarek engge omanogo re we eil misik logombik o Babel en hobuk ambotkwe waluk wesugun o, iluk agarek mene andoma re holu fugo. Iren he ineranhogo wene ili'lagwinggere,

¹⁷ hiren it inane holu fuk! Hit hinagap telek logobagaigen he raja Babel mene a'ma sebei we'ni o. Nenahalok o kota yi wolelenggen esigin nogo?

¹⁸ Nen, it andoma eberogo nabi werek halok, nen wene Aren yaganisikhemo ugu halok he, iren An kino yaganeti logolik yi mene ti mene An nailokwe inom, raja ebe were'ma inom, andoma o Yerusalem en waluk Babel logoin lek iluk he An Tuhan Nomame Mondok Hokho welagirek mene a'nogo noba yagane'lebo.

^19-22 An Tuhan Nomame Mondok Hokho welagi mene, Allah afuni Israel mene ineisena a'nogo nen mondogat tegeti logolik, yi mene ti mene andoma re werek kwelek enek he, An nen it inoba ebesimbik fut fisagain huli asigin o. Andi sambul he An nen inambotkwe woginarek inebe werek oba yi fisa wesigin. Iluk An Tuhan nen nane mondogat igi o,” ikhe. Yi mene ti mene Tuhan aiba werek engge andoma ebere: Waruk perunggu mene hilingisogo liabek mene inom, kereta inom, nen amu mene o Tuhan awi andiba inom o kota andiba hugul kwikhi logolik abunengge herakfisasukwa mene inom enek he raja Nebukadnezar hun Yoyakim amlogo Yoyakhin raja Yehuda ba welagaikhe mene a'nogo inom, it Yehuda inap inogogwi ap hokho-hokho inap omanogo inom o Yerusalem en woginarek Babel lagaukwa sambul andi re waluk lagaukwa le'ma andoma welagaikhe.