YEHEZKIEL 41 - Allah Wene Fano Wene Hupla Inane

¹ Ap a'nogo nen an hondo'narek lagasik he senggelek tulem meneba andoma kwi laga, senggelek hokho mene Obalik Mondok Hore'ma a'nogo wo'narek laga. Lagasik, aren he o andoma abel elikwe yikwe inom tiang ninghogo liagaisogo wurik mene omanogo ilirengge walhikhe mene re fena-fana andoma uanhogo re tiga meter en hilingik welaga,

² nen horok fikhit he lima meter en hilingik welaga. Esanggo elikwe mene inom yikwe mene inom andoma ayogouk wulimhogo re dua setengah meter en hilingik welaga. Andi nen aren Obalik Mondok Hore'ma a'nogo ilirengge walhikhe mene re uankwe re 20 meter en, horok fikhit he 10 meter en hilingik welaga.

³ Andi nen at ebe senggelek tulem meneba kwikhe. Kwikhesik he aren o andoma fikhit tiang ninghogo liagaisogo wurik mene omanogo ilirengge walhikhemo nen he uan kwe re satu meter en, horok fikhit he tiga meter en hilingik welaga. Nen esanggo hobat oba andoma wulimsek mene re tiga setengah meter en hilingik welaga.

⁴ A'nogo nen aren o senggelek andi elonggo ilirengge walhikhe mene re, wurik menere unggut enggaminogo hilingi'mo, uan fikhit inom horok fikhit inom amu-amu re higithogo nek sepuluh meter en hilingik welaga. A'nogo hilingfikhesik aren an yaganeti logolik, ”Obalik Mondok Horek oba a'nogo re yi o,” iluk yaganete.

O senggelek Tuhan Awi wurik welagaikhe mene a'nogo

⁵ Andi mondogat hilingfuluk ap andi nen o oak Tuhan awi wurik mene elonggo fikhiren elirenggetesik ayogouk wulimsek mene re tiga meter en, o oak Tuhan awi hore'ma andi maserogo senggelek welaga mene wogolek kwere dua meter en higik hilingik welaga.

⁶ Senggelek-senggelek engge andoma sap henagan wurogo liabe'ma re, sap palek aremnogo ebe lombok he 30 nen senggelek welaga. Oak o sap henagan andem abel endakwe fikhit he endep seramsek hanggeba nen he o sap palek a'makwe nek he wulimhogo hilingik welaga, were'ma senggelek omanogo hulithigik fikhi logolik o Tuhan awi wurik a'nogo jendela folel figi'legengge wurik welaga.

⁷ O Tuhan awi wurik mene oak andi re endakwe fikhiren yethugunem he kweangma nen pikhit poma liakhugunem he higirenek hilingik welaga. Nen o Tuhan awi wurik mene andi abel endakwe fikhiren hulirek mene omanogo endakwe fikhit andoma re kwe pela pire hokho mene were'ma re, afuni a'ma mama nen he o sap palek pire meneba ogo nen henaganek meneba ogo elok lagau hak enek welaga.

^8-11 Senggelek andoma abel endakwe fikhit wulimhogo re dua setengah meter en hilingik welaga. O wurik andi kwe folelek welaga re Tuhan awi wurik fikhiren folelogo utara fikhit andoma hilingik welaga, nen fena senggelek omanogo re, kwe abel selatan fikhit folelek welaga. O Tuhan awi wurik mene maserogo andoma wurep lisogo re dua setengah meter en, nen o ebe wurogo kweangma nen liabek uanhogo re tiga meter en, andulire Tuhan awi wurik mene ambe palek omanogo o ebe wusugun mene ubule faga mene inom higitsek welaga. Nen o wurep lisogo endakwe fikhit wurik mene nen hilingi'luk nen o it ap imam lagen yabu hilingituba nen hilingi'luk andoma re senggelek ekhe selekhogoluk wuri'mo elonggo wogologore Tuhan awi wuri'mo nen pikhit fikhit inom hare fikhit inom andoma re sepuluh meter en hilingik welaga.

O wurik fena barat fikhit welaga mene re yi'nogo

¹² O hulirek fena fikhiren barat fikhit andoma re, o wurik hokho mene ekhe were'ma o andi ebe uanhogo re 45 meter en, nen horokwe re 35 meter en, o andi ayogouk wulimhogore dua setengah meter en hilingik welaga.

O Tuhan awi wurik mene a'nogo ilirengge mondogat he yi'nogo

¹³ Ap a'nogo nen Tuhan awi wurik a'nogo ilirenggetikhemo re, uanhogo re 50 meter en. Tuhan awi wurik andi ambot fikhiren, o wurik hokho mene fena barat fikhit andi uanhogo hilingik mene ogore 50 meter enat hilingik welaga.

¹⁴ Tuhan awi wurik andi elokhe fikhiren timur fikhit hilingik mene abel harekwe mene inom fikhit kwe mene inom oba hilingik mene ogore 50 meter enat hilingik welaga.

¹⁵ Ap andi nen ogore o hokho mene wurik senggelek elokhoma mene fena barat fikhit hilingik mene andi ogo ilirengge walet hikhesik he uan kwere 50 meter en hilingik welaga, andi re oak pikhit kwe inom harekwe inom mondogat lambulogo hilingik welaga. O Tuhan awi wuri'mo a'nogo senggelek welaga re yi'nogo, senggelek elokhe fikhit menere, Senggelek Obalik Hore'ma a'nogo inom, nen senggelek Obalik Mondok Hore'ma a'nogo inom,

Tuhan awi wurik andiba hilingik menere yi'nogo

¹⁶ alilingge e meneba hilingi'mo re, kweangma nen pikhit jendela ba andoma re eba nek ayogouk sebelhigik wurik welaga.

¹⁷ O hobat elonggo fikhit andoma mondogat he alilingge waganogo hesesenge wokhigik hilingik welaga.

¹⁸ Hesesengge waganek andoma ebere e lua inom kerub inom, nen e lua misik ilirenggerogo re no kerub pire aremnogo honggole'ma welaga. Nen no kerub andoma elokhe re pire hilingi'mo,

¹⁹ elokhe misik ekhe ap elokhe mene andi re e lua hare fikhit mene a'nogo fikhit elokherek welaga, nen mene singa elokhe hak mene a'nogo re e lua pikhit fikhit mene a'nogoba elokhe kwelabek welaga. A'nogo hilingi'mo hesesengge waganek engge andoma re o Tuhan awi wurik a'nogo elonggolokwe

²⁰ andoma re ohulumo nen pikhit kwe sou ambe ambol kwe pomaba hilingik welaga.

²¹ E tiang kwe sou hilingik mene Obalik Hore'ma a'nogo re unggut enggaminogo hilingik meneba nek wurik welaga. O senggelek elokhoma Obalik Mondok Hore'ma a'nogo re amungge ekhe ebere mezbah e meneba wurik mene hangge welaga.

Mezbah e meneba wurik welaga menere yi'nogo

²² Were'ma liabek uanhogo wurik mene re satu setengah meter en, nen uan fikhit he satu meter en. horok fikhit he satu meter enat hilingi'mo, unggut-unggut andoma inom, ea lakfaga mene inom, hobat wuta mene inom he eba nek wutama welaga. Ap a'nogo nen an yaganeti logolik, ”Yi re meja Tuhan ebe we'luk werek oba re elokhoma werek ari o,” iluk yaganete.

Kwe sou-kwe sou engge wurik welaga mene re yi'nogo

²³ Senggelek Obalik Hore'ma a'nogore kwe sou misik hilingik welaga, andi hakhogo re Senggelek Mondok Hore'ma andi ogore,

²⁴ a'nogoat hilingi'mo husuogeluk he tulemen huti lagaikha.

²⁵ Kwe sou o obalik Horek oba a'nogo re alilingge e lua ilirengge inom, kerub inom hesesengge waganogo o hobat oba hilingik mene hakhogo hilingik welaga. O senggelek elokhoma kwe endakwe nen kugu fikhit andoma re asiok-asiok engge e meneba hilingik welaga.

²⁶ O hobat abel fena-fena andomaba re jendela hilinghigik welaga, nen oak hobat ebene re e lua ilirengge hesesengge wokhigik hilingik welaga.