YEREMIA 20 - Allah Wene Fano Wene Hupla Inane

Yeremia Imam Pasyur inom wene palhukwa wene

¹ Ap imam enu Pashur andi re hun Imer amlogo o Tuhan awi wuri'mo omanogo halhu mene faget kepala welagaikhe. A'nogo were'ma re an nen wene menfesigi mene omanogo mondogat holhikhesik he,

² aren ap miming inafi logolik an nebe yei warogo ebekhe hokho mene ekhe o Tuhan awi wuri'mo nen abel ambol kwe fikhit mene enu Pintu Gerbang Benyamin andiba porogo menobagauwageluk yagaisasikhe.

³ A'nogo hilingitama re inenggi ombo'ne meneba hubet he at Pasyur en an nebe warogo pore'ma a'nogo nen lologo pelaknobagaikhemo re, an nen at oba yi'nogo yagati, ”Hat henu Tuhan nen salhabigin mene re Pasyur he fuk, at he ’Ap wa'ni’ iluk sal habigin o.

⁴ Tuhan ebe nen ikhi logolik, ”Hat he honggwarek inom, it hagaila'lak inom, aben hinoasuageluk hinobagagin o. It hagaila'lak andoma re ap selei mene nen inoatunem heilenggen isagain. Nen, afuni Yehuda mene mondogat he raja Babel mene nen sebelinarek logouwageluk hilingfisagain, it mene fenakwe re hele warogo woginarek he o Babel lagain, nen tindelasugun mene re pinggi inoasigin.

⁵ It inaselei mene nen ogore o kota ariba inenggi werek hilingik mene andoma hugul heligik, nen inangge yi mene ti mene inom, raja Yehuda mene angge endamen engge fisogo welagarek mene andoma inom, helaluk loageluk An nen herakfisagain.

⁶ Nen, hat Pasyur hebe inom heisok erokwe mene inom andoma mondogat he senhinobagambik hele warogo wokhinarek he o Babel logoin. Ma re andoma nen hat hebe wa'lasumo salhabugun. Andi hakhogo re it hagaila'lak hat hane nen wulagamet hugunem hane holharek mene andoma ogore a'nogo nek hilingisugun ikhe o,” iluk yagati.

Yeremia nen Tuhan oba limamit falhikhe wene

⁷ Tuhan neisena, Haren an konafi lagenma an konek mene welagi. An nebe mabensek kwelek Hat enek he homame mene hilingik welagenma a'luk he an sebelogo nobagegenma welagi. A'nogo were'ma afuni inebe lombogen ineilenggen nen senggel nabi'lagwi, huberen pikhit hu'mokwe huli li'not nafu mondok werek.

⁸ Hundik-handik an nane igiluk he, ”Inanini mene nek! Mondok enggin tungsek mene nek!” hilinglagunem, ningginik-ningginik he nane omameba hum ngai eti lagi. Tuhan neisena, an he Haren ino iluk ugu mene omanogo yagaisikhi lagiba nen, an hundik-handik puliapnafik, li'norogo hilingnobagagik ugu mondok werego.

⁹ Oba nen an nendawimo nen anggikhi logolik, ”Tuhan andi re oba nonggorasimbik logoigen, At enuba yagaisugu aplere nabit,” iluk ikhi lagiba nen he Hat hane ikhi lagen mene andi re endu hangge nendawimo fil-fil hili'logo. A'nogo hilingitunem an nen hambuget hagain iluk walhikhi lagiba nen, hilingisu elo'lek mene ari'logo.

¹⁰ It afuni ekhekwe-ekhekwe mondogat inane nguluk habuk ikhi logolik, ”Yikwe tikwe mondogat youk kwelaklagama inailo nek agasik inoak leigeri'lagwi o! Niren at ari faget ap inalong werek inap inoba yagaisa louwogo!” iluk ili'lagwi. Nen, it an ninom fano hundik welago mene nen ogore, at ki sambul weak hilingisigin iluk nenangot nafu weregat. Iren ikhi logolik, ”Niren nina'mage lagagunem sebelhikhi lago mene oma faget ambisangma at oba ogo hilingfogoin o, oba nen he niren at endawinggen wanimbik hilingisugun oba nek he, elok mabenet fogoin o,” iluk ili'lagwi.

¹¹ Oba nen he Tuhan neisena, Hat he an nebikhit mene welagen. Nen Hat mondok homame hokho logolik halong werek hagun welagen. Ap an sebelogo nobagauwogeluk mu'narek nikho mene re, ineisok tunghogo hulambesimbik iren yi'nogo ti'nogo ekhe hilingisu elo'lek asigin. Iren hilingisugun mene iluk eberek werek mene omanogo sugwi asumo re, iren inenggali hokho mene asimbik logogun mene andi re, inonggoragi'lek ebethugu mondok logogun.

¹² Oba nen Tuhan neisena, Homame Mondok Hokho mene, Haren he mondok katokhogo nek afuni inobabut palisikhi lagen. Iren inendawimo anggili'lagwi mene inom, eberi'lagwi mene inom andoma re Hat mondok helurek. Andiba re Tuhan neisena, an nawene re Hat henggiba figiri'mo re, Haren naselei mene andoma inoba ambisangma hilingfisugunem isayogen he, neilenggen isoageluk hilingnobagain o.

¹³ Tuhan nen he afuni inaniniba hilingiri'lagwi mene inenggimo nen ap enggin hikhi logolik werek mene a'nogo lologo wulak fikhemo, Tuhan obaget wuni ini o, Arenek fogera'ni o.

¹⁴ Hari an nebe ta'lagagi sambul andi re homan ugu logouwak! An nagaisa nen ta'nafikhe andem sambul he inali'noratarek awi logouwak.

¹⁵ Nen, ap an ta'laga iluk wene waluk lagasik, an neisenaba yagati logolik, ”Hat he homalik abengge ta'laga o,” iluk yagatemo, neisena agaiyek hikhe mene andi ogore homan ugu logouwak!

¹⁶ Ap wene waluk laga mene andi re o kota Tuhan nen endawirati'lek wolelenggen isikhe mene andoma higit logouwak. At andi o hubet he heinet watunem holhik, nen lingge tulem weim abolok enek ugunem holhik, ikhi logouwak.

¹⁷ Andi re aren an nebe nagaisa alabutmo oan werek kwelek andemat noate lek andi nen, nen aren noa'lepma nen he an nagaisa alabutmo andomaat wa'lasu mene, an nebe nagaisa nen ta'nafi'lek mondok-mondogat a'marek logou mene.

¹⁸ Nenahalok an ta'nafa nogo? An wiik weakhogo hikhi logolik, nendawinggen warikhi logouwageluk ta'nafa nogo a? Nen, an nebe neluk welagi mene yi nenggali-penggalirogo hugu wela'luk loageluk ta'lagagi hea?