YEREMIA 18 - Allah Wene Fano Wene Hupla Inane

Yeremia ap ekhe iwak kweang tangge meneba elalhi lagaikhe mene ailoba lagaikhe wene

¹ Tuhan nen an noba yaganeti logolik,

² ”Hat he ap iwak kweang tangge meneba elalherek mene ailoba lan o, andoma arat asi lagen halok he An nen wene ekhe yagahesigin,” iluk yaganete.

³ A'nogo yaganetemo re an a'nogo ap iwak kweang tangge meneba elalherek mene a'nogo ailoba lagunemen he, ap a'nogo iwak pugunetarek meneba pugunetunem lagi.

⁴ A'nogo pugunhogo elalhi logolik aren iwak hilinghigik lak fugu mene omanogo afe nonghonghogo hilinglagu halok he, aren iwak omanogo amu mene ekhe at endawimo anggikherek higithogo hilingiti laga.

⁵ A'nogo hilingitunem higiri'mo nen, Tuhan nen an noba afuni Israel mene yagaisoageluk yaganeti logolik,

⁶ ”Hit An nagainafuri mene yi sani, ap iwak kweang tangge meneba elalherek mene nen hilingiri'lago andi hak, An nen a'nogo hilingisumo elo'lek anggegeba? Kweang tangge ap belanga elalherek mene enggimo werek andi hak he hirogo An nenggiba a'nogoat welagebo.

⁷ Ma re linggene misik sambul ekhe An nen okerajaan hea athe inunggulenu ekhe mene hea, waganogo wanhik, halik halokhogo figik, wolelenggen tagalogo figik, hilingisigin iluk ugunemen,

⁸ inunggulenu a'nogo inaweak oba nen inendawinggen agam etu halok An nen hilingisigin iluk nendawimo menenei wenggelfugu mene a'nogo sebelu hagaro.

⁹ Oba nen agamhogo re An nen unggulenu ekhe hea, o kerajaan ekhe hea, menfigik, omamet figik, hilingisigin iluk ugunemen,

¹⁰ unggulenu a'nogo nen An nane hologo hilingiti'legengge hilingiti logolik An mu'narek lagi'lek inaniniba nek hilingitu halok, attak hilingisigin anggagain mene a'nogo agam esimbik he, An nen wene warisasigi mene a'nogo higithogo it inunggulenu andi mene fanorinabigin mondok lego,” iluk ikhe.

¹¹ Tuhan nen an noba ikhi logolik, ”Yogondak he haren afuni Yehuda mene inom, Yerusalem werek mene inom inoba yagaisikhi logolik, An nen it ninom weim yabugun iluk wene melalogo figirik, unggum it wogisagain mene faget fougerati o, iluk ikhe yagaisano. It inoba yagaisikhi logolik he iren weak mene nek hilingitu werek mene andoma inom, it inobabut inom, iren hilingiri'lagwi mene inom andoma palfouwago,” iluk ikhe yagaisano.

¹² Oba nen iren onggo ikhi logolik, ”Andi re ero nena mene faget nogo? Nit he ninonggwarek ninendawimo anggugu mene nek hilingitu logogun! Nit ninamu-ninamu ninonggwarek ninendawinmo nen wenggelhaluk ninaniniba hilingitu aple andoma nek hilingiti logogun o,” iluk ugun o yaganete.

Afuni Israel mene nen Tuhan obokhogo herakfesukwa wene

¹³ Tuhan nen ikhi logolik, ”Afuni Israel mene nen he mondok namel-mel mene hilingiri'lagwi o. A'nogo hiingiri'lagwi andoma re ekhe hilinglaga mene werega?, iluk hiren inunggulenu amu mene inoba heinok wogisikhi logoni o.

¹⁴ Es o Libanon tom oba huli'liphogo kwelabek mene andoma waganogo laga mene ekhe werek nogo?. Nen, i eil habup mene tom oba nen wulibi wagarek mene firitok ikhe mene ekhe werek nogo?.

¹⁵ Oba nen An nagainafuri nen An noba inonggot a'luk he iren tugwi kembu faget amben fano mene duba omanogo noleri'lagwi. It he kwe o attak lagaukwa kwe a'nogo nen ineisok tunghogo waraluk he taganhogo ebekhe oan yago lekwe omanogo nen lili'lagwi.

¹⁶ O kweang yiba re iren obalik mondogat namel melhogo hilingisogo faga, nen inenggi mondok-mondok andomaba re afuni nen inalitnoratuba hilingik logogin. Afuni kwe andoma bene lagu mene nen he inunggul kwanit haluk inamel melhogo kwelakhikhi logogun.

¹⁷ Sogoi timur fikhiren fun ha wagunem kweang age furogo lagarek hak, An nagainafuri ogo An nen it inaselei mene inelokhoma waganogo fisa lagain. Nen, it inebe weagerinabigin mene inoba asi wagunem he, An nen nambot wogisambik telinabigin mondok lego!” iluk ikhe o, isikhe.

Yeremia sebelugun iluk anggomo kagalhukwa wene

¹⁸ Afuni nen ikhi logolik, ”Nit he ninebe seberogo nenat Yeremia pelabuogen he awene paluogen we'ni o. Allah ane andi re at amu nen yagaisoageluk werek fuk. Lego, At ane yaganisugu mene re it ap imam werek hilingi'mo re iren yanggulninafik, it ap inendawinggen wenggelek mene nen komo wene yaganisigik, ikhi logogun o, nen it ap nabi nen he Allah ane ugu mene omanogo yaganisikhi logogun aro. Andi nen he niren at ane ugunem holhi logogun lek enggere, wene katokhogo palharek oba omanogo hele warogo waluk louwogo,” iluk isukwa.

¹⁹ A'nogo ugunem an nen samban ikhi logolik, ”Tuhan neisena, an nen samban ikhi lagi mene yi hesanggo holin o, it ap an naselei mene nen an nanggomo pali'lagwi mene andoma futnobagain!

²⁰ An nen fano mene hilingfisugu kwelek iren inanini an noba fouwogeluk hilingiri'lagwi andi re hilingisuba hilingiri'lagwi a? Andiba nen an kweang pogole habuli'mo puageluk habulfili'lagwi andi. Neisena, An nen he it inoba Haren hanini fegen hanogo iluk Hat helokhoma nen inebikhit aga lagi mene a'nogo ebetnean o.

²¹ Andiba nen yogondak he, Tuhan neisena, it inagainafuri andoma sumburu nele nen ogo, tok ambisangma nen ogo wa'lasuak. It andoma nen hemire inaguni inom, inagainafuri inom, longgo uak. Nen ap mene re ou en wa'lagik, ap souge mene re weim yafunemen wa'lagik uak.

²² Ap inanini mene esa logalogo ferekhogo it inawi lokwe wagunem it inailo asuakhogo miming inabin o. An pule puageluk iren pogole habulhik, ele'ma ke'nok uageluk hele webet nobagagik ili'lagi andi.

²³ Oba nen he Tuhan neisena, iren an neiloak legabesuogeluk wene melali'lagwi mene andoma Hat mondogat helu welagen. Andiba re, Haren it inaweak sagalogo legetfisigik, honggoret fisigik, u fugo. It yei warogo hilingfisano o. Hat haniniba it inoba a'nogo hilingfisano,” iluk samban isigi.