YEHEZKIEL 29 - Allah Wene Fano Wene Hupla Inane

Mesir mene unggum wogisagain isikhe wene

¹ Nit hele warogo hu'ninabi lagaukwama werek kwelek enek tanggal dua belas tugi nomolongge meneba tahun ogo nomolo mene were'ma Tuhan ane an noba ikhi logolik,

² ”Afuni wa'lagaikharek mene yi re, hat he Firaun raja Mesir mene andiba helokhe fei lan o. At oba inom afuni Mesir mene inoba inom mondogat unggum wogisagain ikhe,” iluk yagaisano ikhe.

³ Tuhan Lego Mondok welagarek mene a'nogo nen wene hilingisuageluk ikhe mene yi hat raja Mesir mene yagahesuageluk mimingnafi logolik yi'nogo ikhe, ”An yi re hat haselei mene welagi o, buaya hokho mene i laut obakhe tulem pourek welagen mene yi re. Hat hane nen weregap hikhi logolik i Nil andi an nagai o, an nen elalhigi mene ikhi lagen.

⁴ An nen ikan aik hat helanglang oba hambot fembik ikan he hat hamurul ebene omanogo taget filik lagain. A'nogo hilingfuluk hat hebe re i Nil andi ima nen An nen ikan hat hamurul oba taksek mene andomaba nen lisogo wulakhobagai wesigin.

⁵ Andi nen hat hebe inom ikan andoma mondogat inom An nen hambokhogo o leimo ilingage pirimse'ma andoma lakhinobagagin. Andoma lakhobagaumo re, hebe kweangma pelakhobagaumo wengik andoma logogin. Ap misigen iluk ogo ekhe hebe warek andi salhabugun lek. Hebe warek he An nen sue inom, eluk-elugengge amu mene inomen noageluk wogisagain.

⁶ Andiba re afuni Mesir mene inebe mondogen An Tuhan welagirek mene a'nogo inelu asugun o,” ikhe. Tuhan ane ikhi logolik, ”Unggulenu Mesir mene yi! Ap Israel mene nen he haren lebetniselep iluk inendawinggen eberek oba nen, hat he we tomuk maben mene hangge hilingik welagen engge faget.

⁷ Arigini'mo it inebe hat hoba himbirik were'ma, hat hebe fulokhogo it inomolo lekwe lagagunem, it inambot sombologo nonghong ugun.

⁸ Andi hilinglasigin andi nen he. An Tuhan Lego Mondok welagirek mene a'nogo nen hat hoba nane ikhi lagi yi o, An nen tentara hat huget hobagauwageluk lakfisa wesumo re, karok waluk waga logolik, afuni inom wam inom mondogat hinoasugun.

⁹ Mesir kweang oba andoma hobuk afuni inareng mondok terenghogo hilingi'mo asigin. Andiba re hiren An Tuhan nebe hinelu asugun,” iluk ikhe. Tuhan nen ikhi logolik, ”Hat raja Mesir mene yi! Haren ikhi logolik, i Nil he an nagai o, an nen hilingitigi mene ikhi lagen.

¹⁰ Andiba re eberogo nen An he hat haselei mene agi andi, nen hagai Nil aselei mene agi. O Mesir oba mondogat wolelenggenhogo legetfagain, andi re kota Migdol utara fikhiren erorasimbik laga logombik he, huli o kota Aswan selatan fikhit andomaba nen, hiling-hiling he o Sudan huli andomaba hilingfagain.

¹¹ Afuni ogo nen lebetungge ogo kwe andi kwe nen ekhe laga logogun mondok lek. Empat puluh tahun aninurogo andi re ap ekhe logogun lek.

¹² An nen Mesir kweang oba mondogat pirimhogo legetfagain, ma re o kweang mondok pirimse'ma andoma anggele'ma nen he Mesir enek he alonghogo hilingik logogin. Empat puluh tahun aninurogo andem oba kota Mesir ebene andoma re o meisalek enek olunhogo hilingik logogin. Inunggulenu Mesir mene re An nen it mugusogo wulaginabumo yi kwe ti kwe lagaikharek mene logogun. It he o kweang amu amukwe telfolhogo sagarek logolik yi afuni ti afuni inunggulenu amu mene inanggelekwe andoma logogun o,” iluk ikhe.

¹³ Tuhan Lego Mondok welagarek mene a'nogo ane ikhi logolik, ”Hit hinunggulenu Mesir mene yi sani, Empat puluh tahun mondogat hilingfuluk kweang hit sagarogo logogun kwe andoma nen An nen nekhengge wokhinarek wesigin.

¹⁴ Hit An nen halogo hinobagambik waganogo hinanggweang eroma o Mesir selatan fikhit andoma logobagaik iluk yagahisagain. Andoma hiren kerajaan maben mene ekhe menogo fogoin,

¹⁵ andi re omame mondogat lek mene o kweangma yoma andi hak mene ekhe werek lek mene. An nen hit mondogat maben mene hilingisogo hinobagaumo hiren hinunggulenu amu-amu mene ekhe melalinafi logogun lek, athe it inelokhoma nen legeisogo fakhikhi logogun legat.

¹⁶ Israel mene nen he hiren lebetninapni iluk ekhe yagahisogoin lek. Hit Mesir mene yi sani, hit hinoba ambisangma hilinglasugun mene andi re Israel mene nen hit hinoba himbirik logolik hilingiti lagaukwa mene andi re nonghonghogo, iluk iren hilingitukwa mene andi faget eberisikhi logogun o. Andiba re An Tuhan Lego Mondok welagirek mene a'nogo it Israel mene nen inelu asugun,” ikhe.

Raja Nebukadnezar en Mesir sebelogo fagain isikhe wene

¹⁷ Tanggal satu bulan satu tahun dua puluh tujuh meneba re nit hele warogo hukninafukwama logolik oba andem he, Tuhan ane an noba yaganeti logolik mel ikhe:

¹⁸ Afuni wa'lagaikharek mene yi re, raja Nebukadnezar awi Babel mene a'nogo nen Tirus mene inoasigiluk huget inabi'logo. A'nogo hilingiti logolik aren ap sikhe fisogo inap omanogo inoba re enggin mene hasuageluk yagaisugunem, inunggul telak wanhik, inomolo enggen wanhik, hilingiri'lagoba nen he at raja ogo nen it sikhe fisogo inap andoma ogo iren hilingiri'lagwi mene andi ambisangma ekhe helili'lagwi lek.

¹⁹ Andi faget he An Tuhan Lego Mondok welagirek mene a'nogo nen nane ikhi logolik, ”Kweang Mesir kweang andi re An nen raja Nebukadnezar wogosigin o. Ma re aren inangge teligik, taluget higik helikhi logolik, Mesir angge yi mene ti mene omanogo at angge asimbik, agoromi tentara sumburisageluk hogougeraluk lagain.

²⁰ Kweang Mesir anggweang andi re tentara aren mene nen yabu An nobaget hilingita andiba re An nen at onggo hakhogo kweang andi wogosigin. Iluk An Tuhan Lego Mondok welagirek mene a'nogo nane mondogat igi o,” ikhe.

²¹ Ningginik sambul wene andi ambi agu halok he An nen Israel unggulenu mondok omame hokho mene hilingisogo fagain o. A'nogo hilingisogo fembik hat Yehezkiel en hane haferogo ugunem afuni mondogaren holhi logogun. Andiba re iren An Tuhan iluk inelu asugun o,” ikhe.