YEREMIA 21 - Allah Wene Fano Wene Hupla Inane

Yerusalem omame lek asigin mene faget abok wene isikhe wene

¹ Raja Yehuda mene Zedekia a'nogo nen ap imam Pasyur hun Malkia amlogo a'nogo inom, imam Zefanya hun Maaseya amlogo a'nogo inom an nambit loak iluk lakfisa waga. It waga logolik wene yi'nogo yaga'no ikhemo waluk wagaikha.

² ”Nebukadnezar raja Babel mene a'nogo agoromi sikhe fisogo inap he, nit ninawi kota yiba labesi wagaikhanggere, Tuhan nen nit faget ninggi'nogo hilingi'ni iluk yaganisoagen kino yagasin o. Tuhan nen nit faget elalin mene ekhe hilingitik, nen at Nebukadnezar agoromi inom mugusogo inambotkwe lakfisigik, hilingisin iluk kino yagaom o,” iluk lakfei waga.

³ A'nogo ikhemo re Tuhan nen an noba yaganeti logolik, ap wene waluk wagaikha mene andem en he,

⁴ Tuhan afuni Israel mene ineisena Allah a'nogo nen yi'nogo ikhe iluk Zedekia yagasi loak, ”Zedekia, An nen he ap hat hagoromi sikhe sige weim yabugun mene fik foukhogo logolik, it ap raja Babel mene inom Kasdim mene inom hinawi leget endakwe labesi wagaikhasik werek mene andoma hinom yabugun iluk welagep mene andoma An nen oak waganogo fagain o. Tentara haren mene inasikhe andoma re An nen o kota enggen tulem andoma kaboget foumo logogin.

⁵ A'nogo kaboget fembik An nebe ninomat hit ninom weim yabugun o. Nenggi pisat hambik nomamerogoat, naniniba, na'mage het-pethogo, hit ninom weim yabugun o.

⁶ Afuni o kota yiba werek mene re An nen pinggi inoasigin, afuni inom wam yi mene ti mene mondogat he ou mondok amben weak meneba nen wa'lasugun.

⁷ Hat inom, hagoromi pegawai inom afuni weim ambisangma nen wulibugun mene inom, ou amben mondok weak meneba nen inom sumburu ouwak oba nen inom at raja Nebukadnezar en inom nen hit hinaselei mene nen inom inendawit hinapluk hinobagagi'lek hinebe mondogat senhinobagambik hinoasuageluk herakhinobagagin o. Iluk An Tuhan nen nane mondogat igi,” ikhe iluk yaga'no isikhe.

⁸ A'nogo ikhesik Tuhan nen At againafuri mene inoba wene yi'nogo yagaisoageluk an yaganete, ”Holini! An hineisena Tuhan nen yagahisagain mene yi hiren wenasubagaik iluk yagahisikhi lagi o. Hineluk logogun mene andiba laga logogun a, athe wa'lagaikharek mene andiba laga logogun a.

⁹ Ap inebe lombok o kota ba logogun mene re weim oba nen inom, sumburu ouwagen inom, ou mondok amben weak mene nen inom, wa'lasugun o. Oba nen he it ekhe wulibi lamo it Babel inap o kota yi pin kwi waga logolik it inenggiba hinobagagun mene re hinoasugun le'ma inagap telek logogun oba nen it inamingmingengge asimbik logogun.

¹⁰ An nen kota yi mondogat wolelenggen isagain iluk nane arat tekhogo igimo re nendawirasigin mondok lego. Kota yi re raja Babel mene inenggimo foumo, aren mondok obalik tamukhogo endu noligin. Iluk An Tuhan nen nane mondogat igi o,” ikhe.

Raja Yehuda eisok erokwe mene inoba unggum wogisasikhe wene

^11-12 Tuhan nen he wene yi at raja Yehuda hun Daud ambisangma mene a'nogo eisok erokwe mene inoba yagaisoageluk yaganete, ”An Tuhan nen nane ikhi lagi mene yi holini o. Hiren hinenggi hundik-handik andomaba re wene mondok higithogo hilingitarek awene andi nek logouwageluk lenggalik laga logoni o. Ap enggin-fenggin inoba fugunem werek mene andomare it afuni weagerinabi'lagwi mene andoma inenggimo nen lologo fisikhi logoni o. A'nogo hilingisugun lek halok he An nanini re endu amulok kuluk hugunem nagulu elo'lek andi hakhogo hinoba fagain o,” iluk ikhe.

¹³ Andi nen Tuhan nen Yerusalem oba yagati logolik, ”Yerusalem, hat hebe welagen he yi'nogo: O tonggo hat hera'lukwe oma re sebelek hak werek kwelek, hat enek he legoma welagen. Hat he lei pirimse'ma erang tonggoma nen punu unggul wolonghogo liabek andi higit hilingik welagen, oba nen he An nen hat ninom wal-wal ugun o. Haren anggikhi logolik, ap misigen iluk ogo o kota yi pin kwi wagik, athe helep leget inalong palogo esiale uanhogo wagane'ma andoma molulukhogo kwi wesu lek hak anggikhi lagen,

¹⁴ oba nen he, hat hobabut hilingiti lagen mene andiba re An nen unggum wokhesigin o. Hat hebe welagen oba hawi istana andi inom, yi mene ti mene era'lukwe werek mene inom mondogat endu noligin. Iluk An Tuhan nen nane mondogat igi o,” ikhe isikhe.