YEHEZKIEL 48 - Allah Wene Fano Wene Hupla Inane

Kweang inunggulenu lombok omanogo sumburoageluk yagaisasikhe wene

^1-7 Kweang huli utara fikhiren hilingi'luk timur fikhit werek mene andi re, ero i Laut Tengah andoma nen laga lagasik, huli o kota Hetlon nen ebekwe o kota Hamat inom, Hazar-Enan inom kwi lagarek oba andoma nen he o Damsyk inom kota Hamat inom huli-hulimo andomaba hilingik logogin. Unggulenu ombo'ne mene yi re inebe lombok it mene kweang hurilogo timur huli nen lagasik barat en Laut Tengah huli andomaba hilingik mene andi inebe lombok misik-misik heloageluk wogisogoin mene re utara fikhiren erora'luk selatan fikhit meneba helogoin mene inenu re yi: Dan, Asyer, Naftali, Manasye, Efraim, Ruben, Yehuda inom andem.

Kweang andiba nen sili ekhe fem enggen tulem enogo fogoin mene re yi

⁸ Kweang andi mene fena ekhere arogo amurogo ekhe hilingitu mene amu tegelogo fogoin. Kweang andi uanhogo re 12,5 kilometer en ero utara fikhit andoma nen lagasik selatan huli andomaba hilingik logogin. Huli timur fikhiren lagasik barat fikhit andoma re ilirengge walhogo uanhogo re higithogo nek sumbusugun. Andi re fena minggilhigik unggulenu Israel mene wogisogoin mene andem inom higithogoat sumbusugun. Nen hobuk Tuhan awi re kweang andem obaat wusugun.

⁹ Nen kweang andi mene fena Tuhan faget enogo foumo logogin, andi re o kweang andi mene tulem andoma uanhogo re 12,5 kilometer en, nen esanggo sabiarogo re 10 kilometer en mene logogin.

¹⁰ Kweang andi enggen tulem andoma re Tuhan awi wusugun. It ap imam mene re kweang enogo fogoin oba andoma mene ekhe helogoin. It helogoin mene andoma abel timur fikhiren barat fikhit he 12,5 kilometer hilingik logogin, nen abel utara fikhiren he selatan fikhit andoma re 5 kilometer en hilinghigik helogoin.

¹¹ Kweang enogo fogoin oba andi re it imam Zadok againafuri tagomangge mene asugun. Iren Tuhan faget inamu nen hilingiti logolik, it ap Lewi fena inunggulenu misik mene nen, it Israel mene fenakwe omanogo weak hilingitunem inom weak hilingiti lagaukwa omanogo hakhogo hilingiri'lagwi lek.

¹² Andi faget he Zadok againafuri re kweang enogo ap Lewi mene wogisogoin mene era'lukwe andoma wogisogoin. Kweang enogo logogin mene andi re mondok horek mene logogin.

¹³ Kweang afuni Lewi mene faget timur fikhiren pikhit barat huli hilingik logogin mene andi uanhogo re 12,5 kilometer en nen sabia kwe re 5 kilometer en abel utara fikhiren he selatan fikhit hilingi'mo re, kweang andi asiok he it imam mene inanggweang andi inom higithogo erarek logogin.

¹⁴ Endebengge iluk ogo kweang andi mene iren onggo wanugun lek, nen amungge inom ogo oak wanugun legat. Kweang Israel en mene mondok fanoma andoma ap amu mene inenggiba ekhe fogoin lek. Kweang andi Tuhan faget mondok enogo were'ma, At anggweang mene aga hilingi'mo re.

¹⁵ Kweang enogo werek mene andi nen fena selatan fikhit andoma kweang endep tindelek werek mene andem uanhogo re 12,5 kilometer mene werek, nen, sabiarekwe re dua setengah kilometer en werek. Kweang andem he horek lek mene afuni we mene nen inebe logogun oba inom engga faget werek oba helogoin halok he fano, nen tulem andoma re kota misik ekhe wusugun.

¹⁶ Kota andi re unggut enggaminogo nen wusugun, unggut ebe lombok andoma re dua seperempat kilometer en enek wusugun.

¹⁷ Kota andi abirengge haningisogo andoma re, kweang healogo ebe lombok uanhogo re 125 meter en hilingik logogin.

¹⁸ Fena timur fikhit ogo barat fikhit ogo hunogo lombok kweang healogo logogin mene andi ebe lombok lima kali dua setengah kilometer en hilingik logogin. Kweang pire healek logogin mene andem he afuni kota andoma werek mene nen ineabu waganogo yakhugukwe logogin.

¹⁹ Afuni Israel mene kota andiba logogun mene nen he kweang andiba yabu helikhi logogun.

²⁰ Andi nen kweang mondogat andi re, enogo fogoin mene inom, kota halugun mene faget inom andi re unggut enggaminogo hilingi'mo re, unggut andoma ebe lombok he 12,5 kilometer en hilingik logogin.

^21-22 Kweang abel timur fikhit andi inom barat fikhit andi inom he Tuhan Awi wusugun mene faget inom, imam mene faget inom ap Lewi mene faget inom, kota andi faget inom, fouget fogoin mene andi re ap enu werek logogin mene a'nogo nen melalinafi logogin mene faget logogin. Kweang andi uanhogo lagasik timur fikhit uanhogo re timur huli-hulimo andoma, nen fena barat fikhit he Laut Tenggah andoma nen lagasik, kweang Yehuda nen mene inom, Benyamin nen mene inom andoma huli logogin.

Kweang unggulenu amu-amu mene inobaget fogoin mene

^23-27 Kweang enogo fogoin oba andi nen kweang selatan fikhit werek mene andoma re it inunggulenu amu-amu mene faget fogoin. Kweang andi sabiarogo hilingik mene re, timur fikhit andoma nen erora'luk barat fikhiren he Laut Tengah huliba hilingi'mo, kweang ebe sumbuti logolik utara fikhiren sumburik-sumburik he selatan fikhit andomaba sumbusugun mene re yi'nogo: Benyamin Simeon Isakhar Zebulon Gad

²⁸ Fena selatan fikhit unggulenu Gad mene anggweangma huli-hulimo andoma re o Tamar en barat abel ambol fikhiren lagasik, i Kades-Meriba elesi soganogo andomaba logogin, andi nen fena barat a'ma fikhit he o Mesir huli nen he Laut Tengah huliba logogin.

²⁹ Tuhan Lego Mondok welagarek mene a'nogo nen ane ikhi logolik, ”A'nogo nek kweang andi it inunggulenu Israel mene inoba sumburisano,” iluk yaganete.

O Yerusalem ebekhe kugukwe faget isikhe wene

^30-34 Kwe ambe o Yerusalem kugukwe re lambukhogo 12 nen folelek welagaikhe. Leget pa'leget o ebe enggaminogo andem ebe lombok andoma ilirenggerogo re dua seperempat kilometer en, nen kwe ambe hokho mene re henagan folelek welaga. Kwe folelek mene andoma ebe lombok enu re it Israel mene inunggulenu werek mene higithogo kwe misikdek higik enu salek welaga, kwe ambe utara fikhit mene re enu Ruben inom, Yehuda inom Lewi inom salek welaga, Kwe ambe timur fikhit mene re enu Yusuf, Benyamin, Dan inom salek welaga. Kwe ambe selatan fikhit meneba re Simion inom, Isakhar, Zebulon inom, inenu salek welaga, nen kwe ambe barat fikhit meneba re Gad, Asyer, Naftali, inom inenu salek welaga.

³⁵ Leget pa'leget andoma mondogat uanhogo re sembilan kilometer en. Yogondak yi huli nen enggere kota andi enu ikhi logolik he, ”Tuhan ANDOMA WEREK!” iluk agarek.