YEHEZKIEL 42 - Allah Wene Fano Wene Hupla Inane

O pire Tuhan awi wurimo era'lu wurik welagaikhe wene

¹ Andi nen he ap a'nogo nen an hondo'narek senggelek endakwe fikhit andoma wo'narek lagasik o wurik ekhe Tuhan awi wuri'mo nen fena abel utara fikhit andoma nobagai laga, o andi Tuhan awi wuri'mo o hokho mene abel barat fikhit andi nen he eil uansek lek.

² O wurik mene andiba nen uanhogo re we lima puluh meter en, nen horok fikhit he dua puluh lima meter en.

³ O wurik andi nen esanggo misik he elokhe o wurep lisogo kwe wurik mene a'nogo fikhit hilingi'mo, sabiarogo re sepuluh meter en, nen esanggo ekhe re elokhe ohulu helep meneba endakwe wurik a'nogo fikhit hilingik welaga. O wurik andi re tiga tingkat hilingi'mo, sap palek mene andem ebe lombok tum fikhit he higilogo elonggoma kwelabe'ma re o fem a'ma mene andi nek he wogologo wulabek welaga higi.

⁴ O senggelek andoma elokhe fikhit he, elonggoma kwilagukwe hukhogo kwelabe'ma re, kwe huksekwe andi horokwe re lima meter en, uankwe re lima puluh meter en hilingik welaga. Nen kwe sou re abel utara fikhit fololek welaga.

⁵ Arigini'mo o senggelek sap ambolkwe mene omanogo re keloksek kwelek a'ma mene a'nogo nek he endep ekhe wogologo hilingik welaga. Aringini'more o senggelek elokhe fikhit hukhogo kwelabek kwe andoma re ambolkwe poikwe re ele keloksek oba nen he mai kwe re langhogo hilingik welaga.

⁶ O senggelek andoma re sap henagan oba wuri'mo, o silikwe wurik mene e tiang liabek welaga omanogo hak liabek welaga lek.

^7-8 O senggelek a'makwe mene minggilogo uanhogo re dua puluh lima meter en andi re oak enek hilingik welaga. Oba nen he fena hokhorogo dua puluh lima meter en ogore, o senggelek-senggelek engge wurik welaga. Sap fem amboloba poi nogoba nen o wurik andi mondogat ebene andoma re o senggelek-senggelegengge mondok hokhorogo hilingik welaga.

^9-10 Hulirek a'ma fikhit o wurik andi ambisang timur fikhit andoma inom, oak eroma andoma inom he kwe sou misik ekhe folelogo o elokhe fikhit wulabek welaga. O Tuhan awi wuri'mo nen abel selatan fikhit andoma re, o misik obabut higithogo wurik mene welaga, o ekhe re o abel fena barat fikhit wurik mene andem en he eil uansek lek.

¹¹ O senggelek andoma elokhe fikhit he elonggoma kwilagukwe abel utara fikhit hilingik a'nogo hakhogo hilingik welaga. Ilirengge hilingik mene inom, obabut wurik aple inom, kwe ambe palek aple inom obabut higit enek hilingik welaga.

¹² O senggelek a'ma andoma fikhit he esanggo selatan fikhit, oak eroma nen ambisang timur fikhit andoma ogore, kwe sou misik ekhe hilingik welagaat.

¹³ Ap andi nen an noba ikhi logolik, ”O pire wurik mene andem he mondok horek awi. Andoma re, ap imam en Tuhan elokhoma menla'luk, wam warogo nolhungge mondok fano mene omanogore andoma nen ninggi logogun o. Andoma nen enek warogo fugu mene mondok fano mene fikhi logogun engge ebere: gandum enggen palek inom, ninaweak lek hilingisogo ninobagauwageluk Tuhan kinotu mene inom, afuni inangge obali'mo fugu mene inom, andoma nek fikhi logogun.

¹⁴ It imam ambi Tuhan awi wuri'mo andoma nen yabu mondogat hilingfuluk endakwe fikhit elokhoma andoma wulibi laluk halok he, su iren O Obalik Hore'ma andi yabu hilingiti logolik labetu mene omanogore nonggologo senggelek andomaba fikhi logogun. Andoma mondogat hilingfuluk enek he, it inasu amu mene laberaluk he afuni kabokse'ma inambit laga logogun o,” iluk yaganete.

Tuhan Awi wurik mene era'lukwe maserogo andoma ilirengge walhasikhe wene

¹⁵ Ap andi nen Tuhan awi wuri'mo nen elonggo fikhit omanogo mondogat ilirengget hikhesik, aren an wo'narek he kwe sou timur fikhiren wulibi lagasik he, o Tuhan awi wurik mene a'nogo haningisogo ilirengge walhikhe.

¹⁶ Tomuk ilirengge a'nogoba abel timur fikhit walet hikhemo re: 250 meter en hilingik welaga.

^17-19 Andi ilirengget fuluk aren fena abel utara fikhit inom selatan fikhit inom barat fihit inom walet hikheat, menere esanggo omanogo ebe lombok uansek welaga mene re higithogo nek 250 meter en hilingik welaga.

²⁰ Arigini'mo re o Tuhan awi wurik mene andi re kweang unggut enggaminogo hilingik oba wuri'mo re, esanggo andoma ebe lombok he 250 meter en hilingik welaga. Kweang andi faget leget pa'leget we misik obaluak andiat waganogo kwelabe'ma re, pa'leget andi nen he kweang Tuhan obaget enogo werek mene a'nogo inom kweang hesangge mene inom faget hulirek welaga.