YEREMIA 24 - Allah Wene Fano Wene Hupla Inane

E ara enggen si ugu pire meneba kwalek were'ma hasikhe wene

¹ Linggene ekhe sambul at Yoyakhin hun Yoyakim amlogo afuni Yehuda mene inobaget inoe raja welagaikhe mene a'nogo inom, ap pemerintah Yehuda mene inobaget yabu legoma hilingitarek inap omanogo inom, yi mene ti mene elalharek inelu inap omanogo inom, yabu hilingitu inelu inap omanogo inom he, raja Babel mene Nebukadnezar a'nogo nen o Yerusalem en hele warogo o Babel woginarek lagaukwasik were'ma nen, Tuhan nen inabikanggo wokhagarek hak ekhe weinamet fikhe. Weinamet fikhemo hugunemen he si ugu pire meneba re e ara enggen kwalogo o Tuhan awi wuri'mo elokhoma omanogo were'ma higi.

² Higirik he si ugu attak meneba re e ara enggen mondok fano mene nek kwalek welaga, nen si ugu ekhe pire nek meneba re e ara enggen fili mene kwale'ma na mondok elo'lek hilingi'mo higi.

³ Ariginik were'ma higimo nen, Tuhan nen an noba ikhi logolik, ”Yeremia hat hegen andi re nena mene hegen?” iluk heinok wo'niikhemo, an nen onggo ikhi logolik, ”Tuhan neisena, andi re e ara enggen higi o. Mondok fano mene re fani fano mene nek welaga, nen weak mene re mondok fili mene nek were'ma re, nunggu aple mondok elo'lek were'ma higi o,” yagati.

⁴ A'nogo yagatimo Tuhan nen ekhe inom yaganeti logolik,

⁵ ”Afuni o Babel hele warogo woginarek loageluk herakfisigi mene andoma re e ara enggen fano mene oma higit werego. A'nogo were'ma re An Tuhan Allah Israel mene ineisena nen he it fanorogo logouwageluk hilinginabigin.

⁶ An nen he it halinafu logombik, nekhengge woginarek o kweang yiba wesigin. An nen it meisalogo fisagain lek oba nen he, wurogo fisagain. Nen An nen henogo lakfisagain lek oba nen he, awi yagaisogo fisagain.

⁷ An nen it inendawinggen An ineisena Tuhan welagirek mene a'nogo noba eberek logolik hilingiti logouwageluk wogisagain o. Andiba re it inendawinggen abirenggeba An noba sugulogo wesumo re it inebe An nagainafuri asumo, An he it ineisena Allah asigin o.

⁸ Oba nen he hun Zedekia raja o Yehuda ba werek mene andi inom, ap yabu legoma hilingiri'lagwi inap at ebe inom horokhogo hilingik inap andoma inom, nen afuni Yerusalem mene fena o yoma logoligen o Mesir o kuluk logoin mene inom he, An nen e ara enggen fili mene, na mondok elo'lek oma higit hilingfisagain o, iluk An Tuhan nane mondogat igi,” isikhe.

⁹ An nen mondogat wil-wal hambik inebe alomat fisamo re yi afuni ti afuni o kweangma welagaikharek mene mondogaren he inailoti logogun. O it loageluk hilingfisagain oba andoma lagunem he afuni nen it faget puliarinafik, endo yagaisogo pelaginafik, sebelfisigik, hilingiti logogun. Aben homan ikfisikhi logolik he it inenu hombuk palogo ikhi logogun.

¹⁰ An nen he it inoba weim inom, sumburu ouwak inom, ou amben weak mene inom, lakfei wesumo re, it inebe mondogat wa'lasugun, o kweang An nen it inombalak inoba wogisasigi mene ariba re ekhe logogun mondok lego, ikhe.